Uisnenog In ahake natu'in anmatoom nok koot Babel in amle'un
18
Lalit au 'ail 'iit ateni ahake tuaf es ansanu na'ko sonaf neno tunan. In anmu'i kuasat ma miu-sine' matani', tal antee miu-sine' naan antana' nani pah-pinan ok-oke'. 2 In anpake haan anaek he natoon am nak,“Natseel nalaal je! Koot Babel natseel nalaal je!
Anmofu nalaal je! Koot matani' naan anmofu nalaal je!
In anjali bale 'tua' noi nitu le'uf sin.
In anjali kua mnaa' noi ale' kanan nitu maufinut sin ok-oke'.
In anjali balel noi ale' kanan kolog le' neku sisi punu'. Kolon naan of nabguan anbin balel naan.
In anjali o'af noi ale' kanan kauna' ma mu'it le' ka naleko fa.a
3 In antiloot nalaal je, natuin ale' kanan uuf ma pah anbi pah-pinan,
nuu-mneem piut-piut ma ninun tua min-kase amafut.
In anmofu nalaal je, natuin ale' kanan uuf ma pah anbi pah-pinan,
nuu-mneem piut-piut ma nmakaken nok abiten koot naan.
Kesel sin na'kon ale' kanan negara,
neman ma nmakaken anbin balel naan.
atoni asosa' na'kon ale' koot-koot,
neman ma nasosa' een, tal antee sin anjalin amu'it.
Natuin koot naan, on le' bifeel le' anmaliin he nsosan ale' kanan bale' amasat ma ma'upa'.
Natuin koot naan, on le' bifeel aloket le' anmaliin noi ale' kanan lasi aminat.”b
4 Lalit au 'neen a'teni hanaf mese na'ko sonaf neno tunan am nak,
“Hoi! Ale' Au nuug ala ki!
Maen ampoi ma'ko balel nane nai!
Misaitan koot nane nai!
Naik ammo'e mituin abiten koot naan sin maufinuk een,
he naik mipeni sin lasi hukum amsa'.c
5 Natuin sin maufinun,
amfau-hutug ma ka maso'it fa.
Ma sin sanat ma penu sin,
napen-peni ok antee nenog atnanan.
Tabug iij, Uisnenog ka nniken anteni' fa,
sin laal maufinut ma amle'ut naan,
tabug iij, Uisnenog naloitan nalaal je,
he nhukum sin.d
6 Es on naan hi lo he mbalas sin mo'et amaufinut,
nahuum on le' sin anmo'e lasi maufinu noi tuaf abjaan.
Mes hi lo he mbalas sin,
amfani ha'el nuug.
Faijan unu', sin naloep ma namoe tuaf,
he ninun na'kon sin aklaa mnatu' le' nahenu nok tua min-kase hamu'it.
Mes tabug iij, sin kuuk es le' he ninun,
tua min-kase hamu'it naan, tal antee anfani ha'el nuug.e
7 Sin anmo'e sin tuak een matani'.
Sin naiti ma nalatan sin tuak een.
Sin aal anlomin he nmonin nok ale' kanan bale' amasat ma ma'upa'.
Sin anlomi haa ale' kanan lasi aminat.
Es on naan, sin lo he napenin susal ma mane'at mafena'.
Ma sin lo he anmonin anbin hamu'it ma mane'at.
Fun faijan unu', sin naguab een nanaeb ok, nahuum on le' bifee aloket le' naguab am nak,
‘Au le' ii, kesel bifeel!
Au of ka 'jali 'banu' fa!
Au of ka 'kae fa.
Au of ka 'pake fa tai kulut.’
8 Sin naguab een on naan, tal antee Uisnenog nato'an sin.
Tal antee Uisnenog he nhukum sin eeh.
Of anbi nenog mese aah,
sin of namnahan nmaten,
sin ankaen nme'-me'ul een,
ma sin anmate nkonon amsa'.
Tal antee tuaf naiti ma antokan sin noin aij.
Tal antee aij naan noutu sin aok amates sin naan tal namsoup.
Fun Uisnenog akuasat naan, es nasanut ma nfee hukum le' ii.
