Mu'i fuij apisut le' anpoi na'ko tasij
13
Lalit au 'iit mu'i fuij apisut mese anpoi na'ko tasij. In anakan, 'nakaf hiit, ma in sunan sin nono' bo'es. In anpake tobe kesel anbi in sunan sin mese-mese. Anbi in anaak een naan malula' aguab le' nale'uf ma na'palan Uisnenog.a 2 In aon, on le' kaun meog. In haen een, on le' mu'i fuij anaek mese le' anteek nak, beruang. Ma in fefan, on le' singa in fefan. Kaun naga naan natlakab in hak noi mu'i fuij apisut naan, he ntoko nbi toko plenat, ma anpake nani in kuasat sin ok-oke'.b 3 Anbi mu'i fuij apisut naan in anakan es, anmu'i fakel anaek mese', on le' an'ote niit tal antee he noi anmaat, mes kahaf. Ale' kanan mansian anbi pah-pinan ansanmakan noin mu'i fuij apisut naan, lalit sin natuin ee. 4 Lalit sin anholmaat kaun naga naan, ma naiti nalat-latan on le' Uisnenog, natuin kauna' naan anfee kuasat noi mu'i fuij apisut naan. Mansian sin anbo'is mu'i fuij apisut naan nak, “In le' naan matani' le'uf! Ka tiit tani fa es he niis!”5 Uisnenog ankolen mu'i fuij apisut naan he naguab lasi naeba' ma naguab na'akan Uisnenog. In napeni meinuan he naplenat, tal funan bo' haa' mnuug (es le' toon tenu ma stena'). 6 Es on nane, in na'akan Uisnenog. Ma in na'akan Uisnenog Inin amsa', le' etan sonaf neno tunan.c 7 Uisnenog anfee ne meinuan amsa', he in anlaban Uisnenog Inin. In napeni kuasat amsa' he naplenat na'ko ale' kanan uuf ma pah, negara, ma aguab een anbin pah-pinan.d 8 Natuin lasij naan, ale' kanan mansian anbi pah-pinan nabesan noi mu'i fuij apisut naan. Sin le' naan, es le' tuaf-tuaf le' sin kaank een ka malula' fa anbi Abibi-kase Ana' In Sulat naan. Faijan unu', tuaf-tuaf anlolo niis Abibi-kase Ana' naan, mes Uisnenog namonib nafani' Ee. Tabug Uisnenog ka nmo'e fa pah-pinan iij fa fe', In anluul nalali ale' kanan apalsait een sin kaank een nak, sin ala sin le' naan, of napenin 'monit le' amneot ma amnonot, le' ka natfeek fa.e
9 “Amneen milek-leko'!
10 Kalu Uisnenog nafeek nalali nak, anmu'i tuaf le' lo he nheke naan ee,
of anheke naan ee.
Kalu Uisnenog nafeek nalali nak, anmu'i tuaf le' lo he napeni lolot neki suni',
of anlolog neki suni'.”
Es on naan Uisnenog Inin, naik amteet-koot. Naan anjali tabug meinuan he malan ma mituin piut ma mpalsai piut-piut moi Ne!f
Mu'i fuij apisut le' anpoi na'ko pah-pinan
11 Lalit au 'iit mu'i fuij apisut mese anteni', anpoi na'ko pah-pinan. In sunan sin nono' nuug, on le' abibi-kasel in sunan. In hanan on le' kaun naga in hanan. 12 In anjali mafefa' noi in anakaf, es le' mu'i fuij apisut ahunut le' faijan unu' an'otel ma he noi nmaat. In ansimo kuasat na'ko in anakaf naan, he naseke' ale' kanan mansian pah-pinan he nabesan noin in anakaf. 13 In anmo'e lasi sanmakat matani' amsa', tal antee in nabe'i nasanut aij na'ko nenog atnanan, anbi mansian een sin humak ma sin maatk een. 14 Nok lalan naan, mu'i fuij apisut nomol nuug naan, anpake in anakaf in kuasan he nputa-kliun mansian abiten pah-pinan. In naplenat mansian sin amsa', he nahakeb fatu mahuma', on le' in anakaf ee human, he sin anholmaat. In anakaf naan, es le' faijan unu' an'otel ma he noi anmaat. 15 Uisnenog ankolen mu'i aputa-kliun nane msa', he anfee snasaf noi fatu mahuma' naan. Es on nane te, fatu mahuma' naan nabe'i naguab ma anfee plenat he nlolo niis tuaf-tuaf le' ka nabesan fa noi ne.
16 Mu'i fui aputa-kliun naan, naseke' ale' kanan mansian he ansimo in malak anbi sin animak ane'ug, ai' anbi sin iilk een. Ale' kanan mansian, abaut-anaet, amu'it-amamu'it, atel ai' ka atel fa ntein, sin al-alasin lo he ansimo malak naan. 17 Kalu ka on nane fa te, sin ka nabe'i fa he nasosa' een, ai' ansosan saa'-saa'. Anbi malak naan, malula' mu'i fuij apisut ahunut naan in kanan, ma in nomel.
18 Anbi le' iij, atpaluu he tpake lolef! Atoni ahinet, nabe'i nahine nomel naan in oten. Nomel naan es le' anlulu ma anleek naan mansian tuaf es, es le' “666”.g