Pukan asiit anaek ansiin anbin sonaf neno tunan
19
Ahake sonaf neno tunan naan naguab nalali on nane, au 'neen hanaf anaek mese nahuum on le' pukan asiit anaek, ansiin et sonaf neno tunan. Sin ansiin am nak,“Haleluya! Haleluya!
Hit taiti siit pules-bo'is toi hit Uisnenog,
natuin In mapina'-maklaha'.
Haleluya! Haleluya!
Hit taiti siit pules-bo'is toi hit Uisnenog,
natuin In kuun, lo akuasat anneis-neis.
Uisnenog es le' ansoi nafetin kit,
na'ko ale' kanan hit sanat ma penu sin.
Uisnenog es le' nanono kit,
na'ko ale' kanan monit apenut-abeot.
2 Hit taiti siit pules-bo'is toi hit Uisnenog,
natuin In nafeek lasij, lo nmatai.
Hit taiti siit pules-bo'is toi hit Uisnenog,
natuin In es anhukum ate, lo namneo.
Uisnenog nasanut hukum noi bifeel aloket naan,
natuin in anfuli' tuaf-tuaf anbi pah-pinan,
he nmakaken nabguan nokan,
ma nata-tuin een ahaa in maufinut.
Uisnenog anbalas nalali bifee maufinu naan,
natuin in anlolo namate,
Uisnenog in aan lelu' ma aan leka' sin.”a
3 Lalit sin ansiin antenin siit abjaan anbin sonaf neno tunan am nak,
“Haleluya! Pules ma bo'is moi Uisnenog!
Haleluya! Maiti milat-latan In kanan!
Natuin masu' na'ko aij le' noutu niis bifeel naan in aon amates,
ansae piut-piut ma ka natfeek niit fa.
Ma masu' na'ko aij le' noutu niis koot matani' naan,
ansae piut-piut ka nasnaas niit fa.”b
4 Lalit amnasit tuaf bo' nuug am haa' nok mu'i abe'it haa' een naan, anli'tuun ma naluli' een nabesan noin Uisnenog In atoko' plenat. Sin anbaisenun neki lasi holmaat am nak,
“Namneo! Iim nai he hit ala kit atpules ma tbo'is Uisnenog!
Haleluya! Iim nai he hit ala kit ta'aiti ma attuna' talatan In kanan!”
Abibi-kase Ana' In fesek matsaos
5 Lalit au 'neen ateni hanaf mese na'ko toko plenat naan am nak,
“Hoi, Uisnenog In aan lelu' ma aan leka' ala ki!
Hoi, Uisnenog In anah-anah ki!
Iim he hit ttuna' talat-latan Uisnenog In kanan.
Iim ala ki, abaut-anaet, mnasif-munif, he tpules ma tbo'is Ee.”c
6 Lalit au 'neen on le' too mfaun naguab een. Sin hanak een on le' oe bonij, ma anaek on le' 'lotos naloot ka natfeek fa. Sin naguab een am nak,
“Haleluya! Hai msii ma mbo'is Uisnenog.
Haleluya! Hai mtuna' milat-latan In kanan.
Natuin In kuun es le' akuasat le'uf.
Ma In kuun es le' naplenat ale' kanan saa'-saa'.d
7 Tabug iij, hit nekak een anmalinan.
Tabug ii, hit tabe'i tkumaan
Hit tpules ma tbo'is Ee,
natuin Abibi-kase Ana' naan In tabug he nmatsao, antee nalaal je.
Hit ttuna' talat-latan In kanan,
natuin Abibi-kase Ana' naan In baroit naloitan nalaal je.
8 Uisnenog anfee nalali ne tais ma pakel baroit, le' namaas ma ma'upa'.
Uisnenog anfee nalali tais ma pakel le' muti' abas nalim-liim.”
(Tais ma pakel le' muti' abas nalim-liim naan, es le' Uisnenog Inin le' mo'et alekot.)
9 Nalalit ahake sonaf neno tunan naan natoon kau mnak, “Yohanis! Ho lo he mluul mmak, on ii:
‘Ale' kanan tuaf le' napeni haan honet ma hokat he nkoen on neem nok anbi Abibi-kase Ana' In fesek matsaos naan, sin of an'ua lekon namneo!’”
