Anpuu' akniit nomol niim — ale' afokog anhamu'i mansian
9
Lalit ahake nomol nima' ee anpuu in akniit. Ma au 'iit maklafu' mese anmofu n'ani pah-pinan. Sin anfee afo'ij mese noi maklafu' naan he in nasoitan nesug nuat le' ka nmu'i fa tu'af. Balel naan nahenu nok hamu'it ma mane'at. 2 In nasoitan nuat naan in nesug, lalit masu metan anpoi on le' nasij anpuut. Masu' naan ansae abgua-abgua, tal antee nenog ma manas anmesi'ook.a 3 Lalit anmu'i afokog amfau-hutug naplelen npoin na'kon masu' naan, ma ansanun an'alin pah-pinan. Uisnenog anfeen sin kuasat on le' kalitij.b 4 Mes In naplenat sin he naik an'eet nale'un ma'ug, haug ma senat abjaan sin. Mes sin lo he nhamu'i mansian sin le' ka nmu'in fa malak Uisnenog anbi sin ilak een.c 5 Uisnenog ankolen afokog sin naan, he nhamu'i tuaf sin naan tal antee funan niim, mes naika namate sin. Aal namenab ahaa sin on le' kalitij ansau. 6 Anbi funan niim in nanan le' naan, of mansian napenin hamu'it matani antein, tal antee sin antotin he nmaten aah. Maski on nane msa', sin ka nmaten fa.d7 Au 'iit afokog sin naan nahuum on le' bijakasel le' anpake sin anbin makenat. Sin anpaken atobe' noni mnatu' le' anmo'el noi anaak makenat. Sin huumk een on le' mansian.e 8 Sin anaak funu een amnanun een on le' bifeel. Ma sin nisik een na'aik on le' singa in nisin.f 9 Nahuum on le' sin anpake soo-balu besij anbi sin a'baask een, on le' ika' in a'po'an. Sin ninek een naslutu' anaek on le' solalus batalion mese sin bijakasel een anheel neki kaleta makenat.g 10 Sin ikok een matani' le'uf ma nmu'i lasog on le' kalitij in lasog. Sin napenin kuasat he nhamu'i mansian sin anpake sin lasog naan, tal antee funan niim. 11 Kesel na'ko afokog sin naan, es le' kesel na'ko ahake le' anli'u napoitan sin na'kon abola' hamu'it le' ka nmu'i fa tu'as. In kanan anbi aguab Ibrani, Abadon, ma anbi aguab Yunani, Apolion. In oten nak, “tuaf le' nale'un”.
12 Nok lalan naan, amle'ut ahunut naan, ankono nalaal je. Mes ampaant om, oo! Fun anmu'i nteni' amle'ut huma' nuug le' he ntaman.
Anpuu' akniit nomol nee' — lasi hamu'it huma' teen anbi pah-pinan
13 Lalit ahake nomol nee' anpuu' in akniit. Au 'iit me'i mnatu' naan, le' sin anpakel he noutun hau oef foo meni', le' na'ailab an'ani Uisnenog. Anmu'i hanaf anpoi na'ko me'ij naan in sunan sin haa' sin.h 14 Hanaf naan natoon noi ahake le' fe' anpuu' nalali in akniit nane mnak, “Anmu'i ahake tuaf haa' le' mafutu' aloog een etan noel anaek mese', kanan, noel Efrat. Amnao mufetin sin nai!” 15 Es on naan in nnao nafetin sin, he sin annao nlolo namate mansian le' nateef nok in toon, in funan, in nenog, ma in etin ma tabug le' Uisnenog nafeek nalali sin. Kalu hit tbatis mansian sin ok-oke' anbin pah-pinan iij anjali batis teen, amates sin naan, batis es. 16 Sin natonan noi kau mnak, ahake een sin solalus sin le' ansaen bijakase makenat naan, tuaf hotun natun nuug. 17 Lalit au 'iit solalus sin nok sin bijakasel sin. Solalus sin naan anpaken soo-balug le' anpafa' naan sin a'baask een masaf teen, es le' mee' apinat, mate-muti' alimat, ma molo' on le' fatu-foon. Bijakasel een naan sin anaak een on le' singa in anakan. Anmu'i msa' aij, masu' ma fatu-foon le' anpulan anpoi na'ko bijakasel een sin feefk een, 18 he neki lasi hamu'it huma' teen. Lasi ha'mui't een le' anpoin na'kon bijakasel een sin feefk een naan, namate batis mese na'ko batis teen mansian amonit pah-pinan. 19 Lalit bijakasel een naan annaon ma nhamu'i mansian sin, anpake sin feefk een ma sin ikok een. Anbi sin ikok een naan, anmu'i nakaf on le' kauna in anakan.
20 Mes fe' anmu'i mansian anbi pah-pinan iij le' ka namate sin fa na'ko amle'ut sin naan. Maski on nane msa', mes sin ka nlomin fa he nasaitan sin mo'et maufinuk een. Sin nabesan noi nitun piut-piut, ma nabesan noi bale' een le' anmo'e sin na'kon mnatu', noni muti', besi mee', fatug ma haug. Maski bale' een naan ka nabe'i nitan fa, ka nabe'i nnenan fa, ma ka nabe'i nnaon fa, mes sin nabesan noi sin piut-piut!i 21 Sin ka nlomin fa msa' he nasnasab sin sanat-penu abjaan sin, nahuum on le' namate atonij, anpake malog, nabaak, ma nmakaken nok tuaf le' ka sin monek een fa, ai' ka sin feek een fa.