Nai Yakop natoon noi in aanh een, es-es nok in amonin anbi neno amnemat
49
Lalit nai Yakop anlelu no'en in aanh een ok-oke'. Sin neman anteen on nane, in naguab am nak, “Hi iim ampaumak-maak kau fe'. Au he utoon ki es-es hi monim anbi neno amnemat.” 2 Lalit nai Yakop anmulai naguab ma natoon nani noi in aanh een am nak,“Nai Yakop in aanh een ki! Hi mkoen om iim nai ma mhake amfuun maan kau.
Amtaha' hi lukem een he mneen am mitniin hi ama' Isra'el in aguaban ma in a'an.
3 Noi ko, nai Ruben. Ho le' iij, aan mone unu', asoitan nesug. Ho mjali on le' au tees ma au nimak ane'ug. Ale' tuaf antola ko. 4 Mes tefes-tefes ho neek maan na'oni'. Ho lomim ka nhake nakii', on le' noe sako' le' ka t'eek taan ee fa. Nok askeken, ho mnao mtuup mok au feel bi Bilha, ma mhainisi ho ama' in hala' tupa'. Es on nane, ho paa' le' amjali on atoni naek ma aan mone unu' ka mateka' fa leen!
5 Nai Simeon ma nai Lewi! Hi nua ki taos mese. Atteek ahaa besij-benas, hi nua ki maloe mmaat. Es on naan hi mhamu'i ma misusab too mfaun. 6 Hi mmaliin ammaat, kalu hi m'ote mifeek bijae nuug sin pii otek een, tal antee sin nbaipuun ok nabala haa sin balak een. Hi mo'em een maufinu namneo-namneo. Kalu hi meek-meku nisim, hi mlolo miis atoni'. Au ka 'lomi fa he a'selo 'ok hi lasim. 7 Es on naan tabug iij, au 'sukat hi neek maputu' een naan, natuin hi maputu' le'uf ki! Ma hi to'as sin naan ka mpake fa lasi kasian ba-baun amsa'. Hi of lo he msutai kiim hi mo'e le'uf een. Uisnenog of anpolin nasana hi sufam-ka'um sin. Sin of natguan anbin balel-balel anbin pah Isra'el.
8 Noi ko, nai Yahuda. Ho kanam naan, in oten ‘pules-bo'is’. Ho oli' ma ho tata' sin of anbo'is ko ma ntola ko. Ho of miis ho musun sin, tal antee sin ka nabe'i naiti fa sin anaak een. 9 Ho le' iij, on le' singa munif matani' es, le' nami kuun amnahat. Ho on le' singa kesog le' nbiin gon he ntuup. Ka tiit fa es, le' balani he noki ko. Ho on le' singa inaf amsa' le' anpao in ana; ka tiit fa es balani he nak'aunu. Ho on nane msa'. Atoni sin of ansanmakan ko, ma ka nabe'in fa he anmo'en alafgua-lafug. 10 Ho of es amnaa' aplenat. Ho sufam-ka'um sin of annaa' aplenat anma'akatuin een, tal antee tuaf mese, le' in anmu'i paaf anneis-nesij. In of es antoko ma annaa' aplenat naan. Lalit toog na'kon uuf-uuf sin of naluli' een ma nabesan noin.a 11 Ho of ammoni nok neek amlilet. Ho mlomi saa'-saa' haa, of anmu'i. Ho he mmo'e saa' amsa', of anjaal! Es on naan ho mu'it een, nok ho lelel ee nesak een of namfaun ma nho-hoen. 12 Ho bukaem lo namiin ma ka natfeek fa.
13 Noi ko, nai Sebulon. Ho naijaa pusaak ee of anmeinua nnesi ma npaumaak tasij, tal antee nmahiun nok koot Sidon. Abnao oel sin neman na'kon meel am meel ma nasanut sin besi tonug een anbin ho tasij ee in ninen nok tainene'.
14-15 Noi ko, nai Isaskar. Ho le' iij on le' bijakasel mese, le' anteek ee nak, keledai matani'. Mes ho mnaak faat. Kalu ho mtuup ambi lalan atnanan,b sekog es le' he npoo' ko he mnao mkoon. Mes kalu ho miit kuan es in lekon et panin nae, es ka nlelu ko fa msa', ho maiti ho bale' ma mloi sin ma mnao moin. Ho on le' nane nai!