Lalit ahake naan anluut anteni in aguaban nane mnak, “Uisnenog In A'an ma Plenat le' iij, lo namneo!”e
10 Lalit au 'li'tuu he ubesan ahake naan. Mes in nakain kau mnak, “Naika mubesan kau on naan! Fun au Uisnenog In aan lelu' ma aan leka' amsa' on le' ho, ma ho aom-abjaan sin le' nabeno ma natoon lasij anmatoom nok Nai Yesus. Mafefa knino' le' natoon lasi manpaa' een, sin aal-ala sin naklila' ma natoon anmatoom nok Nai Yesus, he mansian naluli' ma nabesan noi Ne. Fun le' naan lomit na'ko Asmana Knino' on naa. Es on naan naik mubesan kau, mes mubesan moi Uisnenog anmees!”
Usif Yesus ankoen On neem ansae bijakase muti'
11 Lalit au u'aiti au matak, Ma au 'ail 'iit sonaf neno tunan natfai. Nok askeken ate, au 'ail 'iit bijakase muti' mese anpoi neem. Tuaf le' ansae bijakasel naan, kanan, “Tuaf le' Annaa' Lasi Manpaa'” ma “Tuaf le' Amneot ma Amnonot”. Tabug In nafeek lasij, lo nmatai. Kalu In annao nmakeen, In annao nok neek amneot.f 12 In matan anpinan on le' aij. In anpake tobe kesel, namfau. In kanan malula' et In aon, mes aal In kuun es le' nahine kanaf naan in oten.g 13 In bale-pakel sin, nakepa' sin anbin naa'. Atoni anteek Ee nak, “Uisnenog In A'an ma Plenat”. 14 Au 'ail 'iit amsa' solalus sin na'kon sonaf neno tunan ansaen bijakase muti' he natuin Ee. Sin anpaken bale-pakel ma'upa' le' muti' abas amsa'. 15 Anmu'i naan suni a'aikat mese', le' anbool na'ko In fefan. In anpake suni' naan, he nnao nmakeen anlaban ale' kanan uuf ma pah anbi pah-pinan. Lalit In niis naan sin. Es on naan In anjali Kesel noi sin. In naplenat nok feef maputu' ma 'niim maputu', lalit sin annaben niit Uisnenog akuasat In to'as. Naan paap mese on le' atoni antali hau fua anggur he naiti anggur oef.h
16 Anbi Atoni naan In bale-paken naan, ma In pusun, anmu'i lulat nak on ii:
Kesel ansae fafo ale' kanan kesel,
Anakaf ansae fafo ale' kanan anakaf.
Usif Yesus niis naan mu'i fuij apisut nok nani in solalus sin
17 Lalit au 'ail 'iit ahake neno tunan tuaf es anhake nbi manas. Ma in ankua' noi ale' kanan kolog amneku sisi punu' le' naplelen anbin nenog atnanan am nak, “Iim nai he hi aal-ala ki mibgua mbi balel iij nai, he mbukae mok ambi Uisnenog In fesek anaek! 18 Hi mipeni meinuan he meku ale' kanan amates een sin sisin: es le' kesel sin, meo-makenat sin, ma solalus sin. Hi mibe'i meku bijakasel sin ma solalus sin le' ansaen anbin bijakasel een naan sin sisin. Hi mibe'i meku sisij na'ko atel ai' ka atel fa, ai' anaet een sin sisin. Tapalan aguab ate tak, hi mibe'i meku mani sisin naan ok-oke'.”i
19 Lalit au 'ail 'iit mu'i fuij apisut le' anbi tabug naan, anpoi na'ko tasij naan. In annao ma nma'akolan nok ale' kanan kesel anbi pah-pinan, nok nani sin solalus sin. Lalit sin annaon ma anmakenan anlaban Atoni le' ansae bijakase muti' naan, ma In solalus sin na'kon sonaf neno tunan. 20 Mes Atoni le' ansae bijakase muti' naan, anheke naan mu'i fuij apisut naan ma in mafefa' le' aputa-kliun. Mafefa' naan es le' unu' anmo'e lasi mkakat ma sanmakat huma'-huma', he nputa-kliun tuaf-tuaf le' ansimo mu'i fuij apisut naan in malak ma le' nabesan nalalin noi in fatu malula'. Mes tabug iij, Atoni le' ansae bijakase muti' naan, annao npolin nani mu'i fuij apisut naan nok in mafefa', noi tasi ai fatu-foon le' anpiin piut-piut.j 21 Lalit Atoni le' ansae bijakase muti' naan, annao ma anlolo niis solalus abjaan sin, anpake In suni' le' anpoi na'ko In fefan. Lalit kolog le' amneku sisi punu' neman ma neku nani aof amates sin naan ok-oke'.