Uisnenog antao malak noi tuaf nifun natun mese am bo' haa mhaa (144.000)
7
Lalit au 'iit Uisnenog In ahake tuaf haa' na'kon sonaf neno tunan anhaken anbin pah-pinan he n'eka' anin. Es anbi pesit neno-saet, es anbi pesit neno-tees, es anbi pesit aliij, ma es anteni' anbi pesit ane'ug. Lalit anin ka nfuu fa nbi pah meto' ma oe tasij, ma hau nuug.a 2 Uisnenog anfee kuasat noi sin he nale'un pah ma tasij. Lalit au 'iit ahake mese na'ko sonaf neno tunan, neem na'ko pesit neno-saet. In neki bale' mamalak mese na'ko Uisnenog abal-balat. Lalit in ankua' am natoon noi tua haa' een naan am nak, 3 “Naika fe'! Naika mile'un pah, ai' tasij, ai' hau nuug. Ampao he hai mtao malak ambi Uisnenog In aan lelu' ma aan leka' sin ilak een naan fe'.”b4 Lalit sin natoon noi kau mnak, ahake naan anmalak naan Uisnenog Inin. Tuaf een naan, sin nifun natun mese am bo' haa mhaa (144.000), le' na'kon uuf Israel. Sin ala sin es le':
5 na'ko uuf nai Yahuda, tuaf nifun bo'es am nuug (12.000);
uuf nai Ruben, tuaf nifun bo'es am nuug;
uuf nai Gat, tuaf nifun bo'es am nuug;
6 uuf nai Aser, tuaf nifun bo'es am nuug;
uuf nai Naftali, tuaf nifun bo'es am nuug;
uuf nai Manase, tuaf nifun bo'es am nuug;
7 uuf nai Simeon, tuaf nifun bo'es am nuug;
uuf nai Lewi, tuaf nifun bo'es am nuug;
uuf nai Isakar, tuaf nifun bo'es am nuug;
8 uuf nai Sebulon, tuaf nifun bo'es am nuug;
uuf nai Yusuf, tuaf nifun bo'es am nuug;
uuf nai Benyamin, tuaf nifun bo'es am nuug.
Too neek aknino' sin anpules ma nbo'is Uisnenog ma Abibi-kase Ana'
9 Lalit au 'iit mansian sin amfau-hutug, tal antee ka ube'i 'so'i 'aan sin fa ok-oke'. Sin neman na'ko ale' pah-pah, uuf-uuf, kanaf-kanaf, ma aguab-aguab anbin pah-pinan. Sin ala sin nabguan ma nbaisenun noin atoko' plenat ma Abibi-kase Ana' naan. Sin anpaken soo-balu muti' mnanu' ma anna'an pet noo'. 10 Lalit sin anpules ma nbo'is nabguan am nak,
“Hai mpules ma mbo'is hai Uisnenog,
le' antuun On anbi atoko plenat ii.
Hai minaeb milatan nalat-laat Abibi-kase Ana' ii msa'!
Sin le' iij, es le' ansoi nafetin kit, ma anfee kit sako sanat ma 'honis.
Sin le' iij, es le' nasoitan laal a'honis noi kit.”
11 Naguab een nalalin on nane, Uisnenog In ahake na'ko sonaf neno tunan le' nhaken anfuun naan toko plenat naan, anli'tuun ma naluli' een anteen naijaan, ma nbaisenu toko plenat naan. Amnasit bo' nuug am haa' le' anbin naan, ma mu'i abe'it haa' een nane msa', anmo'en on naan. Sin ala sin naluli' een ma nabesan noin Uisnenog, 12 ma sin ansiin am nak,
“Tebes namneo!
Hai mpules ma mbo'is Uisnenog amsa'!
Hai minaeb ma milatan Uisnenog In kanan amsa'!
Uisnenog In lolen ma tenab, lo ka nsaan niit fa.
Uisnenog In kuasan, lo anaek le'uf.
Uisnenog In matanin, lo matani' le'uf.
Hai mtoti makasi moi Uisnenog piut-piut.
Hai mfee holmaat noi Uisnenog ka natfeek niit fa.
Tebes namneo!”
13 Sin anpules ma nbo'is nalalin on nane, tuaf es na'ko amnasit bo' nuug am haa naan antoti' kau mnak, “Too mfaun sin le' anpaken soo-balu muti' een iij, ho muhine sin aa, oo? Sin ala sin le' iij, na'kon mee?”
14 Mes au utae m'ak, “Kahaf. Au ka uhine sin fa. Ho es muhine sin.”
Es on naan in natoon kau mnak, “Sin le' naan, tuaf-tuaf le' napenin fetin na'ko susat am mane'at anaek.
Sin le' naan, tuaf-tuaf le' anpake nalali Abibi-kase Ana' naan In naa',
he nboe ma nfase sin pakel,
ma naknino' sin soo-balun.c
15 Natuin lasij naan, sin anhaken anbin Uisnenog In atoko' plenat in matan.
Sin antuthael Ee faij-manas anbi In Ume Onen.
Uisnenog nok sin piut-piut.
Uisnenog anpafa' ma npanat sin piut-piut.
16 Sin of ka nnaben niit fa lasi amnahas antein.
Sin of ka nnaben niit fa lasi meno oel antein.
Sin of ka nnaben niit fa manas in maputun antein.
Sin pasuk een of ka natho'an antein fa.d
17 Abibi-kase Ana' le' anpaumaak nok atoko' plenat naan,
In of es le' anjali sin atukus.
In of es le' anpoo' neki sin,
ma na'inut sin anbin oe mata' le' neki 'honis.
Uisnenog of es annose nani sin susat,
henati' sin naik ankaen antenin.”e