Kaun naga anmakeen anlaban bifeel nok in anah
12
Lalit nok askeken, au 'iit ataka' matani' mese anbool anbi nenog atnanan, le' mansian ka naniit ee fa fe': anmu'i naan bifeel mese le' in aon ma'amu anpake manas. In napeni' in haen anbi funan. In anpake tobe kesel le' anmu'i maklafu' bo'es am nuug. 2 In na'apu', in ankae, fun in he nahoon je.3 Nok askeken ate, au 'iit a'teni' taka' matani' mese anbool anbi nenog atnanan. Anmu'i naan kaun naga mee' mese anaek le'uf. In anakan hiit, ma in sunan sin bo'es. In anpake tobe kesel hiit anbi in anaak een.a 4 In anpake in ikon ma nsapu nani maklafu' puukn es anbi nenog atnanan. Anesit aal pukan nuug aah. Lalit in anpolin nani maklafu' een naan an'ani pah-pinan. Ma in nnao noi bifeel naan, he npa-pao tabug bifeel naan nahoni'. Fun in he n'olo naan ana mee' naan.b 5 Lalit bifeel naan nahoni naan Li'aan mone mese'. Mes Uisnenog In ahake tuaf es neem ma nasiik naan Li'ana' naan, ma nekij Ee noi Uisnenog, he Li'ana' naan naplenat nabgua nok Uisnenog anbi sonaf neno tunan. Fun Li'ana' naan of naplenat ale' kanan uuf ma pah anbi pah-pinan anpake kuasat matani'.c 6 Mes bifeel naan naen noi bale luman mese', le' Uisnenog naloitan nanij noi ne. Sin of an'ulus bifeel naan anbi balel naan tal antee nenog nifun mese natun nuug am bo' nee (es le' toon tenu ma stena').
Nai Mikael anmakeen anlaban kaun naga anbi sonaf neno tunan
7 Lalit anmu'i makenat anaek anbi sonaf neno tunan. Uisnenog In solalus een sin meo-makenat, es le' nai Mikael, anmakenan anlaban kaun naga nok in ababat sin.d 8 Nai Mikael sin niis naan kaun naga sin. Lalit sin antaal sin he naik natguan anbin sonaf neno tunan antein. 9 Es on nane, sin naiti npolin sin na'kon sonaf neno tunan noin pah-pinan. Kaun naga naan, es le' nitun sin kesel, le' sin anteek nak, ‘Iblis’. Na'ko un-unu' in es le' anputa-kliun mansian he anmo'en sanat ma penu.e 10 Lalit au 'neen ateni' hanaf matani' mese na'ko sonaf neno tunan nak,
“Faijan unun, kaun naga naan anhake piut anbi Uisnenog In human ma In matan.
In le' naan, amneki hana ktuta' sanat noi hit aok-abjaan apalsait een.
In nasaeb sanat noi sin faij-manas.
Mes tabug iij, anpolin napoitn ee leeh na'ko sonaf neno tunan.
Es on naan tabug iij, ale' saa'-saa' namtiis je.
Fun tabug iij, in etin anteel ee he Uisnenog ansoi nafetin mansian.
Tabug iij Uisnenog annaa' aplenat neki In kuasat matani'.
Ma In nasaeb nalali Kristus,
es le' Tuaf le' In anpili ma anbetij Ee anjali Kesel noi ale' kanan uuf ma pah.f
11 Hit aok-abjaan apalsait een niis nani kaun naga naan, le' faijan unu' nasaeb sanat noi sin,
natuin Abibi-kase Ana' naan In naa' nat'oop he annose nani sin sanat ma penu sin.
Sin niis ee msa',
natuin sin balani he n'etun ma natonan noi tuaf anmatoom nok Abibi-kase Ana' In nekan alekot noi sin.
Maski tuaf natoo' he nlolo niis sin amsa',
sin ka ntet-kotin fa.
12 Es on naan ale' kanan amonit et sonaf neno tunan, lo he nmalinan!
Mes ale' kanan amonit et pah-pinan lo he mpanat,
natuin amle'ut he nsaen ki jee.
Nitu nakaf, ansanu netin ki.
In natoo' anaek,
natuin in nahine nak, in tabug he nmo'e lasi maufinu naan, he namsoup gwe!”
Kaun naga nami bifeel naan anbi pah-pinan
13 Tabug kaun naga naan nahiinl on nak, naiti npolin eel eeh anbi pah-pinan on nane, in annao nami bifeel le' nahoni Li'ana' naan he nasusab. 14 Mes sin anfeen bifeel naan ninef nuug, nahuum on le' kolo garuda in ninen. Nok lalan naan, in napeni meinuan he napleel ma nami bale luman le' naloog na'ko kaun naga naan. Anbi balel naan, sin an'ulus tal antee toon tenu ma stena'.g 15 Nail niit on nane, kaun naga naan anpulan oel nahuum on le' noel nahenu', he nloi neki bifeel naan. 16 Mes pah-pinan anbaban bifeel naan neki mo'et mese'. Mo'et naan es le', naijaan ee natfai lalit an'olo naan noel mahenu' le' anpulan anpoi na'ko kaun naga naan. Nok lalan naan, noel mahenu' naan ka nteen fa bifeel naan. 17 Lalit kaun naga naan natoo' matani' noi bifeel naan. Es on naan in anpoi na'ko in balan ma annao nmakeen anlaban bifeel naan in anah abjaan sin, es le' tuaf-tuaf le' anmonin natuin Uisnenog In A'an ma Plenat, ma nmanaku nak sin le' naan, Nai Yesus Inin. 18 Lalit kaun naga naan annao nhake nbi tasij ninen, ma neku nisin.