Nai Yusuf in umel nanan napenin naijaan na'ko kesel pah Masir
47
1-2 Lalit nai Yusuf nok in tataf tuaf niim, annaon he nbaisenu kesel. Nai Yusuf na'ekub ma natefab sin nok kesel. In naguab am nak, “Aam Kesel! Au ama' ma au olif-tataf sin neemn eeh na'kon pah Kana'an. Sin neman neki sin mu'it een ma sin bale' een ok-oke'. Tabug ii sin etan pah Gosen.” 3 Lalit kesel antoti mnak, “Hi mepug sin es le' saa'?”
On nane, sin nataen am nak, “Hai le' ii atuku mu'it, on le' hai baabf een. 4 Tabug iij, pah Kana'an faku-nais ee anaek, tal antee ka tiit fa mnahat ma ma'ug antein. Es on naan hai iim moi pah le' iij he mitgua mtahan. Hai meki hai mu'it een amsa'. Es on naan tabug iij, hai mbaisenu ko aam, amkolen kai he hai mitgua mbi pah Gosen, he hai mituku hai mu'it een anbin naan.”
5 Lalit kesel natoon in lomin ee noi nai Yusuf am nak, “Tabug iij, ho ama' ma ho benu' sin etan ii. 6 Es on naan sin napenin meinuan he sin natguan anbin ii on le' sin pah ee kuuk. Au hinek, pah Gosen naan, balel le' naleko nnesi nbi pah le' ii. Es on naan leko nneis sin natguan anbin le' naan. Ma kalu sin natuku mu'it nok alekot, maut he sin natuku au nuug anbin nane msa'.”
7 Lalit nai Yusuf na'ekub ma natefab in aamf ee nok kesel. Ma nai Yakop an'onen he Uisnenog anfee tetus noi kesel naan.
8 Lalit kesel antoti mnak, “Aam, ho toon fauk eeh?”
9 Nai Yakop natael ee mnak, “Au 'moni 'aan toon natun mese am bo' teen, mes au ka utgua ubaal 'iit fa fe' 'bi balel mese. Au babaf sin on nane msa'. Kalu au he unees 'ok sin, au 'toon le' au 'monij, ka namfau fa fe'. Mes nahenu nok susal ma mane'at.” 10 Lalit nai Yakop antoti nteni Uisnenog he nfee tetus-athoen noi kesel pah Masir naan. Ma sin nbaisenun ma nheel ok na'ko kesel in matan, ma anbelok anfanin.
11 Lalit nai Yusuf natuin kesel in a'an, es on naan in anlulu balel noi sin anbi pah Gosen. Naijaan balel naan, nabebe le'uf. (Sin nakanab balel naan anbi neno amunit nak, ‘Rameses’.) Es on naan nai Yusuf in amaf ma in olif-tataf sin natgua nabaaln aa anbi balel naan. 12 Lalit nai Yusuf natae ma naloitan amnahat noi in amaf, ma in olif-tataf sin, sin feel-anah sin, na'ko anaet tal antee abaut een.
Amnahas manenu' nteni anbi pah Masir
13 Anbi tabug naan, ka tiit tani fa amnahat anbi meel am meel. Amnahas ee ntaman kuan-balel, koot ma pah. Na'ko pah Masir ntee pah Kana'an mansian sin an'ao-klati nmaten. Sin ka nabe'in fa he anmo'en saa'-saa', natuin sin namnahan nmaten. 14 Lalit tuaf abjaan sin neman na'kon balel-balel noin pah Masir, ma ale' balel-balel anbi pah Kana'an, he nsosan amnahat na'kon nai Yusuf. Es on naan in nabguab loit een naan ok-oke', lalit in annao nabelak sin anbin kesel in sonaf. 15 Tabug naan, abiten pah Masir ma pah Kana'an sin nalalin loit. Es on naan sin ka nsoos nabe'in fa mnahat. Lalit sin neman noin nai Yusuf he ntotin. Sin naguab een am nak, “Aam! Hai mbaisenu ko. Amfee kai amnahat, he hai naika mimnaah ammaat. Natuin hai milali loit.”
16 Lalit nai Yusuf natael ee mnak, “Kalu namneo-namneo hi milali loit, hi mmo'e on ii: amtukal amnahat nok hi mu'it een naan. Au of a'fee ki mnahat.” 17 Lalit sin nnona' sin mu'it een noin nai Yusuf he ntukal amnahat. Mu'it een es le': sin bijae nuug, bijakasel, bijakase keledai, a'bibij, ma sin abibi-kasen. Natuin toon naan, nai Yusuf an'atol on le' naan.
