Uisnenog In to'as nat'opab noi pah-pinan
16
Lalit au 'neen hanaf matani' mese anpoi na'ko Ume Onen, he naplenat ahake tuaf hitu naan am nak, “Amnao nai! Maiti meki bokol een naan, ma am'opan mani Uisnenog In to'as moi pah-pinan.”2 Anneen on nane, ahake ahunut an'opan bokol in nesan noi pah-pinan. Nok askeken ate, tuaf-tuaf le' ansimo niit mu'i fuij apisut naan in malak, ma tuaf-tuaf le' naluli' ma nabesan noi in fatu mahuma', napenin amle'ut. Meen paap le'uf antoman sin. Paap le'uf naan menan, he noi nmaten.a
3 Lalit ahake nomol nuug ee an'opan bokol in nesan noi tasij. Nok askeken ate, oe tasij anjali naa' le' foo punu le'uf, nahuum on le' amates in naa'. Es on naan ale' kanan amonit anbi tasij, anmaten oke'.
4 Lalit ahake nomol tenu ee an'opan bokol in nesan noi noel ma oe maat een. Es on naan sin ok-oke' anjalin naa'.b 5 Lalit au 'neen ahake tuaf es na'ko sonaf neno tunan, le' an'ulus ale' kanan oel anbi pah-pinan. In anpules ma liatas Uisnenog am nak,
“Koi, Uisnenog!
Ho knino' teeb!
Ho ka mmu'i miit fa sanat!
Ho mbi mani ma'ko un-unu',
ma Ho of mubaal tal antee nabal-baal.
Ho mufeek mulali lasij, lo namnees.
Ho mfee mulali hukum, lo teeb.
6 Tuaf abjaan nasaib nalali,
naa' na'ko Ho nuug.
Tuaf abjaan anlolo namate,
Ho mafefa knino' sin.
Es on naan, Ho museke' sin, he sin ninun naa'.
Es on naan Ho mbalas mulali meki lasi hukum ate, lo namneo.”
7 Lalit au 'neen hanaf mese anpoi na'ko me'i fuat, le' natael am nak,
“Namneo! Uisnenog es le' akuaas matani'.
Namneo! Uisnenog es le' matani' nneis-neis.
Uisnenog es le' nafeek lasij, lo natai.
Uisnenog es le' anfee hukum ate, lo teeb.”
8 Lalit ahake nomol haa' ee n'opan bokol in nesan noi manas. Nok askeken ate, manas naan maputu' le'uf, tal antee mansian anputun. 9 Ale' mansian le' aputus een naan, ansekun ma na'akan Uisnenog In kanan, natuin In es le' anleek he nsonu' sin amle'ut naan. Maski on nane msa', ka tiit tani fa tuaf es le' na'piis ma nate'un in nekan noi Uisnenog, ai' anpules noi Ne.
10 Lalit ahake nomol niim ee an'opan bokol in nesan anbi mu'i fuij apisut in atoko' plenat. Nok askeken ate, mesi'okan an'amu naan ale' tuaf le' nabesan noi ne, tal antee sin ansau sin nisik een, he sin nabe'i nalan een na'kon hamu'it naan.c 11 Sin ansekun ma na'akan Uisnenog et sonaf neno tunan amsa', natuin sin paap een naan, meenk een kah. Maski on nane msa', ka tiit tani fa tuaf es, le' napiis ma nate'un in nekan, he natuin Uisnenog.
12 Lalit ahake nomol nee' ee an'opan bokol in nesan noi noe naek Efrat. Ma noel naan anmeitin meto'-meto' naan. Lalit sin anmo'en lalan anbi balel naan. Lalan naan, naloitan ee noi kesel sin ma solalus sin na'kon pesit neno-saet.d 13 Ma au 'iit nitu maufinu tuaf teen. Sin on le' abe'og. Es anpoi na'ko kaun naga in fefan. Es anpoi na'ko mu'i fuij apisut in fefan. Es anteni' anpoi na'ko kaun naga in mafefa' le' aputa-kliun in fefan. 14 Nitu maufinut tenu een naan, anmu'in kuasat he nmo'en lasi sanmakat huma'-huma'. Sin anpoin ma nnaon nateef nok ale' kanan kesel anbi pah-pinan, lalit sin nahakeb sin lasi manpaa' anbi tabug es, sin anmakenan anlaban Uisnenog akuasat. Mes tabug le' sin anmanpaa' een naan, es le' Uisnenog In tabug le' In nbeti nalaal je, he niis nani In musun sin ok-oke'.
15-16 Balel le' sin he nabguan he nmakenan naan, anbi aguab Ibrani nak, Armagedon.
Yesus Kristus naguab amsa' am nak, “Mimnau milek-leko'! Nok askeken ate, Au 'uum on le' abakat le' hi ka mitenab maan fa. Tuaf-tuaf le' anbe'-be'an ma anpaon anpake pakel le' namtiis, sin es le' n'ua lekon. Fun tabug Au 'uum, in ka namaeb on fa, natuin tuaf ka niit fa noi in ao monas.”e
17 Lalit ahake nomol hitu' ee an'opan bokol in nesan noi anin. Ma Uisnenog naguab neki haan anaek na'ko In atoko' plenat, et Ume Onen am nak, “Oke' eeh! Au to'as sin n'oetenen eeh!”
18 Nalalit anmu'i limat le' naliim nuu-mneem, ma 'lotos le' naloot nuu-mneem amsa'. Ma naijaan ee nabeko' matani'. Naijaan abeko' iij ka njali niit fa fe' anbi pah-pinan.f 19 Tabug naan, Uisnenog ka nniken fa koot Babel in maufinun. In anpake naijaan abeko' matani' naan, tal antee koot naan anpee' anjali batis teen. In anmo'e on naan he abiten Babel annaben nahine In to'as. Koot abjaan anbi pah-pinan natseel oke'.g 20 Tabug naan, ale' kanan pulug sin anleem on ahaa le' naan. Ma nu'af sin, namnekun oke'.h 21 Anmu'i uul sen-senel amsa' le' anaek-anaek anmofun na'kon nenog atnanan, ma ntutu naan mansian. Sen-senel naan sin mafeenk een, anteen kilog bo' haa.i Natuin uul sen-senel naan anhamu'i sin, es on naan mansian ansekun ma na'akan Uisnenog.j