Usif Yesus anfee haan manpaa' noi jema'at anbi koot Sardis
3
Nalalit Mansian Namneo-Namneo naan, anluut anteni In hanan am nak, “Yohanis, tabug iij ho lo he mluul sulat abjaan anteni, le' in hanan, on ii:‘Noi jema'at abiten koot Sardis:
Sulat le' iij, na'ko Au, Nai Yesus Kau. Uisnenog In Asmanan, et Au. Asmanaf naan, masaf hiit. Au es le' a'naa' maklafu' hiit anbin Au nimak. Amneen Au guabak le' ii.
Au 'iit ulali hi mo'em ambi Sardis. Anmu'i tuaf le' nak, hi mmoni namneo-namneo mituin Au lomik. Fun kaah, hi on le' ka mmu'i fa monit. 2 Es on naan amfeen nai! Amha'tani hi palsait le' he noi namneku naan. Fun Au 'palekas ulali saa' le' hi mmo'el naan, mes ka tiit fa mese amsa' le' maso'it anbi Uisnenog In human ma In matan. 3 Es on naan naik amniken anoni' amneot een le' hi mneen ma msimo milali sin na'ko faijan unu'. Mituin namneo-namneo Uisnenog In lomin, ma misaitan hi sanat sin he mbelok amfaan ma mituin Uisnenog. Kalu hi ka miskeke fa he mmo'e mituin on nane, nok askeken ate, of Au 'uum on le' abakat le' hi ka mitenab maan ee fa.a
4 Mes anmu'i tuaf abjaan na'ko ki abiten Sardis, le' anmonin nok neek amneot, nahuum on le' tuaf ka nhainisi fa in pakel. Natuin sin anmonin nok neek amneot, ma sin of annaon nabguan nok Kau, anpaken pakel muti'. 5 Sekog nalan ma natuin Kau tal antee anmaat, in of anpake pakel muti'. Au ka 'nose fa in kanan na'ko sulat le' malula nahenu nok kanaf na'ko tuaf-tuaf le' anmonin nabal-baal nok Uisnenog. Au of a'manaku' msa' 'bi Au Ama' In human ma In matan, ma Au Ama' In ahake sonaf neno tunan, 'ak in le' naan, Au nuug.b
6 Es on naan amneen milek-leko' saa'-saa' le' Uisnenog In Asmanan natoon noi In jema'at sin.’”
Usif Yesus anfee haan manpaa' noi jema'at anbi koot Filadelfia
7 Lalit Mansian Namneo-Namneo naan, anluut anteni In aguaban am nak, “Yohanis. Tabug iij, ho lo he mluul sulat mese anteni. In hanan, on ii:
‘Noi jema'at abiten koot Filadelfia:
Sulat le' iij, na'ko Au, Nai Yesus Kau. Au le' iij, Tuaf Aknino' ma Amneot. Au es le' a'naa' kesel nai Daut in aletu'. Kalu Au usoitan nesug, ka tiit fa tuaf le' nabe'i na'eek. Kalu Au u'eek, ka tiit fa tuaf le' nabe'i nasoin.c
8 Au uhine ale' saa'-saa' le' hi mmo'e sin naan. Au uhine msa' 'ak, hi kaanm een ka mateka een fa. Maski on nane msa', mes hi ka mitotan Kau fa, ma hi mituin Au anoni' piut. Mimnau milek-leko', Au usoitan ulali nesug 'oi ki, es on naan ka tiit fa tuaf le' nabe'i na'eek.
9 Amneen milek-leko'! Anmu'i tuaf le' namoe mnak, sin le' naan Uisnenog In amneot een. Fun kaah, sin le' naan aputa-kliun een le' nata-tuin een haa nitu nakaf. Mes hi of miit kiim! Fun Au of a'mo'e sin tal antee sin anli'tuu' anbin hi humam ma hi matam, lalit anmanakun am nak, Au lo 'neek ki.d 10 Natuin hi mituin milali Au plenat, malan ma mituin Kau piut, Au of a'pafa' ma 'panat ki a'ko hamu'it ma mane'at, le' Uisnenog he nasanut neem, he nsuu' ma nsobal mansian ok-oke' anbi pah-pinan ii.