18 Too amnemat, sin nfani neman noi nai Yusuf. Sin nbaisenun am nak, “Aam! Hai lo mbaisenu namneo guah. Hai loit ma mu'it, ho mtukaal maan kuum sin eeh. Tabug iij, hai he maiti saa' antein. Hai luman-luman kai. Ala haa hai tuam een anmes-mesen, nok hai naijaan een. 19 Naik amtule miis kai he hai mmaat. Kalu hai mmate te, sekog es le' he npaloli hai naijaan een naan!? Leko nnesi, ho maiti kai mjali ho aten. Ho msimo hai naijaan een naan, he ho mpaal kuum sin. Lalit ho mfee kai finij he hai mseen sin noi ko. Es on naan ho mfee kai mnahat natuin hai mihaeb om ambi ho lelen. Lamun hai naik ammaat!”
20 Natuin tabug amnahas naan matani' le'uf, ma abiten pah Masir sin nasosa' nani sin naijaan een ok-oke'. Es on naan nai Yusuf ansoos nani naijaan een naan he njali kesel pah Masir in naijaa pusaak sin. 21 Nok lalan naan, abiten pah Masir sin anjalin atel noin kesel pah Masir.a 22 Mes nai Yusuf ka nsoos fa anaak lasi palsait een sin naijaan een, natuin kesel anfeen sin amnahat piut. Es on naan sin ka nasosa' fa sin naijaan een.
23 Tabug naan, nai Yusuf naguab noi toog sin am nak, “Tabug iij, hi mfani atel moi kesel pah Masir. Au 'soos ulali hi naijaan ee noi kesel. Es on naan hi maiti finij le' iij ee nai, he mnao mseen sin noin lelen naan. 24 Tabug sekit ma mnonut, hi mbati paa' niim. Es noi kesel. Nesik een paa' haa', abjaan hi maiti finij, ma abjaan hi maiti sin ntaam amnahat noi ki ok-oke'.”
25 Lalit sin nataen am nak, “Koi aam. Ho msoi maan kai na'ko amnahas ii. Es on naan hai mtoti makasi. Maut he hai mjali atel moi hit kesel.”
26 Lalit nai Yusuf anpake atolan naan anjali plenat anbi pah Masir. Es on naan sin anbatin batis niim na'ko ale' pena'-anel le' sin anseki ma nonu sin naan. Paaf mese noi kesel. Haa' een noin sin kuuk. Aal anaak lasi palsait een sin naijaan ee, kesel ka nsoos sin fa. Plenat naan, sin fe' anpakel ee nnao piut.
Nai Yusuf anmo'e manpaa' nak in he ansuub in amaf anbi sin babaf sin natek een
27 Anmulai tabug naan, atoni Israel sin natguan nabaaln aa anbi pah Gosen, et pah anaek Masir. Sin anjalin atoni amu'it. Ma sin nahonin ma nmasaat on piut-piut.
28 Anbi pah Masir naan, nai Yakop anmoni naan toon bo'es am hiit, tal antee in nmoni naan nabgua toon natun mese am bo' haa mhiit. 29 Tabug in neno 'maten anpaumak-maak een, in no'en nai Yusuf ma natoon ee mnak, “Usu! Au 'naben, ka loog fa leen ate, Uisnenog no'en nafani' kaug ee. Es on naan au 'toti ko, kalu ho amneek kau te, ho msuup mak ho ka msuub kau fa mbi pah Masir ii. 30 Ho lo he meki mufani' au aok-ta'uk iij he msuub ee moi hit babaf sin natek een ma msuub kau ambi nael. Ho ama' kau, au lomik ee on le' naan.”
Es on naan nai Yusuf natael ee mnak, “Lekog, aam! Kalu ho lomim maan on le' naan, au utuin aah.”
31 Lalit nai Yakop naguab am nak, “Kalu ho mlomi mutuin kau on naan, tabug iij ho msuup, mak ho mlomi mutuin ho ama' in lomin.”
Lalit nai Yusuf ansuup natuin nai Yakop in aguab een naan. Ma nai Yakop noebani' ma nlituu n'ani hala' ee nakan, ma n'onen he nasaeb sukuul noi Uisnenog.