Ma Uisnenog amatanis naan, es le' nafeek lasij le' ii.f
9 Kesel een le' faijan unu', neman,
ma nmakaken nok abiten koot naan,
ma nmonin nok bale' amasat ma ma'upa' anbin naan.
Sin of nail nitan masu' le' ansae na'ko aij naan,
sin of nahinen nak koot naan anputu nmaat leh.
Lalit sin ankaen nme'-me'ul een noi ne.
10 Es on naan sin aok een anmahain, tabug sin nail hamu'it ma mane'at le' ansaen sin naan.
Mes sin aal nabe'in he anhaken anbin aloog.
Ma sin aal nabe'in he nakiso' aah na'kon balel naan.
Lalit sin naguab een am nak,
‘Koijoo! Kasian Babel!
Koijoo! Kasian koot matani'!
Aal lekug mese aah, mes ho mupeni hukum.
Aal tabug mese amsa', mes ho mumle'u mulaal je.’g
11 Anneen on nane, tuaf-tuaf le' faijan unu' neman he nasosa een anbin balel naan,
sin ankaen nme'-me'ul een amsa'.
Fun ka tiit tani fa tuaf es amsa',
le' he nsoos sin bale' een antein.h
12 Ka tiit fa tuaf he nsoos
sin bale' een le' anmo'e sin na'kon amnatu, noni muti',
fatu alimat, ai' mutiara.
Ka tiit fa tuaf he nsoos
sin tais een le' anteek sin ate nak tai lenan, tai sutal,
ai' tais ma'upa' le' in masan mee', ai' mtaas uki napaf.
Ka tiit fa tuaf he nsoos
sin bale' een le' anmo'e sin na'kon hau oef foo meni', gading malula',
ai' hau malula' abjaan sin.
Ka tiit fa tuaf he nsoos
sin bale' een le' anmo'e sin na'kon besi-me'e, besi, ai' fatu marmer.
13 Ka tiit fa tuaf he nsoos
sin hau aminat, ai' hau po'at aminat huma'-huma'.
Ka tiit fa tuaf he nsoos
sin hau oef foo meni', ai' miin foo bona' huma'-huma'.
Ka tiit fa tuaf he nsoos
sin tua min-kase, mina' na'ko hau saitun,
uu-tarigu, ai' ane-gandum.
Ka tiit fa tuaf he nsoos
sin bijae nuug, abibi-kasen, ai' bijakasel sin.
Ka tiit fa tuaf he nsoos
sin kaleta een,
ai' sin atel sin.i
14 Atoni asosat sin naan of antoof ok am nak,
‘Koi, Babel!
Koi, koot matani'!
Ho bale' amasat ma ma'upa' le' atoni anlomi nanes-nesib sin naan,
ka tiit atteni sin fa lee.
Sin aal-ala sin namnekun nalalin, tal antee sin nma'mu'in nmaten,
tal antee ho mtaiheel om mok naijaan.”
15 Faijan unun, atoni asosat sin naan anjalin atoni amu'it natuin koot naan on le' bifeel aloket.
Mes tabug iij, sin antoof ok ka natfeek niit fa.
Sin namtaun nmaten,
nail tuaf anbi koot naan sin hamu'it ma mane'at naan.
Sin aok een anmahain matani',
nail sin napenin hukum naan.
Mes sin aal nail aah na'ko loog.
Sin aal anbalani ma nhaken aah anbin balel naan.j
16 Lalit sin naguab een am nak,
‘Koijoo! Kasian Babel!
Koijoo! Kasian koot matani'!
Faijan unu', ho nuug anpaken pakel amasat le' masan mee' ai' mtaas uki napaf,
antenu ma anmo'el na'ko abas ma'upa'.
Faijan unu' ho nuug anpaakl ok neki amnatu', mutiara,
ma fatu alimat le' ma'upa' maten.
17 Mes anbi lekug mese aah,
ho bale' een naan, ka tiit atteni sin fa lee.
Aal labah aah,
ho mu'im sin naan, namnekun oke'!’
Nahunu msa' kaptein abnao oel sin nok sin ameput sin
annaon nuu-mneem noin koot naan.
