Nai Yakop sin naloitan een he natnanin noin pah Masir
46
Lalit nai Yakopa anpainote in bale' een, ma nnao nasaitan pah Kana'an. Sin anteen kuan Barseba te, in nlolo mu'it ma natulu' sin noi Uisnenog, le' in amaf nai Isak nabees noi Ne na'ko unu'. 2 Faij es ate, nai Yakop an'unumai. Anbi unumait naan, in nneen Uisnenog no'en ee mnak, “Hoi! Yakop! Ho mfeen he mneen fe'!”
Es on naan in natael ee mnak, “Leko!”
3 Ma Uisnenog nak, “Au le' iij, Uisnenog le' ho ama' nabees noi Ne na'ko unu'. Ho naik mumtau he mnao moi pah Masir. Au of a'mo'e ho sufam-ka'um sin anjalin toog le' maso'it anbin balel naan. 4 Au of 'ok ko tnao toi pah Masir. Ma Au of 'ok ufani' ho sufam-ka'um sin anfanin noin pah Kana'an amsa'. Tabug ho mmate te, of ho anah nai Yusuf anhake nbi ho bnapam.”
5 Lalit nai Yakop nok in aanh een,b annaon nasaitan kuan Barseba. Ma sin nasaeb sin, nok sin feel-anah sin anbin kaleta bijakasel een le' kesel pah Masir ansonu' sin. 6-7 Sin naiti neki sin bale' pusaak sin ma mu'it een ok-oke' le' sin nmu'i sin, tabug sin anbin pah Kana'an. Lalit nai Yakop ma in aan feto-aan mone sin, nok sin anah sin ok-oke', annaon noin pah Masir.
Nai Yakop nok in nonot sin le' nokan annaon noin pah Masir
8 Nai Yakop in nonot le' nok natnanin noin pah Masir, es le' iij:c
10 Nai Simeon nok in anah sin es le': nai Yemuel, nai Yamin, nai Ohat, nai Yakin, ma nai Sohar. Ma nai Saul amsa', le' nahonis ee na'ko bifee Kana'an.
11 Nai Lewi nok in anah sin es le': nai Gerson, nai Kehat, ma nai Merari.
12 Nai Yahuda nok in anah sin es le': nai Sela, nai Peres, ma nai Sera. Nai Yahuda in anah abjaan, nai Er ma nai On, anmate nalalin anbin Kana'an. In neki nai Peres in anah sin amsa', es le': nai Hesron ma nai Hamur.
13 Nai Isaskar nok in anah sin es le: nai Tora, nai Pua, nai Ayup, ma nai Simron.
14 Nai Sebulon nok in anah sin es le': nai Seret, nai Eron, ma nai Yahreel.
15 Sin ok-oke' le' naan, nai Yakop nok in feel bi Lea sin aan honi' een, tabug sin natguan anbin Mesopotamia. Anmu'i nteni sin aan feto, kanan bi Dina. Es on naan nai Yakop nok in sufan, tuaf bo' tenu mteen.
16 Ma anmu'i in anah na'ko in feel abjaan, es le': nai Gat, nok in anah sin es le': nai Sifion, nai Hagi, nai Suni, nai Esbon, nai Eri, nai Arodi, ma nai Areli.
17 Nai Aser, nok in anah sin es le': nai Yimna, nai Yiswa, nai Yiswi, nai Beria, nok sin fetof es, kanan bi Sera.
Anmu'i msa' nai Beria in anah sin, es le': nai Heber ma nai Malkiel.
18 Sin ala sin le' naan, tuaf bo'es am nee. Es le' nai Yakop ma in feel bi Silpa in anah sin. Bi Silpa naan, atel le' nai Laban anfeel ee noi in aan feto bi Lea, nai Yakop in fee mnasi'.
19 Nai Yakop in feel es anteni, kanan bi Rahel. In nahoni' li'ana' nuug, es le': nai Yusuf ma nai Benyamin. 20 Tabug naan, nai Yusuf ansao nalali bi Asnat anbi pah Masir. In na'if, anaak lasi palsait anbi koot On, kanan nai Potifera. Nai Yusuf ma bi Asnat sin aanh een es le': nai Efraim ma nai Manase.
21 Nai Benyamin nok amsa' noi pah Masir. In nok in anah sin, es le': nai Bera, nai Beker, nai Asibel, nai Gera, nai Na'aman, nai Ehi, nai Ros, nai Mupim, nai Hupim, ma nai Aret.
22 Lalit nai Yakop ma in feel bi Rahel sin maihonik een tuaf bo'es am haa.
23 Nai Yakop in anmu'i nteni feel es, kanan bi Bilha. Sin anah sin es le': nai Dan ma nai Naftali.
Nai Dan in anah ee, nai Husim.
24 Nai Naftali nok in anah sin es le': nai Yaser, nai Guni, nai Yeser ma nai Sirem.
25 Nai Yakop nok in feel bi Bilha sin maihonik een tuaf hiit. Bi Bilha naan, es le' bi Rahel in atel, le' in napenij na'ko in amaf nai Laban.
26 Lalit nai Yakop in sufan sin le' annaon noi pah Masir naan, tuaf bo' nee mnee'. In aanh een sin aanh een ka nso'i sin fa fe'. 27 Sin nmasaat on nok nai Yusuf in anah sin le' nahonis sin anbin pah Masir, sin tuaf nuug. Es on naan nai Yakop in nonot le' natguan anbin Masir, sin ala sin tuaf bo' hiit.
Nai Yakop nateef in anah nai Yusuf
28 Tabug sin he noi nteen pah Masir, nai Yakop anlelu in anah nai Yahuda he annao nahuun, he no'en nai Yusuf, he neem na'eku nok in amaf anbi pah Gosen. Tabug sin anteen nalalin anbin Gosen, 29 on nane, nai Yusuf ansae noi in kaleta, he annao nateef in amaf anbi naan. Tabug sin nateef, nai Yusuf anhoo in amaf, ma ankae aloo le'uf.
30 Lalit nai Yakop naguab nok nai Yusuf am nak, “Usu! Tabug iij, au 'iit kog een. Es on naan au uhine 'ak ho mnoni fe'. Maski tabug iij au 'mate msa', lekog.”
31 Lalit nai Yusuf natoon noi in olif-tataf sin am nak, “Au lo he 'nao 'baisenu kesel ee, he utoon 'ak au nonot sin na'ko pah Kana'an neman anteel een. 32 Ma au of utoon 'ak hi le' iij, atuku mu'it. Es on naan hi meki hi mu'it een ma hi pusaak sin na'kon Kana'an. 33 Kalu kesel ee no'en ki, ma antoti hi mepug sin saa', 34 hi mitae mmak, hi ala ki le' iij, atuku mu'it ammulai na'ko hi aan'-ana' fe', on le' hi babaf sin. Nok lalan naan, in of anlelu ki he mitgua mbi Gosen.” Nai Yusuf natoon on naan, natuin abiten pah Masir anmainisin kalu sin natgua nabguan nok atuku mu'it een.