Uisnenog In mafefa knino' tuaf nuug, le' matani' een
11
Lalit sin annona' kau hau letis nono mese', le' amnanun nehel mese'. Ma Uisnenog naplenat kau mnak, “Yohanis, amfeen nai he mnao mleti' Au Ume Onen Uuf nok in me'i fuat et koot Yerusalem. Ma mso'i ale' tuaf-tuaf le' sin aal-ala sin an'onen een anbin balel naan.a 2 Mes naik amleti' Ume Onen naan in kintal, natuin balel naan manona' nalaal je noi uuf ma pah abjaan le' ka nahine Kau fa. Sin of antali hae ma nhainisi Au koot naan, tal antee funan bo' haa-mnuug (es le' nenog nifun mese natun nuug am bo' nee—1.260)b 3 Au of a'leek ma 'lulu tuaf nuug 'oi balel naan he sin anjalin Au mafefa knino' een. Sin of anpaken tai kulut, lalit an'etu ma natoon lasi manpaa' na'ko Kau, tal antee nenog nifun mese natun nuug am bo' nee naan namsopun.”4 Uisnenog In mafefa knino' nai Sakarias anluul nalali na'ko faijan unu' anmatoom nok mafefa knino' tua nuug een ii. In anpake aguab nak, anmu'i hau saitun uu' nuug nok bale belak paku le' nbaisenun an'ani Uisnenog, es le' mansian pah-pinan sin Anakaf.c 5 Kalu nmu'i tuaf le' anlomi he natfunab Uisnenog In mafefa knino' een iij, of anmu'i aij anpoi na'ko sin feefk een ma noutu naklati sin musun sin ok-oke'. Nok lalan naan, ale' tuaf le' he nhamu'i sin, lo tebes anmaten. 6 Tabug sin nua sin anjalin Uisnenog In mafefa knino' een anbi pah-pinan, In anfeen sin kuasat he an'eka' ulan. In anfee kuasat amsa' he nmo'e oe maat een anjalin naa', ma kuasat he neki lasi hamu'it huma'-huma' anbi pah-pinan, natuin sin lomik een kuuk.d
7 Kalu sin tabug he natoon Uisnenog In lasi manpaa' naan namsoup, of mu'i fui apisut mese anpoi na'ko abola' hamu'it le' ka nmu'i fa tu'as naan. In of anmakeen nok tua nua' een naan, tal antee in niis naan sin, ma namate sin.e 8-9 Nok lalan naan, sin nua sin anmaten anbin koot anaek le' faijan ahunut, tuaf abjaan sin anlolo niis sin Usi' anbi hau nehe. Koot naan, anjali nalali koot maufinu on le' Sodom ma Masir faijan unu'. Lalit sin of anpolin napoitan mafefa knino' een naan sin aok amates sin naan anbin lalan, tal antee nenog tenu ma stena'. Lalit mansian na'ko ale' kanan uuf ma pah, ma aguab, ma negara, neman ma nail tua nua amates een naan. Sin ka nfeen fa meinuan he ansuub sin amsa',f 10 natuin sin anmalinan he nail kuuk tua nua amates een naan. Fun sin nua sin es le' nok-noki mansian pah-pinan sin tenab. Es on naan sin aal-ala sin anmo'en fesek, ma anmasonu' een hadiah es nok es.
11 Mes nenog tenu ma stena' naan namsoup, of Uisnenog anfee snasaf noi sin, he sin anmoni nfanin. Lalit ale' kanan mansian le' niit sin on nane, na'taa'j een met-meet gwah.g 12 Lalit mafefa knino nua' een naan of annenan hanaf matani' mese na'ko nenog, le' anleek sin am nak, “Hoi! Hi nua ki msae iim nai!” Ma sin nua sin na'aiti ok ansaen noi nenog ma nopel an'amu naan sin. Nail nitan on nane, sin musun sin namkakan.h 13 Nok askeken ate, naijaan ee nabeko' matani'. Kalu hit tso'i umel anbin koot naan, na'ko umel bo'es, ume mese antiloot. Ma anmu'i tuaf nifun hiit anmaten. Tuaf abjaan le' ka nmaten fa, namtaun nmaten. Mes sin of anholmaat Uisnenog, natuin In es le' annaa' aplenat anbi sonaf neno tunan.i
14 Nok lalan naan, amle'ut nomol nuug namsoup gwe. Mes ampaant om, oo! Atfunan nomol tenu he neem eeh.
Anpuu' akniit nomol hiit — Uisnenog ma Yesus Kristus anna'an aplenat anbin pah-pinan
15 Lalit Uisnenog In ahake na'ko sonaf neno tunan nomol hitu anpuu' in akniit. Nok askeken ate, au 'neen alotos neman na'kon sonaf neno tunan am nak,
“Tabug iij, anaa' aplenat anbi pah-pinan,
alahaa Uisnenog ma Yesus Kristus,
es le' Tuaf le' Uisnenog anpili ma nbeti Je na'ko faijan unu'.
Uisnenog of annaa' aplenat piut-piut on le' Kesel, tal antee nabal-baal.”j
16 Amnasit tuaf bo' nuug am haa le' antokon anbin atoko' plenat een anbi Uisnenog In human ma In matan naan, sin nnenan hanaf een nane msa'. Lalit sin anli'tuun, ma naiti nalatan Uisnenog, 17 neki siit pules-bo'is am nak,
“Koi, Uisnenog!
Hai Usi'!
ma hai Ama' Uisnenog!
Ho es le' muplenat ale' saa'-saa'.
Ho es le' amkuaas ale' saa'-saa'.
Ho es le' na'ko un-unu', ambi mani naa.
Ho es le' tabug etin iij ambi naan amsa'.
Hai mtoti makasi moi Ko, Aam,
natuin Ho mpake Ho kuasam le' matani',
he mnaa' aplenat ambi pah-pinan.
18 Mes uuf ma pah sin namaunun,
natuin sin ka nlomin fa he natuin Ko, Aam.
Mes tabug iij, Ho mutoo' amsa',
natuin sin ka nlomin fa he nahine Ko.
Tabug iij in etin anteel ee,
he Usi' amhukum tuaf-tuaf le' ka nlomi he nloe natuin Ko fa, Aam.
Tabug iij in etin anteel ee,
he Usi' mule'un miis tuaf-tuaf le' nale'un niis tuaf abjaan sin.
Tabug iij in etin anteel ee,
he Usi' ampalekas amates een sin lasi sanat ma penu sin, Aam.
Tabug iij in etin anteel ee,
he Usi' ambalas Uisnenog In ameput een sin haet.
Es le' Ho mafefa knino' sin,
ma Ho nuug,
abaut-anaet, mnasif-munif.
Usi' ambalas moi sin ala sin,
le' anholmaat Ho kaanm aan, Aam.”k
19 Lalit au 'iit a'bi sonaf neno tunan, Usi' In Ume Onen In nesug nasoitn on. Ma au 'iit petij le' faijan unu' sin nabelak Uisnenog In aplenat een le' malula' anbi fatug. Limat sin naliman ma anmakenan nuu-mneem, naijaan ee nabeko', ma 'uul sen-senel mafena' anmofun na'kon nenog atnanan.l