Abibi-kase Ana' nok Inin, tuaf nifun natun es am bo' haa mhaa' (144.000)
14
Lalit au u'aiti au humak. Nok askeken ate, au 'iit Abibi-kase Ana' mese anhake nbi nu'af ana' mese'. Nu'af ana' naan, kanan, Sion. In anhake nok tuaf nifun natun es am bo' haa mhaa'. Anbi sin iilk een ok-oke', malula' kanaf na'ko Abibi-kase Ana' naan ma In Amaf.a 2 Lalit au 'neen hanaf mese na'ko sonaf neno tunan. In hanan naan aslutun on le' oe bonij, ma matani' on le' 'lotos. Mes hanaf naan in lekon kah, nahuum on le' tuaf namfau ansapun asapu'. 3 Ma au 'iit tuaf nifun natun es am bo' haa mhaa' naan, anhaken ma nbaisenun an'anin Uisnenog, ma sin nok mu'i abe'it le'uf haa' le' anfuun naan Uisnenog In atoko' plenat naan, ma amnasit tuaf bo' nuug am haa' sin naan. Too mfaun sin ansiin sii fe'ug mese'. Ala sin anmese nahine kuuk siit naan, mes tuaf abjaan, kahaf. Fun sin le' iij, es le' naleko nfanin nok Uisnenog, natuin Usi' anpake In Aanh ee In naa' he nsoi naan sin. 4 Sin amonik een knino' een, nahuum on le' atoni munif le' ka ntuup niit fa fe' nok bifeel. Sin nata-tuin een ahaa Abibi-kase Ana' naan tabug In nnao noi meel am meel aah. Fun Uisnenog anbaen nalali sin anpake In Aanh ee In naa', he sin anjalin Inin. Es on nane, sin aal-ala sin nahuum on le' fua' unu' na'ko etus ma lelel, le' nekij nataam anjali afgua'-tulu' noi Uisnenog ma nok Abibi-kase Ana' naan. 5 Sin ka naguab een fa nputa-kliun amsa', natuin sin neek een knino' een.bAhake sonaf neno tunan tuaf teen nekin benog
6 Lalit au 'iit ateni Uisnenog In ahake mese na'ko sonaf neno tunan. In napleel nalat-laat anbi nenog atnanan, he nanenab ma nanaob Uisnenog In Tu'in Alekot le' nabal-baal. In napleel anfuun am nateef, natoon noi ale' kanan mansian anbi pah-pinan, na'ko ale' kanan uuf ma pah, aguab, ma kanaf. 7 In ankua' naheel-heel am nak,
“Hi lo he mholmaat Uisnenog!
Hi lo he mi'aiti milat-latan In kanan le' mapina'-maklaha'!
Natuin In tabug ee anteel ee,
he Uisnenog anpalekas ale' kanan mansian een sin amo'ek een.
Pules-bo'is moi Uisnenog!
Maiti milat-latan In kanan!
Natuin In es anmo'e ma npakae neno tunan ma pah-pinan.
Ma In es le' naplenat he tasij ma oe mata' anjalin ok-oke'.”