16 Noi ko, nai Dan. Ho kanam naan, in oten ee, ‘afeek lasij’. Ho mok ho sufam-ka'um sin of amjali afeek lasij moi hi pah Isra'el sin lasin. Hi mifeek lasi te, namnees ma ka mpili fa humaf. 17 Ho hinem ee on le' kaun lasog le' antuup anpao nbi lalan ee ninen. Kalu atoni' ansae bijakasel ma npe'o nane, nok askeken, ho msau mulali bijakasel naan in haen tikan, tal antee in tuan naan anmofu.
18 Koi, UISNENOG! Au 'on-'onen he Ho mfee 'honis noi kai ok-oke'.
19 Noi ko, nai Gat. Ho kanan naan atneen, in hanan on le' ‘mabaan musu’. Pukan apaikalut een of anbaan ko, mes ho of ammabaan mufani' sin, ma miis sin.
20 Noi ko, nai Aser. Ho lelel ma po'an sin nesak een es le' naleko nnes-nesin. Ho of ammo'e kokis aminat huma'-huma' le' ma'upa', he kesel sin neman nsosan na'ko ko.
21 Noi ko, nai Naftali. Ho on le' luu inaf, le' naen ma nfui nmaat. Es ka nabe'i fa he n'atol ko. Ho muhoni maan ho aanh een, namasan lek-leek.
22 Noi ko, nai Yusuf. Ho on le' nonog le' anmoni npaumaak oe mata'. In asbaken een of anonok een ansaen noin fatu mnanu',c on le' ho sufam-ka'um sin annaon noin balel-balel. 23 Anmu'i tuaf abjaan le' nasaeb sin neek menas noi ko, on le' musug le' napau ko. 24 Mes Uisnenog le' au ubees 'oi Ne na, anbaban ko. Es on nane, In nmo'e ho nimam naan nabe'i, tal antee ho mube'i ma mupau mufani' moi ho musun naan, maski naloo. Ho of miis sin, natuin Uisnenog es anbaban ko. Namneo In kuasan matani'! Es on naan au upeis jok 'oi Ne. Natuin In es anpao ma npanat kau. 25 In of anpanat ko msa', ma anfee ko tetus-athoen huma'-huma'. Es le': tetus na'ko neno tunan, ma na'ko pah-pinan, ma ho aan honi' een namfau ma n'ao-minan. 26 Anu'af sin ka namnekun fa. Tetus le' au 'feel ee 'oi ko le' iij, annesi na'ko 'nu'af sin ok-oke'! Maut he tetus sin le' ii ansai piut noi ko, natuin ho mnesi na'ko ho olif-tataf sin ok-oke'.
27 Noi ko, nai Benyamin. Ho balani on le' asu fuij anaek le' namnaah. Fe' nok-nok ana' amsa', in anheke nlali in amnahat. Mes kalu nfai te, in annao ma anbati amnaah nesif naan noi in aan' een. Ho sufam-ka'um sin of matanik een on le' nane msa'!”
28 Aguab een iij, nai Yakop in aguab sin noi in aanh een. In natoon nani sin, es-es in amonin, nok in sufan-ka'un sin anbi neno-neno amnemat. Sin ala sin le' naan, es le' anjalin aam uuf noin uuf bo'es am nuug anbin pah Isra'el.
Nai Yakop anmaat
29-30 Lalit nai Yakop antoti in aanh een he anmo'en lasi manpaa'. In naguab am nak, “Ka loog fa leen, au he 'maat een. Kalu au 'maat, hi lo he mnao msuub kau moi baba nai Abraham in naten. Naten naan et nuat le' npaumaak kuan Makpela ma kuan Mamre et pah Kana'an. Nahunut, baba nai Abraham ansoos nuat naan nok lelel ma po'an naan he njali in bale subat. In ansoos nafeek ee na'ko atoni Hetes es, kanan nai Efron. 31 Anbi naan, sin ansuub hit baba nai Abraham, ma hit oin baba bi Sara', au ama' nai Isak, ma au ina' bi Ripka. Es on naan hi lo he msuub kau mbi naan, 'bi au feel bi Lea in abnapan. 32 Mimnau! Hi naik amniken he msuub kau anbi nuat le' baba nai Abraham ansoos ee le' naan.”
33 Nai Yakop naguab nalali on nane, in antuup anfani noi hala' tupa', ma in anmaat.