Ahake neno tunan nok suul manunu' aan' es
10
Lalit au 'iit Uisnenog In ahake tuaf es le' matani', ansanu na'ko sonaf neno tunan. In aon an'amu naan ee nok nopel. Anmu'i enus le' anfuun naan in anakan. In human naliim on le' manas, ma in haen anpiin on le' aij. 2 In nnaa' suul manunu' aan' es, le' natfai nalaal je. In haen ane'ug nahakeb anbi tasij, ma haen aliij anbi naijaa meto'. 3 Lalit in anhunun naheel-heel, nahuum on le' singa in hanan. In anhunun nalali on nane, alotos een anluut ee nfani ha'el hiit. 4 Tabug alotos sin natae nalalin ate, au he 'luul sin aguab een. Mes au 'neen hanaf mese na'ko sonaf neno tunan nak, “Hae! Ho naika mutoon moi tuaf, alotos hitu sin aguab een naan, oo! Naik amluul saa'-saa'.”5 Lalit ahake le' anhake nok haen panij anbi tasij ma panij anbi naijaa meto' naan, naiti in animan ane'ug noi nenog, 6 ma ansuup am nak, “Au guabak le' iij, lo namneo! Au 'suup apake Uisnenog In kanan, natuin In kuun nabal-baal! In kuun es amo'et ma apakaet neno tunan ma pah-pinan, nok nani in afan ma in nesan. Es on naan amneen milek-leko'! Tabug etin le' hit atpa-paog ee naan, anpaumaak eeh. 7 Fun kalu Uisnenog In ahake nomol hitu he npuu' in akniit, of Uisnenog anmo'e natuin in salit un-unu', le' mansian ka nahinel ee fa fe'. Mes salit naan, In natoon ee noi In mafefa knino' sin le' antuthael Ee. Es on naan amneen milek-leko', fun saa' le' au uguab ee, lo namneo!”a
8 Lalit hanaf le' au 'neen na'ko nenog ee tnanan naan, naguab anteni nok kau mnak, “Yohanis, amnao nai moi ahake neno tunan le' anhake neki in haen es et tasij, ma es et naijaa meto'. Amsimo suul manunu' aan'-ana' le' anfai nalalij leh et in animan.”
9 Lalit au 'nao 'oi le' ahake naan, he 'toti suul aan'-ana' naan. Ma in natoon kau mnak, “Maiti ma mbukae nai! Anbi ho fefam aan, anminoni on le' oni haug, mes in of anmo'e ho taim aan annaben menu'.”
10 Naguab nalali on nane, au 'simo suul aan'-ana' naan, ma au 'ekug. Anbi au fefak, au 'naben ate anminoni on le' oni haug. Mes tabug au 'olog, au 'naben menu' anbi au taik.b
11 Lalit anmu'i hanaf anleek kau mnak, “Ho lo he mfani mteni' he mutoon mani saa' le' Uisnenog he nmo'el anbi pah-pinan. Mutoon anmatoom saa' le' of he anjali anbi ale' kanan kesel pah-pinan, ma mansian na'ko ale' kanan uuf ma pah, ma ale' kanan aguab.”