8 Naguab nalali on nane, au 'iit ahake es anteni' neem na'ko sonaf neno tunan, neem natuin ee. In natoon am nak, “In namle'u nalaal je! Koot Babel le' matani' naan, namle'u nalaal je! Koot le' maufinu naan, anmofu ntee naijaan ee leh. Faijan unu', koot naan on le' bifee amahait le' naseke' ale' kanan uuf ma pah anbi pah-pinan le' iij, he natuin in amo'e mapaisa. Mes tabug iij, koot naan annaben nalali Uisnenog In to'as!”c
9 Lalit au 'iit ahake sonaf neno tunan tuaf es anteni', le' neem natuin ahake nomel nuug naan. In ankua' naheel-heel am nak, “Ampaant om, oo! Ale' kanan mansian le' nabesan noi mu'i fuij apisut ma in fatu mahuma', ai' ansimo in malak anbi ilan ai' animan, sin of ansimo Uisnenog In to'as amsa'! 10 Uisnenog of nato'an sin, nahuum on le' In na'inut sin tua miin menu' in oe ahunut. In of anpolin nani sin noin ai fatu-foon le' anpiin nabal-baal. In ahake sonaf neno tunan sin, nok Abibi-kase Ana' naan nitan noi lasij nane msa'.d 11 Taguab paal ate, ale' kanan mansian le' nabesan noi mu'i fuij apisut naan ma in fatu mahuma', ai' ansimo in malak, sin of napenin hamu'it on le' naan tal nabal-baal. Masu' na'ko sin hamu'it naan ansae faij-manas nabal-baal.”e
12-13 Es on naan ale' kanan lasin naan, sin salit nak, Uisnenog In tuaf-tuaf sin lo he nnenan nalek-leko' In A'an ma Plenat, anpalsain piut-piut noin Nai Yesus, ma naik anteet-kotin.
Lalit au 'neen hanaf mese na'ko nenog atnanan natoon kau mnak, “Yohanis! Ho lo he mluul mak on ii: anmulai tabug iij, tabug apalsait een noi Usif Yesus anmaten, sin napenin lasi mnisat.”
Ma Uisnenog In Asmana Knino' natael ee mnak, “Namneo! Sin of nisan namneo! Natuin sin napenin hamu'it huma'-huma' anbin pah-pinan, mes sin nalan namneo-namneo he natuin Uisnenog piut-piut. Es on naan Uisnenog of anbalas sin haet een, ma sin of ka nmonin fa nbin lasi hamu'it antenin anbin sonaf neno tunan.”
Uisnenog In hukum anbi pah-pinan, on le' atpake besi sabit he taflali anel
14 Lalit au u'aiti' au humak. Nok askeken ate, au 'iit nopel abgua es muti' naliim, ma tuaf es antoko nbi nopel naan. Tuaf naan, on le' Mansian Namneo-Namneo. In anpake tobe' mnisat na'ko mnatu', ma annaa' besi sabit mese le' na'aik.f
15 Lalit au 'iit ateni' ahake sonaf neno tunan tuaf es anpoi na'ko Uisnenog In Ume Onen. In ankua' natoon noi tuaf atokos anbi nopel nane mnak, “Ampake besi sabit naan he mlali nai! Fun in tabug he nabguab pah-pinan in nesan sin anteel ee.”g 16 Lalit Tuaf le' antoko nbi nopel naan, annaa' besi sabit he nlali, ma nabguab naan pah-pinan in nesan sin.
17 Anmu'i naan ahake tuaf es anteni' npoi neem na'ko Ume Onen sonaf neno tunan. In nnaa' besi sabit mese he nlefi hau fgua.
18 Lalit anmu'i ahake tuaf es anpoi na'ko balel le' noutu hau oef foo meni' anbi Ume Onen sonaf neno tunan. Ahake le' iij in mepug, es le' anpao aij anbi bale mnoutu hau oef foo meni' naan. In ankua' ma nlelu anaa' besi sabit naan am nak, “Ampake besi sabit naan, he mnao msiu hau fgua anbi pah-pinan nai! Fun anbi balel naan, hau anggur sin fuak een namnatun nalalin.” 19 Lalit annaa' besi sabit naan anlapi an'ani pah-pinan he nlefi hau fgua anggur sin kiik een. Ma in naiti nataam hau fua anggur sin noin bak le' he naitin anggur oef. Lalit sin antaam anhalin anggur fuaf een naan. Anhali anggur fuaf anbi bak naan, es le' Uisnenog In to'as. 20 Bak naan, et koot in kotin. Tabug sin antali anggur ee fuak een, naa' ee nsai na-naek. Naa' naan ansai on le' noel mese', le' kalu t'ukul, amnanun kilog natun teen, ma in amnanun ntaman, metel mese ma stena'.h i