Aletu' nomol hiit — Uisnenog In ahake sin ansimo naan akniit hiit
8
Lalit Abibi-kase Ana' naan anfai letu' nomol hitu ee. Nok askeken ate, abiten sonaf neno tunan namek-meka'. Ka tiit tani fa mese he naguab, tal antee nati' menit bo' teen. 2 Lalit au 'iit ahake tuaf hiit na'kon sonaf neno tunan le' anhaken piut-piut anbin Uisnenog In human ma In matan, le' sin naloitan sin tuak een he antuthael Ee. Sin ala sin tuaf mese-mese ansimon akniit.3 Lalit ahake tuaf es anteni' na'ko sonaf neno tunan annao nhake nbi me'ij mese in matan. Me'ij le' iij sin anpakel he noutun hau oef le' foo meni'. In annaa' apiik-obu' noni mnatu' es, le' bijaas sin anpakel he ntaon hau oef foo meni' naan. Lalit sin anfee ne hau oef foo meni' na-naek, he in anselog nok onen totis na'ko Uisnenog Inin. Lalit in neki apiik-obu' naan, nahuum on le' fua'-tulu' le' anfoo mein, ma nabelak ee nbi me'i noni mnatu' naan, anbi toko plenat naan in matan.a 4 Lalit in noutu hau oef foo meni' naan. Ma in foo menin naan ansae noi Uisnenog In human ma In matan, ansae nabgua nok ale' onen totis sin na'kon Uisnenog Inin.
5 Lalit ahake naan naiti aij na'ko me'ij naan, ma antao nahenu anbi apiik-obu' noni naan. Ma in anpolin apiik-obu' naan n'ani pah-pinan. Nok askeken ate, au 'iit limat, le' naliim a'liij-a'ne'ug anbi pah-pinan. Ma anmu'i alotos le' naloot ma naslutu' na-naek. Lotos naan ka nasnaas niit fa. Ma naijaan ee nabeko'.b
6 Lalit ahake tuaf hiit na'kon sonaf neno tunan naan, sin naloitn een he anpuu' kniit.
Anpuu' kniit ahunut — ale' kanan haug ma senat anputun
7 Tabug ahake nomol ahunut anpuu' in akniit, anmu'i uul sen-senel ma aij le' maselo' nok naa', nat'oop an'ani pah-pinan. Ale' kanan ma'u mate' anputun nmaten et meel am meel. Kalu hit tbati pah-pinan batis teen, aputus naan batis mese'. Kalu hit atbati ale' kanan haug ma senat sin pah-pinan anjali batis teen, aputus een naan, batis mese'.c
Anpuu' kniit nomol nuug — Ale' kanan amonit anbi tasij anmaten
8 Tabug ahake nomol nua anpuu' in akniit, anmu'i naan balel mese nahuum on le' nu'af anaek mese anpulan aij, anpolin on antaam noi tasij, tal antee batis es na'ko batis teen tasij naan anjali naa'. 9 Lalit batis mese na'ko batis teen na'kon ale' kanan amonit anbin tasij, anmaten oke'. Ma batis mese na'ko batis tenu noi ale' kanan abnao oel anbin tasij, namle'un oke'.
Akniit nomol teen — oel ee namenun
10-11 Tabug ahake nomol teen anpuu' in akniit, anmu'i naan maklafu' anaek mese anmofu na'ko nenog, nahuum on le' nopo' naek mese le' anpiin. Maklafu' le' naan, kanan, ‘Menu'’. Tabug in anmouf, oel anbi noel ma oe mata' sin anjalin menu'. Lalit amninu oe nuug namfau le' anmaten. Kalu hit atbatis ale' noel ma oe mata' anbi pah-pinan anjali batis teen, le' anjali amenut es le' batis es.d
Akniit nomol haa' — manas, funan ma maklafu' anmesi'okan
12 Lalit ahake nomol haa' anpuu' in Akniit. Nok askeken manas, funan, ma maklafu' een sin napenin tepos. Es on naan sin anmesi'okan. Nateef tabug manas, batis es na'ko batis teen tabug manas naan, anjali mesi'okan, natuin manas naan ka ntaha namneo ntein fa. Ma tabug faij, batis es na'ko batis teen tabug faij naan anjali mesi'okan namneo-namneo, natuin funan ma maklafu' een sin ka ntaha nteni fa.e
13 Lalit au u'aiti' au matak ate, au 'iit kool garuda mese napleel nalat-laat anbi nenog. In anlisin ma naguab am nak, “Ampaant om, oo! Amle'ut anaek of antoman ale' mansian amonit anbi pah-pinan. Fun anmu'i ahake tuaf tenu fe' etan sonaf neno tunan, le' ka npuu' sin akniit een fa fe'.”