Ahake tuaf hiit na'kon sonaf neno tunan nekin amle'ut naek huma' hiit noi pah-pinan
15
Lalit au 'iit mo'et huumf es anbi nenog atnanan, tal antee au feefk ee noga mkakan. Anmu'i ahake tuaf hiit na'kon sonaf neno tunan, es-es ate annaa' kuasat he nfee amle'ut anaek noi pah-pinan. Amle'ut hitu een naan, es le' amle'ut amsoput. Kalu sin anjalin ok-oke' een, in oten nak, Uisnenog In nekan an'oe teenl ee, tal antee In ka natoo' anteni fa lee noi mansian.2 Lalit au 'iit tasij anpiin on le' nino le' maselo' nok aij. Au 'iit too mfaun anhaken anbin tasij ninen. Sin le' naan, tuaf-tuaf le' ka natuin fa mu'i fuij apisut naan, ka nabesan fa noi in fatu mahuma', ma ka nsimo fa in malak. Sin aal-ala sin anna'an asapu' on le' sasando le' sin ansimo sin na'kon Uisnenog. 3 Lalit sin ansiin siit mese na'kon nai Musa, Uisnenog In aan lelu ma aan leka' faijan unun. Tuaf een le' naan amsa' ansiin siit mese', le' anpules Nai Yesus. Natuin faijan unun, atoni anlolo niis Ne, nahuum on le' anlolo bibi-kase ana' anbi Uisnenog In Ume Onen he n'oeteneb In nekan. Sin ala sin ansiin am nak,a
“Hai mpules ma mbo'is Uisnenog!
Hai minaeb ma milatan In kanan!
Natuin In kuasan, lo matani'.
Ma In matanin, lo ansanmakab kit.
Uisnenog annaa' aplenat noi ale' kanan uuf ma pah anbi pah-pinan.
Uisnenog anjali Kesel noi ale' kanan uuf ma kanaf anbi pah-pinan.
Uisnenog In amo'en, lo matani'!
Uisnenog In mepug ma pakaet, lo naleko nmaat!
Uisnenog In lalan, lo namneo ma namnoon!
Uisnenog In amonin, lo namneo-namneo namnoon!b
4 Ale' kanan mansian nanaeb ma nalatan Uisnenog In kanan,
ale' kanan mansian anpules ma nbo'is Uisnenog In alekon.
Natuin aal Uisnenog kuun es aknino'.
Ala In kuun es le' ka nmu'i fa sanat ma penu.
Ale' kanan pah of naluli' ma nabesan noi Ne.
Ale' kanan uuf of neman ntotin makasi noi Ne.
Natuin ale' kanan mansian niit nalalin Uisnenog In amo'en alekot.
Ma ale' kanan mansian nahinen nalalin Uisnenog In nekan amneot.”c
5 Tabug asiit een ansiin nalalin, au 'iit Ke'an Aknino' anneis-neis anbi Uisnenog In Ume Onen et sonaf neno tunan, ma in tai anini' masoitan.d 6 Lalit au 'iit ahake tuaf hiit sin le' nekin amle'ut hitu naan. Sin anpoin na'kon Uisnenog In Ume Onen. Sin anpaken tais le' naliim muti' abas, ma nasaen beti mnatu'. 7 Ma au 'iit amsa' mu'it mese na'ko mu'i abe'it haa' een naan le' anfuun naan Uisnenog In atoko' plenat naan, annona' bokol amnatu' hiit noi ahake tua hitu een naan. Bokol hitu een naan es-es ate matua' nok Uisnenog In hukum. In kuun es nabal-baal. In nabalab nalali he nasanut In to'as noi pah-pinan. 8 Ka loog fa te, Ume Onen naan nahenu nok masu' le' anpoi na'ko Uisnenog In kuasan ma In pina' ma klaha'. Ka tiit tani fa tuaf es, le' nabe'i ntaam noi balel naan. Ahake tuaf hitu een le' naan, lo he nasanut amle'ut hitu een naan noin pah-pinan, he na' tuaf-tuaf nabe'i antaman noin naan.e