Anmu'i suul manunu' es le' malite' neki materai
5
Lalit au 'ail a'teni' 'oi Atonij le' antoko nbi toko plenat naan. In annaa' suul manunu' mese anbi In animan ane'ug. Sulat naan, malula' koti-mmaat. Sin anlite' niis sulat naan anbi balel hiit.a2 Lalit au 'iit ahake es na'ko sonaf neno tunan, le' matani le'uf. In antoti neki haan matani' am nak, “Sekog es le' anmu'i hak he nfai sulat naan in materai, ma ntae sulat naan in nesan?” 3 In antoti on naan, mes sin ka napeni fa tuaf es amsa' le' anmu'i hak he nfai sulat naan ma ntae in nesan. Anbi sonaf neno tunan, ai' anbi pah-pinan, ka tiit fa tuaf es amsa' le' anmu'i hak. Abiten amates een sin bale maten amsa', ka nmu'if. 4 'Ail on nane, au 'kae 'se'-se'ul, natuin ka tiit fa tuaf es amsa' le' anmu'i hak, he nabe'i anfai sulat naan ma ntae in nesan. 5 Lalit tuaf es na'ko amnasit bo' nuug am haa' een naan, naguab noi kau mnak, “Hoi, ba'e! Naik amkae. Fun kesel nai Daut in sufan es matani' le'uf, sin anteek nak, ‘Singa na'ko uuf nai Yahuda’. In npesek naklati' ale' amle'ut sin ok-oke'. Es on naan In le' naan anmu'i hak he nabe'i nfai matarai na'ko sulat naan, ma ntae in nesan.”b
6 Au 'neen on nane, au 'iit Abibi-kase Ana' mese anhake nbi mu'i haa' abe'it een naan sin atnaank een, ma amnasit bo' nuug am haa' een le' antokon anfuun naan toko plenat naan. Abibi-kase Ana' naan, on le' anlolo niit Ee le. In sunan mana' hiit, ma In maatn een afgua' hiit. In matan afgua hitu een naan, nahuum on le' In Asmanan le' mamasaf hiit, le' In anleek nalali sin antaman noin pah-pinan tuuk am tuuk.c 7 Lalit au 'iit Abibi-kase Ana' naan annao noi Atonij le' antoko et atoko' plenat, ma naiti suul manunu' naan, na'ko Atoni naan In animan ane'ug.
8 Tabug Abibi-kase Ana' naan naitij, mu'i haa' een le' abe'it een naan, nok amnasit bo' nuug am haa', anli'tuun ma nabesan anbi In human ma In matan. Sin ala sin mese-mese anna'an bale musiik on le' aleku sasando, ma apiik-obu' noni mnatu' mese', le' matua' nok kemenyaan le' sin noutug he anfoo menin. Kemenyaan foo meni' naan, es le' ale' onen een na'kon Uisnenog Inin.d 9 Lalit sin ala sin ansiin siit fe'ug mese', am nak:
“Abibi-kase Ana' iij kuun, es le' pantas he nsimo suul manunu' naan.
Abibi-kase Ana' iij kuun, es le' anmu'i hak he nfai sulat naan in materai.
Fun In malolo een.
Lalit Uisnenog anpake In naa' asait naan,
he ansoi nafetin naan mansian sin na'kon ale' kanan pah ma uuf,
maut he sin abjaan nabe'i anjalin Uisnenog Inin.
Nok lalan naan, mansian na'ko ale' kanan aguab ma pah,
nabe'i anjalin Uisnenog In nonot sin.e
10 Abibi-kase Ana' le' iij, nabguab sin ala sin,
anjalin uuf ma pah mese'.
Abibi-kase Ana' le' iij, anpili ma nbeti nalali sin,
he anjalin Uisnenog In tuaf ameput sin.
Sin of anna'an aplenat anbin pah-pinan ii.
Sin of anmepun ma ntuthaen noin Uisnenog anbin pah-pinan ii.”f
11 Lalit au u'aiti matak, ma au 'neen hanaf anaek mese'. Ma au 'ail mu'i haa' abe'it een naan, ma amnasit tuaf bo' nuug am haa', anmasaat on antenin nok Uisnenog In ahake sin le' namfa-faun na'kon sonaf neno tunan. Ameput sin naan sin amfauk een anteen hotun-hotun.g 12 Sin ala sin ansiin nok haan anaek am nak,
“Hai minaeb milatan Abibi-kase Ana' le' malolo maten naan,
natuin In lo es ansimo ma antopu hai pules ma bo'is sin!
In kuasan kuun, lo anaek le'uf.
In amu'in kuun, lo namfau le'uf.
In lolen ma tenab, lo ka nsaan niit fa.
In matanin kuun, lo matani le'uf.
Hai minaeb milatan In kanan.
Hai miluli' ma mholmaat Ee.
Hai mpules ma mbo'is Ee.”
13 Lalit au 'neen siit mese antein. Na'ko ale' kanan amonit, et sonaf neno tunan, et nenog, et pah-pinan, ma tasij nanan, sin ala sin ansiin nabgua. Na'ko balel noi amates sin amsa', sin ala sin ansiin nokan. Sin ala sin ansiin nabgua am nak,
“Hai mpules ma mbo'is Uisnenog le' antoko ma ntuun On es atoko' plenat ii.
Hai minaeb ma maiti milatan Abibi-kase Ana' iij amsa'.
Hai misaeb lasi holmaat noi Sin.
Hai miluli' ma mibees noi Sin.
Natuin Sin es le' anna'an aplenat nabal-baal!
Ma Sin kuasan sin ka natfeek niit fa!”
14 Lalit mu'i haa' abe'it een naan, nataen piut-piut am nak, “Namneo, namneo on le' naan!” Ma amnasit tuaf bo' nuug am haa' een naan, sin anli'tuun ma nabesan noin Uisnenog ma noin Abibi-kase Ana' naan.