11 Ka loog fa te, Au 'fani 'uum. Es on naan amnaa' mihel-helan Au anoni' le' hi mneen ma msimo sin faijan unu' naan. Fun naik-naika anmu'i tuaf le' antetak ma nasiik naan upaf le' Uisnenog he nfee le noi ki. 12 Sekog nalan piut ma natuin Kau tal antee in anmaat, in of natgua nabal-baal nok Uisnenog, nahuum on le' nii inaf le' nseen on anbi Uisnenog In Umel. Au of a'luul Au Usi' In kanan, ma kanaf na'ko Uisnenog In koot, anbi tuaf naan in aon. Koot naan, sin anteek nak, ‘Yerusalem Fe'ug’, le' Uisnenog of nasanut ee neem na'ko sonaf neno tunan. Ma Au of aluul Au kanak fe'ug amsa' anbi tuaf naan in aon.e
13 Es on naan amneen milek-leko' saa'-saa' le' Uisnenog In Asmanan natoon ee noi In jema'at een.’”
Usif Yesus anfee haan manpaa' noi jema'at anbi koot Laodikia
14 Es on naan Mansian Namneo-Namneo naan, anluut anteni in aguaban nane mnak, “Yohanis. Tabug iij ho lo he mluul sulat amunit. In hanan, on ii:
‘Noi jema'at abiten koot Laodikia:
Sulat le' iij, na'ko Au, Nai Yesus Kau, le' sin anteek Ee nak, ‘Lo Namneo’. Au le' iij, uguab namneo ma namnoon Uisnenog In A'an ma Plenat piut-piut. Ma ale' saa'-saa' le' Uisnenog anmo'e sin naan, na'uun ma naba'an anbi Kau.f
15 Au 'iit ulali saa'-saa' le' hi mmo'e sin ambi koot Laodikia. Mes hi on mee'? Maputu', kahaf. Mainikin, kaah fa msa'. Kalu maputu' ate, maputu' namneo-namneo! Kalu mainikin ate, mainikin namneo-namneo! 16 Mes natuin hi neekm een stena'-stena', Au of a'pulan upoin ki a'ko Au fefak, on le' hapel.
17 Hi miguab minaeb om mmak, ‘Hit le' iij, atoni amu'it. Hit tmoni lek-leko, ka tpaluu fa saa'-saa' antein!’ Fun kaah, hi neekm een naan anmesi'ook, tal antee hi ka mihine fa meel es le' naleek. Es on naan hi mjali on le' atoni amamu'it ma ao monas haa. 18 Es on naan leko nneis hi iim he msoos maan noni-mnatu afa' na'ko Kau, maut he hi mjali tuaf le' namneo-namneo amu'it. Ma msoos maan pakel muti' abas, ampake he mikolo' hi le'uf. Ma amsoos malog noi hi maatm een, mautu he hi miit amfani nok aknino'.
19 Kalu tuaf le' Au 'neek ee anmo'e nsaan, Au ukain ma 'hukum sin, maut he sin anjalin alekot. Es on naan hi lo he minono hi neekm een naan, he hi namneo-namneo mituin Kau nok makoe leko.g
20 Amneen milek-leko', natuin Au 'hake ulali et nesug, ma Au 'o'en piut he 'taam. Kalu anmu'i tuaf anneen Au hanak, lalit in neem nasoitan nesug, Au of a'taam, ma 'bukae ubgua 'ok ne. 21 Sekog le' nalan ma natuin Kau tal antee in anmaat, Au of a'fee ne hak, he antoko ma naplenat nok Kau. Natuin Au 'alan ma utuin Au Ama' amsa', es on naan tabug iij Au 'toko ma uplenat 'ok Ne.
22 Es on naan amneen milek-leko' saa'-saa' le' Uisnenog In Asmanan natonan noi In jema'at een.’”