3 Lalit Abibi-kase Ana' naan anfai materai nomol nuug. Ma au 'neen mu'i abe'it nomol nuug naan, naplenat am nak, “Amnao nai!” 4 Lalit bijakase mee' mapina' mese anpoi neem. Tuaf le' ansae bijakasel naan ansimo suni naek mese'. Sin anfee ne kuasat he nmo'e taisibug anbi pah-pinan, maut he mansian sin anmalolon niis ok es nok es.^b

5 Lalit Abibi-kase Ana' naan anfai materai nomol teen. Ma au 'neen mu'i abe'it nomol teen naplenat am nak, “Amnao nai!” Nok askeken ate, au 'iit bijakase metan mese'. Tuaf le' ansae nbi bijakasel naan, annaa' besi ta'ij anbi in animan, he ntai mnahat le' anmulai nkulan.^c 6 Lalit au 'neen nahuum on le' hanaf mese neem na'ko mu'i haa' abe'it een naan sin atnaank een. Hanaf naan natoon am nak, “Tabug amnahas matani' of antaman pah-pinan. Kalu msimo nenog mese in sebat, aal amsoos maan amnees mok teen gwah; ai' amnees le' alekot te, mok mese aah. Mes kalu amnahas naan antee leh, mansian sin naik an'ote nale'un nani hau saitun ma hau anggur sin anbi po'an sin.”^d

7 Lalit Abibi-kase Ana' naan anfai materai nomol haa'. Ma au 'neen mu'i abe'it nomol haa' naplenat am nak, “Amnao nai!” 8 Nok askeken ate, au 'iit bijakasel mese masan molo-muti'. Tuaf asae bijakasel naan, kanan, ‘Amaten’. Anmu'i tuaf es natuin anbi in kotin, kanan, ‘Balel noi amates sin’. Lalit sin nua sin napenin kuasat he annao nlolo namate mansian sin anbin pah-pinan, anpake suni', tabug amnahas, menas, ma npake mu'i fuij apisut. Kalu tso'i amates sin ok-oke' te, sin amfauk een on le' batis mese na'ko batis haa', mansian pah-pinan iij ok-oke'.^e

9 Lalit Abibi-kase Ana' naan anfai materai nomol niim. Ma au 'iit tuaf een le' nahunut, anlolo niis sin. Sin asmaank een anbin me'i fuat in nupun. Atoni nlolo sin, natuin sin anpalsain noi Uisnenog, ma sin natoon Uisnenog In A'an ma Plenat anbin meel am meel. 10 Sin ansakanan am nak, “Koi Uisnenog! Usi' le' matani le'uf! Usi' le' knino le'uf! Saa' le' Usi' Ho muguab, hai mpalsai. Mes hai he mpao mtee leka' antein, he na' Ho mufeek lasij anmatoom nok tuaf-tuaf le' anlolo namate kai, he sin napenin hukum?”

11 Sin antoti nalalin on nane, sin napenin soo-balu muti' mnanu', tuaf es ate, napeni mese'. Anmu'i tuaf natoon noi sin am nak, “Ampao mteni' kle'og, tal antee hi mimtiis. Natuin anmu'i hi aom-abjaan sin le' of anmaten, natuin anlolo niis sin on le' hi.”

12 Lalit Abibi-kase Ana' naan anfai materai nomol nee'. Nok askeken ate, au 'iit nainunus matani le'uf. Ma manas anmesi'ook on le' tai metan, ma funan masan mee' on le' naa'.^f 13 Maklafu' een nenog atnanan anbamofun, on le' hau fua mate' een le' anmofun na'kon haug ee tunan tabug 'ani naek ee anfuu namofu sin. 14 Ma au 'iit nenog anpee' pisa' nuug, lalit annuun gon on le' anahek tal antee namneek. Ma anu'af sin ma pulug sin nabeko' een oke', tal antee sin namnekun ok-oke' na'ko sin balak een.^g 15 Niit on nane, mansian pah-pinan, anmulai na'ko kesel sin, anaa' aplenat sin, anaak solalus, atoni amu'it, tal antee atel, sin ala sin namtaun. Lalit sin naenan ma nakolo een anbin nuat een, fatu 'nu'af sin sikak een.^h 16 Sin nlelu 'nu'af sin ma fatu naek sin am nak, “Amkuub maan kai nai! Mikolo' kai he Atokos abit atoko' plenat, naika niit anteni kai. Ma Abibi-kase Ana' ka nabe'i nhukum kai fa.ⁱ 17 Koi! Hai mipeni amle'ut natuin neno susat ma mane'at neem een! Uisnenog nok Abibi-kase Ana' naan he n'opan kai sin to'as. Mes ka tiit fa es he nabe'i nbelok ma naskotun!”^j