Nai Yakop antoti tetus-athoen noi nai Yusuf in aanh een
48
Ka loog fa na'ko tabug nane, nai Yusuf napeni hanaf nak, in amaf nameen matani'. Es on naan in nok in aan monel nua' een naan, es le' nai Manase ma nai Efraim, ma sin nnaon nail sin babaf nai Yakop. 2 Tabug nai Yakop nahine nak nai Yusuf neem nalali te, in naseke' on he ntoko nbi hala' tupa'.3 Ma in naguab noi nai Yusuf am nak, “Usu! Nenog naan, Uisnenog le' Akuaas Matani' naan, nakliil On noi kau nbi kuan Lus, et pah Kana'an. Anbi naan, In nba'an noi kau, 4 mnak, ‘Au of umfauba' ho sufa sin he njalin too mfau-hutug. Au of a'feen sin balel le' ii msa', he njali sin naijaa pusaak tal antee nabal-baal.’
5 Es on naan tabug iij ho anah nai Efraim ma nai Manase, sin paaf een es le' ii: au 'uum 'oi pah Masir iij, sin nua sin anbi nanin ii. Maski on nane msa', tabug iij, au 'aiti sin on le' au aanh een kuuk, on le' nai Ruben ma nai Simeon. 6 Mes kalu ho muhoni' mteni', na' ho anah. Au ka 'aiti sin fa on au aanh een. Es on naan maut he sin nsimo sin pusaak sin na'kon sin tataf sin, nai Efraim ma nai Manase. 7 Au 'mo'e on le' naan, he umnau ho ina' bi Rahel. Tabug hit atfani teem ta'ko pah Mesopotamia he toi pah Kana'an, ho ina' nmate nbi lalan atnanan anbi lalan le' npaumaak kuan Efrata et pah Kana'an. Tabug naan, au 'suus amaat! Lalit au 'suub ee et lalan ninen le' he ttaam toi kuan Efrata naan.” (Tabug iij, kuan le' naan, sin nakanab Betlehem.)
8 Nai Yakopa naguab nalali on nane, in na'aiti matan ma nail niit nai Yusuf in aan monen naan. Es on naan in antoti nai Yusuf am nak, “Hoi, sekog aanh een es le' ii?”
9 Ma nai Yusuf natael ee mnak, “Li'aan een le' iij, Uisnenog es anfee sin noi kau nbi pah Masir ii.”
Lalit nai Yakop naguab am nak, “Kalu on nane, ampaumakab kau sin, he au 'onen ma 'toti Uisnenog he nfeen sin tetus.” 10 Nai Yakop namnasi nalaal je. In maatn een ankakin een. Es on naan in ka niit leko fa. Manum nai Yusuf nok in aanh een naan anpaumaakb ok noi nai Yakop. Ma nai Yakop anhoo ma anneek sin. 11 Lalit in naguab noi nai Yusuf am nak, “Ala loog le' iij, au uten-teenb aah, 'ak au ka nuug he u'eku 'ok ko fa leen. Mes tabug iij, Uisnenog anmo'e nneisi nteni, tal antee au ube'i fe' he 'iit ho aanh een.”
12 Lalit nai Yusuf naskotub in aanh een na'ko nai Yakop.b In nlituu ma in naluli' tal antee in anneek naijaan anbi in amaf in human ma in matan. 13 Lalit nai Yusuf anfeen. Ma in nahakeb in aanh een anpaumak-maak in amaf. In nahakeb in aan mone unu' anbi nai Yakop in animan ane'ug. Ma aan mone muni' anbi nai Yakop in animan aliij. 14 Mes tabug nai Yakop he ntao in animn een he ntoti Uisnenog he nfeen sin tetus-athoen noi sin nua sin, in n'aikasuli' in animn een. In ntao in animan ane'ug noi aan muni' nai Efraim in anakan, ma in ntao in animan aliij noi aan unu nai Manase in anakan. 15 Lalit in an'onen ma ntoti Uisnenog he nfeen nai Yusuf tetus-athoen am nak,
“Ho babaf nai Abraham,
ma ho babaf nai Isak,
sin nua sin natuin Uisnenog In lomin ee piut-piut.
Uisnenog kuun es le' anpaloli ma nbabi kau anmulai na'ko tabug au munif tal antee tabug ii.
16 In kuun es le' ansoi naan kau na'ko amleut huma'-huma'.c
Es on naan au 'totij Ee msa' he In anfee tetus-athoen noi li'aan een le' ii ma sin suufk een.
Es on naan kalu sin an'onen een noin Uisnenog,
sin ka nniken fa he nteek baba nai Abraham, baba nai Isak, ma au kanak.
Maut he sin maihonik een nasufan piut,
he njalin toog amfau-hutug anbi pah-pinan ii.”
17 Mes tabug nai Yusuf niit in amaf antao in animan ane'ug anbi aan muni' nai Efraim in anakan nane, in naiti natnanib in amaf ee animan naan, ma antaog noi aan unu nai Manase in anakan. 18 In naguab noi in amaf ee mnak, “Aam honi', naik on naan. Nai Efraim in aan mone muni'. In ka aan mone unu' fa. Ho lo he mtao ho nimam naan moi aan unu' nai Manase in anakan. Natuin aan mone unu' in paaf, es le' naan.”
19 Mes amaf nai Yakop ka nlomi fa. In nak, “Usu. Au uhine 'ani. Nai Manase of anjali atoni matani', ma in sufan sin amsa' of anjalin toog pah anaek. Mes in olif nai Efraim naan, of matani' nnesi na'kon. In sufan sin of namfau le'uf, tal antee sin anjalin toog pah namfau le' matani' le'uf.”
20 Lalit in natoon noi li'aan nua' een nane mnak, “Of kalu atoni Israel sin antotin noin Uisnenog he nfeen sin tetus noi tuaf-tuaf, sin of anteek hi nua ki hi kaanm een naan. Sin of antotin am nak, ‘Kalu lekog, Uisnenog anfee tetus noi ko, nahuum on le' In nfee tetus noi nai Efraim ma nai Manase.”’
Nok lalan naan, nai Yakop amsa' anteek nahunun nai Efraim in kanan, na'ko nai Manase in kanan.
21 Lalit nai Yakop naguab noi nai Yusuf am nak, “Usu! Ka loog fa, au he 'maat leh. Mes Uisnenog of anbaban ki. Ma In lo he neki ki mfani moi hi babaf sin pah. 22 Mes tabug iij, au 'fee ko nnesi ma'ko sin ho benu'. Au 'fee lolu' ko nu'af et pah Kana'an le' unu' au usiik 'aan ee 'eki au suni'-kenat a'ko atoni Amoris sin.”