Usif Yesus anfee haan manpaa' noi jema'at anbi koot Efesus
2
Lalit Mansian Namneo-Namneo naan naplenat kau mnak, “Yohanis, ho lo he mluul sulat noo mese'. In hanan, on ii:‘Noi jema'at abiten koot Efesus:
Sulat le' iij, na'ko Au, Nai Yesus Kau. Au es a'naa' maklafu' hitu etan Au nimak ane'ug. Au es a'nao 'fuun am uteef ma anono paku nonij afgua' hitu een naan mese-mese. Amneen Au guabak le' ii.
2 Au 'iit ulali hi monim ambi koot Efesus am 'ak, hi mmepu matani' piut-piut moi Uisnenog. Kalu anmu'i atoni maufinu anbi hi tnaanm een naan, hi ka mkolen sin fa. Kalu anmu'i tuaf neem he nputa-kliun ki mnak, in le' naan Uisnenog In haef, hi lo he mpalekas ma mtae milek-leko' in amonin naan, he hi mihinel mmak tuaf naan, mansian aputa-kliun, ai' kaha. Lalit hi mtita', he ka mitniin ee fa. 3 Maski atoni nasusab ki natuin hi mpalsai moi Kau, mes hi malan piut, ma ka mtet-koti fa.
4 Mes Au 'ail, hi mmofu mbi lasij es. Natuin faijan unu', tabug hi fe' mmulai mpalsai moi Kau, hi mmaneek es nok es. Mes tabug iij, hi ka on fa nanel een antein. 5 Es on naan hi lo he mimnau tabug unu' naan. Fun tabug iij, hi miloog ma'ko mo'et unu' le' naan. Es on nane, hi lo he mipiis nai ma'ko hi sanat le' iij, he mfani mmaneek on le' neno unu' naan. Kalu ka on nane fa te, of Au 'fani 'uum 'aiti ufani' paku nonij na'ko ki. 6 Mes Au nekak anmaliin akle'og, natuin hi mtita' mipasib nai Nikolas in anoni' een, le' in asimo anoni' een anmo'e natuin ee. Au 'tita' upasib amsa' saa'-saa' le' sin anmo'e sin.a
7 Amneen milek-leko' saa' le' Uisnenog In Asmanan natoon noi In jema'at sin. Sekog nalan ma natuin Kau tal antee in anmaat, Au of a'fee ne meinuan, he neku hau fgua' le' anbi Uisnenog In po'an. Fun sekog neku hau fgua' nane te, in napeni monit namneo le' ka natfeek niit fa.’”b
Usif Yesus anfee haan manpaa' noi jema'at anbi koot Smirna
8 Lalit Mansian Namneo-Namneo naan, anluut anteni In aguaban nane mnak, “Yohanis, tabug iij ho lo he mluul sulat mese anteni'. In hanan, on ii:
‘Noi jema'at abiten koot Smirna:
Sulat le' iij, na'ko Au, Nai Yesus Kau. Ale' saa'-saa' sin na'uun ma naba'an anbi Kau, anmulai na'ko ahunut tal antee amunit. Nahunut, Au 'maat, mes tabug iij, Au 'moni 'faan. Es on naan amneen Au guabak le' ii.c
9 Au 'iit ulali hi monim le' amsuus ambi koot Smirna. Tatuin mansian ate, hi le' iij atoni amamu'it. Fun kaah, tatuin Uisnenog ate, hi amu'it ki. Anmu'i tuaf le' anmanaku mnak in le' naan Uisnenog Inin, le' naguab nale'uf hi kanam alekot sin. Fun kaah, sin le' naan, ka Uisnenog Inin fa. Sin on le' jema'at es, le' nata-tuin een haa nitun sin anakaf. 10 Es on naan amneen milek-leko'! Hi naik mimtau, tabug hi mipeni susal fe'. Lamun hi mihine mak, nitun sin anakaf ee, nami tuaf he anheke sin, ma nataam abjaan noin ume buij tal antee nenog bo'es. In salit nak he hi mkoti Kau. Maski sin he nlolo niis ki, mes hi naik amniken Kau. Fun sekom-sekog nalan ma natuin Kau tal antee in anmaat, Au of a'balas a'fee ne upaf, he in nmoni nabal-baal nok Kau.
11 Es on naan amneen milek-leko' saa' le' Uisnenog In Asmanan he natoon noi In jema'at sin. Sekog le' nalan ma natuin Kau tal antee in anmaat, in ka napeni fa hamu'it anbi tasi ai maputu' le' anpiin nabal-baal. Nok lalan naan, in ka nmate fa ha'el nuug.’”d
Usif Yesus anfee haan manpaa' noi jema'at anbi koot Pergamus
12 Lalit Mansian Namneo-Namneo naan, anluut anteni In aguaban nane mnak, “Yohanis, tabug iij ho lo he mluul sulat mese anteni. Sulat naan in hanan, on ii:
‘Noi jema'at abiten koot Pergamus:
Sulat le' iij, na'ko Au, Nai Yesus Kau. Au es a'naa' suni es 'aikaf nuug. Amneen Au guabak le' ii.
