Sin anfutu kaun naga anpake konelit tal antee toon nifun mese'
20
Lalit au 'ail 'iit ahake tuaf es ansanu neem na'ko sonaf neno tunan anbi nenog atnanan. In annaa' konelit nono naek mese', ma annaa' letu' abola' hamu'it le' ka nmu'i fa tu'as. 2 Lalit in annao anheke kaun naga naan, es le' nitu nakaf le' sin anteek nak, “Iblis”. In es le' namoe naan mansian na'ko faijan unun. Es on naan ahake naan anfutu kaun naga naan anpake konelit, he nataam noi abola' naan tal antee toon nifun mese'.a 3 Ma ahake naan antita' nataam kaun naga naan noi abola' hamu'it naan. Lalit in ansegel namate abola' naan in nesun, he n'o'af ma nletu namate kaun naga naan, tal antee toon nifun mese'. Nok lalan naan, kaun naga naan ka nabe'i fa he nputa-kliun ale' kanan uuf ma pah anbin pah-pinan tal antee toon nifun mese'. Lalit nafetin kaun naga naan, mes aal labah aah.4 Lalit au 'ail 'iit atoko' plenat mafaun ee kah, ma anmu'i tuaf-tuaf antokon anbi sin. Uisnenog nasaeb soo-balu-pilug he anjalin afeek lasij. Sin ala sin le' naan, tuaf-tuaf le' nahunut nanaob lasij anmatoom nok Nai Yesus In Tu'in Alekot, ma Uisnenog In A'an ma Plenat, tal antee atoni nlolo niis sin. Sin ala sin le' naan, ka naluli' ma nabesan fa noi mu'i fuij apisut naan nok in fatu mahuma'. Sin es le' ka nlomin fa he nsimo mu'i fuij apisut naan in malak anbi sin iilk een, ai' sin aniimk een. Anlolo niis sin, mes Uisnenog namonib nafani' sin, he sin nna'an aplenat nabguan nok Kristus tal antee toon nifun mese'.b 5-6 Nok lalan naan, sin anjalin tuaf ahunut le' Uisnenog namonib nafani' sin na'kon lasi maten. Es on naan sin le' iij, an'ua leko, natuin sin anjalin Uisnenog Inin. Ka ntita' napoitan ma npolin sin fa anbin bale hamu'it, he naik napenin ma nnaben niit lasi maten nomol nuug. Fun sin le' anjalin anaak lasi palsait le' antuthae Uisnenog ma Kristus. Ma sin anna'an aplenat amsa' nabguan nok Kristus tal antee toon nifun mese'.
Mes amates abjaan lo he npaon tal antee toon nifun mese', na' Uisnenog namonib nafani' sin.
Sin anpolin nitu nakaf antaam noi tasi aij
7 Tabug toon nifun mese namsoup gwe, Uisnenog of anlelu he nafetin kaun naga naan anpoi na'ko abola' hamu'it. 8 Lalit in annao nputa-kliun uuf ma pah le' sin anteek nak, Gok ma Magok, le' neman na'kon balel-balel anbi pah-pinan. In of nabguab naan sin too nuug he nmakenan. Sin amfauk een, on le' snae nulef et tasij ninen.c 9 Lalit solalus na'kon Gok ma Magok anbalis een ma nnao matan, tal antee pah-pinan anfuun am nateef. Lalit sin antoko nfuun ma nateef Uisnenog In koot le' In nneek nanij, ma In tuaf een. Mes Uisnenog nasanut aij na'ko nenog atnanan, he noutu niis solalus sin naan ok-oke'. 10 Lalit sin anheke naan nitu nakaf le' namoe nalali too mfaun sin naan. Nitu nakaf naan, es le' Iblis. Ma sin anpolin nataam noi tasi ai fatu-foon le' anpiin ka nmate niit fa. In of an'o'af naan on, nok mu'i fuij apisut ma in mafefa' aputa-kliun naan. Anbi balel naan, sin of napenin hamu'it faij-manas, tal antee nabal-baal.
Uisnenog nafeek ale' kanan mansian, sin lasin
11 Lalit au 'ail 'iit atoko plenat muti' naek mese'. Ma Uisnenog antuun On anbi atoko plenat naan. Nok askeken ate, pah-pinan ma nenog atnanan naen namnekun, tal ka tiit ateni sin fa.d
12 Lalit au 'ail 'iit tuaf-tuaf le' anmaten nalalin. Sin al-ala sin abaut-anaet anhaken ma nbaisenun an'anin toko plenat naan. Ma ahake na'ko sonaf neno tunan neem ma nfai sulat een le' anluul mansian sin amo'ek een ok-oke'. Lalit sin anfai nteni sulat abjaan, es le' sulat le' anluul tuaf-tuaf le' of he nmoni nok Uisnenog tal antee nabal-baal. Ma In nafeek atoni amates sin naan sin lasin, natuin saa'-saa' le' sin anmo'en, nahuum on le' malula' et sulat een naan. 13 Lalit ale' amates sin ok-oke', sin ala sin neman ma nbaisenu toko plenat naan. Sin ala sin le' naan, le' anmaten anbin naijaa meto', ai' anbi tasij. Lalit Uisnenog nafeek sin lasin mese-mese, anmatoom nok saa'-saa' le' sin anmo'e sin. 14 Lalit Uisnenog anpolin nani ‘Maten’ noi tasi aij le' anpiin nabal-baal naan. In anpolin nani ‘Balel noi Amates’ amsa', an'ani tasi aij nane msa'. Tasi ai abal-balat naan, es le' bale maten nomol nuug. 15 Tuaf-tuaf le' sin kaank een ka malula' fa nbin sulat nane msa', anpolin nataam sin noi tasi aij abal-balat naan. Fun sulat naan, es le' anluul kanaf na'ko tuaf le' anmonin piut-piut nok Uisnenog.