Mes tabug iij, sin aal anbalani, kalu nasanut aah besi k'aif een anbin aloog.
Ma tabug iij, sin aal anbalani he naka-kiso' ahaa na'kon aloog.k
18 Sin nailan masu' le' anpoi na'ko aij naan.
Lalit sin nahinen am nak, in anputu nalaal je.
Es on naan sin antoof ok am nak,
‘Koijoo kasian! Of ka tiit atteni fa koot abjaan,
le' matani' nahuum on le' koot Babel.
Koijoo kasian! Of ka tiit atteni fa koot abjaan,
le' in masan huma' mese on le' Babel in masan.’l
19 Sin anbutin afu skuku' ma ntaon noin sin anaak een
natuin sin neek een ansusan.
Sin ankaen nme'-me'ul een,
natuin sin neek een namle'un.
Lalit sin naguab een am nak,
‘Koijoo! Kasian Babel!
Koijoo! Kasian koot matani'!
Hai mbalayar meki abnao oel misaeb bale' moi ko,
tal antee hai mjali atoni amu'it amsa'.
Hai mloi meki ho baut sin,
tal antee hai mipeni bale' ma'upa' ma amasat amsa'.
Mes aal anbi lekug mese aah,
ale' kanan bale' een naan, namnekun nalalin.
Aal labah aah,
ale' kanan bale' een naan, namle'un nalalin.’m
20 Lalit hanaf naan naguab anteni' mnak,
‘Hoi, hi abit sonaf neno tunan!
Hi neekm een naan, naik namenan nteni nai.
Hoi, Uisnenog In tuaf sin!
Hi neekm een naan naik ansusan anteni nai.
Hoi, Uisnenog In haef een!
Maut he hi mkumani nai.
Hoi, Uisnenog In mafefa knino' een!
Maut he hi neekm een anmalinan nai.
Faijan unu', Babel nasusab ki.
Faijan unu', koot naan anhamu'i ki.
Mes tabug iij, Uisnenog anbalas nalali hi hamu'it naan.
Fun tabug iij, In anbalas nalali koot naan in maufinun.’”n
21 Lalit au 'ail 'iit ahake neno tunan tuaf es, le' matani' namneo. In neem naiti naan kuun fatug afgua mese'. Fatug naan, anaen on le' tuaf es. Lalit in anpolin fatug naan an'ani tasij. In natoon amsa' am nak,
“Sin of nale'un niis koot Babel on le' nane msa'.
Sin of namnekub koot matani' naan on le' nane msa'.o
22 Ka tiit atteni fa tuaf,
le' ansapu ma ansii nbi koot naan.
Ka tiit atteni fa tuaf,
le' anneen niit aba'el sasando, asapu', fekug,
ma kniit sin hanak een anbi koot naan.
Ka tiit atteni fa atoni ahine mepug,
le' anmepun ntenin mese-mese anbin sin mepug.
Ka tiit atteni fa tuaf,
le' napau ma nmool anel antein anbi koot naan.p
23 Ka tiit atteni fa tuaf,
le' noutu ma napiin pakug antein anbi koot naan.
Ka tiit atteni fa tuaf,
le' anmo'en fesek matsaos antenin anbin balel naan.
Faijan unu' asosa' sin anbin koot naan,
anjalin atoni amu'it matani' nalaal je.
Faijan unu', Babel in atoni asosa' sin,
anmonin nok bale' amasat ma ma'upa' matani'.
Mes sin anpaken le'ug een,
he namoe tuaf-tuaf anbi pah-pinan.
Sin anpaken hau maat-nipug,
he nputa-kliun mansian anbin pah-pinan.q
24 Babel napeni hukum mafena' ee,
natuin in anlolo namate Uisnenog in mafefa knino' sin.
Koot matani' naan, namle'u nalaal je,
natuin in nhamu'i namate Uisnenog Inin piut-piut.
Anmu'i Uisnenog Inin le' anlolo niis sin anbin balel abjaan.
Mes Babel lo he nasae kuun in sanat ma penu sin ok-oke'.
Koot matani' naan, in lo he nsutai kuun in mo'et maufinug.”r