13 Au uhine ulali hi abiten koot Pergamus naan. Anaa' aplenat anbi naan es le' nitu nakaf. Maski on nane msa', hi mnaa' mihel-helan Au kanak, ma mpalsai Kau piut-piut. Nahunut, Au tuaf es anbi naan, kanan nai Antipas. In nanoni' namneo anmatoom nok Au laal a'honis, mes sin anlolo namatel. Maski on nane msa', mes hi ka mitotan Kau fa.
14 Mes Au 'iit 'ak, hi mmofu mbi lasij mese ai' nuug. Anmu'i tuaf fauk na'ko ki le' nlomin he natuin Balaam in anoni'. Nahunut, Balaam nanoni' nai Barak he na'oki' atoni Israel sin, tal antee sin antanhai Uisnenog In alomin. In na'oki' sin he sin nok ma anfuan, nahan amnaah fuat, ma nnao nmakaken nok tuaf le' ka sin monel een fa, ai' ka sin feek een fa.e 15 Anmu'i tuaf fauk na'ko ki, le' natuin nai Nikolas in anoni'.f 16 Es on naan hi lo he misnaas ma'ko hi sanat sin naan. Kalu kahaf, ka loog fa te, Au 'uum a'ke'o ki 'eki aguab 'aikan, le' n'ote ki nahuum on le' suni'.
17 Es on naan amneen milek-leko' saa' le' Uisnenog In Asmanan natonan noi In jema'at een. Sekog le' nalan ma natuin Kau tal antee in anmaat, Au of a'fee ne utunu' manna na'ko sonaf neno tunan he nbukae. Utunu' naan nabeelk on lekog-lekog. Au 'fee ne fatu muti' es amsa', le' malula in kaan fe'ug. Aal in tuan ee kuun es le' nahine kanaf naan, mes tuaf abjaan ka nahinel fa.’”g
Usif Yesus anfee haan manpaa' noi jema'at anbi koot Tiatira
18 Lalit Mansian Namneo-Namneo naan, anluut anteni In aguaban nane mnak, “Yohanis, tabug iij ho lo he mluul sulat mese antein. Sulat naan in hanan, on ii:
‘Noi jema'at abiten koot Tiatira:
Sulat le' iij, na'ko Au, Nai Yesus Kau, es le' Uisnenog In Anah! Au maatk een anpinan on le' aij, ma Au haek een anpiin mee' on le' besi mee' amsa', le' atoni noutug anbi aij. Amneen Au guabak le' ii.
19 Au 'iit ulali hi monim een naan. Hi mneek Kau namneo-namneo, ma mpalsai Kau nok matani'. Hi mituin Au plenat piut-piut he mtuthae tuaf. Maski atoni nhamu'i ki msa', hi malan piut-piut. Au uhine msa' 'ak, tabug iij hi mmepu matani' nnesi nteni noi Kau.
20 Mes hi mmofu mbi lasij mese: hi msimo bi Isabeel, le' naiti in tuan ee mnak, Uisnenog In mafefa'. Lalit hi mfee ne meinuan he in nanoni' nsaan noi Au nuug. Natuin in anoni' le' nbakaneob naan, es Au nuug, nahan amnaah fuat. Ma sin amsa' anmakaken nok tuaf le' ka sin monel sin fa, ai' ka sin feek een fa. 21 Au ukain bifeel naan tenij-tenij, he in nasaitan in sanat naan. Mes in ka nlomi fa.
22 Es on naan mail milek-leko'. Fun tabug iij Au ufeek ulali, he 'hukum ee 'pake menas huum es, tal antee in ka nsanu naan fa na'ko in hala'. On nane msa' sin ala sin le' anmakaken nok ne. Kalu sin ka nasaitan fa bifee maufinu nane, ka loog fa te, Au 'hukum sin amsa'. 23 Au of umate bifee maufinu naan in anah sin. Nok lalan naan, hi ok-oke' le' apalsait ki mihine mmak, Au uhine mansian een sin neek een. Ma Au of a'fee ufani' msa' 'oi ki, utuin saa' le' hi mmo'e-mo'el.h
24 Mes hi abjaan le' abiten Tiatira naan, hi ka mituin fa bifee amaufinut naan in anoni' amle'ut naan. Natuin hi mtita' mipasib anoni' le' manifa' naan, le' sin anteek ee nak, ‘nitu le'uf le' in anoni mesi'okan’. Nok lalan naan, Au ka ukain ateni ki fa, 25 lamun hi mnaa' mihel-helan hi lasi palsait, tal antee Au 'fani 'uum. 26-28 Sekog le' nalan ma natuin Kau tal antee anmaat, Au of a'fee ne kuasat. Kuasat naan matani', on le' Au upenij na'ko Au Ama', he uplenat uuf-uuf anbi pah-pinan nok aniim maputu'. Kalu anmu'i tuaf anlaban, in of antutu naklati sin, on le' tapee' ana'i naijaan.i Au of a'fee ki faaf nomel amsa'.
29 Es on naan amneen milek-leko' saa' le' Uisnenog In Asmanan natoon ee noi In jema'at sin.’”