Uisnenog In ahake nanesab koot Babel nok bifeel aloket
17
Lalit tuaf es na'ko tuaf hiit ahake sonaf neno tunan le' anna'an bokol luman een, neem anpaumaak kau mnak, “Uum moi ii! Au he uklila' ko hukum 'oi bifeel aloket le' maufinu le'uf. Hukum naan na'ko Uisnenog. Bifeel le' naan es le' koot anaek le' sin na'fena npaumaak oel namfau.a 2 Faijan unun, kesel sin na'kon balel meel am meel, neman ma nmakaken nok abiten koot naan. Tuaf abjaan neman amsa', anmafun ma nata-tuin een ahaa koot naan in mahain ma in makaken.”b3 Lalit Uisnenog In Asmana Knino' antaman kau. Es on naan ahake sonaf neno tunan naiti neki kau 'oi bale luman mese'. Anbi balel naan, au 'iit bifeel mese antoko nbi mu'i fuij apisut mese', le' in masan mee' apinat. Mu'i fuij naan in anakan, hiit, ma in sunan een, bo'es. Anbi in aon malula', aguab le' nale'un ma na'akan Uisnenog.c 4 Bifeel naan anpake pakel ma'upa' le' masan mee' ma mtaas uki napaf. In bale pakel, anmo'e sin na'kon amnatu', fatu alimat le' ma'upa', ma mutiara. Anbi in animan ane'ug, in annaa' aklaa mnatu mese', le' nahenu nok tua min-kase. Tua min-kase naan, es le' in mahain ma in makaken ma ale' kanan lasi maufinut ma lasi mesi'okan abjaan le' in anmo'e sin.d 5 Anbi in ilan, malula' kanaf mese', le' in oten, manifa' fe'. Lulat naan nak on ii:
Au le' iij, Babel!
Es le' koot matani' le'uf!
Ale' kanan lasi maufinut anbi pah-pinan iij,
na'uun ma naba'an anbi kau.
Ale' kanan amakaket anbin pah-pinan iij,
sin amneemk een na'ko kau.
6 Lalit au 'ail, bifeel naan anmafu naek, natuin in ninu nalali Uisnenog Inin sin naa' een. In oten nak, in anlolo niis Uisnenog Inin, natuin sin an'etu ma natoon lasi anmatoom nok Nai Yesus piut-piut.
Au 'ail 'iit on nane ate, au feefk ee namkaak ma 'sanmaak.
7 Mes ahake naan antoti kau mnak, “Nansaa' am es ho mumkaak on le' naan? Ampaumaak uum, he au utoon ko bifee amaufinut naan in oten. On nane msa', anmatoom nok mu'i fuij apisut le' in ansae ntook gwe naa. Es le' manakaf hiit ma masuna' bo'es naan. 8 Fe' nahunut, mu'i fuij apisut naan anmoni nbi pah-pinan, mes tabug ii, in ka tiit ee fa lee. Mes ka loog fa nteni te, in anpoi na'ko abola' hamu'it le' ka nmu'i fa tu'as. Tabug naan, anmu'i tuaf le' anmonin anbin pah-pinan, le' sin kaank een ka malula' fa nbi Abibi-kase Ana' In Sulat. Sulat le' naan, es le' Uisnenog anluul nanij tabug In ka nmo'e ma npakae pah-pinan iij ee fa fe'. Tuaf een le' naan, of feefk een noga mkakan tabug sin nail niit mu'i fuij apisut naan, natuin in anfani neem. Ma kalu in anfani neem nalalit, Uisnenog of anpolin napoitan an'ani ai fatu-foon le' anpiin nabal-baal.e
9 Atoni ahinet namneo nabe'i nahine le' lasi pisa' ii. Mu'i fuij apisut le' anakan hitu naan, in oten, es le' nu'af hiit. Bifeel aloket naan antoko et anu'af hitu een le' naan. Ma naka' hitu een le' naan, in oten, es le', kesel hiit. 10 Na'ko kesel hitu een le' naan, tuaf niim anmate nalalin. Tuaf es naplenat tabug ii. Es anteni' ka nbool fa fe'. Mes kalu in neem nalalit, in aal annaa' aplenat labah aah. 11 Tabug iij, au utoon ko lasij anmatoom nok mu'i fuij apisut le' fe' unun ate, anmoni naan, mes tabug iij anmate nalaal je. Nahunut, in anjali kesel amsa' anbi pukan kesel tuaf hitu een naan. Mes in of anfani neem ma annaa' aplenat he anjali kesel le' nomol faan. In of namle'u nkono msa'.
12 Sunaf bo'es le' naan in oten, es le' kesel bo'es. Sin ka nna'an aplenat fa fe'. Sin of ansimon kuasat he nna'an aplenat nabguan nok mu'i fuij apisut naan, mes aal labah aah.f g 13 Natuin sin al-ala sin anma'akolan he natlakab sin kuasat naan noi mu'i fuij apisut naan. 14 Kesel een le' naan, sin of anmakenan anlaban Abibi-kase Ana' naan. Mes Abibi-kase Ana' naan Inin, of niis nani sin ok-oke'. Tuaf-tuaf le' natuin Abibi-kase Ana' naan, es le' tuaf-tuaf le' In anpili ma nbeti, ma no'en naan sin, le' sin nalan ma natuin Ee. Sin of nisan, natuin Abibi-kase Ana' naan matani' le'uf. Aal In kuun, Kesel ansae fafo kesel, ma 'Nakaf ansae fafo 'nakaf.
15 Ma oe mfaun le' anpaumaak bifeel aloket naan, es le' ale' kanan uuf ma pah, negara, ma aguab anbi pah-pinan. 16 Kesel bo'es naan ma mu'i fuij apisut naan, of ka nlomi nani fa bifee pasu mafaut le' ka nmu'i fa lasi mael. Sin of nasiik naan kuuk in pakel ma bale een ok-oke', lalit annao nasaitan tabug in ao-monas anbi balel naan. Lalit sin neku in sisij. In aon le' in sisin nesif naan, sin antokan nataam noi aij. 17 Uisnenog In kuun es le' anmo'e, tal antee kesel bo'es le' naan anma'akolan, he nnona' sin kuasat noi mu'i fuij apisut naan, tal antee in natutu' niis bifeel naan. Nok lalan naan, Uisnenog In salit of anjalin ok-oke'.
18 Es on naan bifeel aloket le' ho mail miit ee naan, es le' koot matani' le'uf naan, le' naplenat ale' kanan kesel anbi pah-pinan.”