Nai Yusuf natoon in tuan, ma antoti in amaf he neem noi pah Masir
45
Anneen on nane, nai Yusuf in nekan naklati', tal antee in ka nalan naan fa in tuan ee ntein anbi in ameput een sin maatk een. Es on naan in anlelu sin he anpoin, he in nabe'i anmese kuun nok in olif-tataf sin. Nok lalan nane, in nabe'i natoon in tuan ee noi sin. 2 Lalit ameput een anpoin oke'. Ma nai Yusuf ankae nme'-me'ul ma nsase'ul. In ameput een, atoni Masir, le' anhaken anbin mone', annenan amsa'. Ma abiten kesel in sonaf annenan amsa'.3 Lalit nai Yusuf natoon namneo guah noi in olif-tataf sin am nak, “Koijoo. Au le' iij, nai Usu kau. Hi oli'. Hit ala kit atma'oli-tatan. Hit ama' fe' anmoni, oo?”
Annenan on nane, in olif-tataf sin namtau nmaten, tal antee sin ka fefa' mese fa.
4 Lalit nai Yusuf nak sin am nak, “Hoi! Miskotu iim he mpaumaak kau fe'!”
Es on naan sin naskotun antaman ma npaumaak nai Yusuf. Lalit in naguab anfani mnak, “Au le' iij, nai Yusuf, le' nenog naan hi misosa' mpolin moi pah Masir ii. 5 In amneot, hi misosa' kaug een. Mes naik mimtau, ma naik ammatoe ma mmasanan es nok es. Natuin Uisnenog es neki kau 'uum a'tee iij, he 'jali ahunut noi ki. Nok lalan naan, In anpake kau he In nafetin naan too mfaun, he sin naik namnaah anmaten.
6 Tabug iij, amnahas fe' annao naan toon nuug. Aal toon niim fe'. Tabug naan, ka tiit tani fa tuaf mese he ntoof ai' anfoi', anseen, ma ka tiit fa lelel mese le' he anmu'i pena'-anel. 7 Nok lalan le' hit ka tahine taan ee fa le' iij, Uisnenog neki kau 'uum uhunun ki. Henati' na'ko hi ala ki, ma hi sufa sin napenin ahonis.
8 Es on naan in amneot, hi ka es ammo'e kau fa he au 'uum a'tee iij, mes Uisnenog In amo'en. In es naiti kau 'jali kesel in tuaf mapalsa'ij abi pah Masir ii. Es on naan au 'jali anakaf a'bi kesel in sonaf. Ka tiit tani fa es he annesi na'ko kau.
9 Es on naan tabug iij, hi mfani labah nai, he mitoon au guabak le' iij moi hit ama', mak on ii: ‘Aam honi', ho anah nai Yusuf anmoni fe'! In anjali kase naek et pah Masir. In anhone ko aam honi', he amnao moi pah Masir labah nai. 10 Aam honi' of ho mupeni meinuan he mutgua mbi pah Gosen he mpaumaak ee. Balel naan meinuan. Es on naan hi mibe'i mituku ma mhao hi abibi-kasen, abibin, ma bijae nuug ok-oke'. In antoti ko msa', he uum meki ho anah sin, nok nani sin umel nanan, ma sin bale' pusaak sin ok-oke' he mitgua mibaal aah ambi nae. 11 Kalu aam honi' mutgua ambi Gosen, in nabe'i npaloli ko anbi nae. Natuin amnahas aal toon niim anteni fe'. Es on naan in of an'atol he aam honi' mok ho nonot sin, ma ho mu'it een ok-oke' ka mkulan fa saa'-saa'.”’
12 Nai Yusuf natoon nalali on nane, in naguab anteni mnak, “Tabug iij, hi miit meki hi matam, ee oo? Ho msa', Min. Au le' iij, ho tata' nai Yusuf teeb-teeb. 13 Es on naan mitoon noi hit ama' mak, au kuasat a'bi pah Masir le' iij, anae le'uf. Ma mitu'in moi hit ama' saa'-saa' le' hi miit sin. Lalit hi mekij neem labah nai moi ii!”
14 Lalit in anhoo ma anneek in olif nai Benyamin, ma sin nua sin ankaen. 15 In anhoo ma anneek in tataf sin mese-mese amsa'. Lalit na' sin anmulai naguab een nokan.
Kesel pah Masir ansimo nai Yusuf in olif-tataf sin
16 Lalit, tabug kesel nok in anaak mepug sin annenan nak nai Yusuf in olif-tataf sin neman, sin anmaliin anmaten. 17 Es on naan kesel naguab noi nai Yusuf am nak, “Yusuf! Mutoon noi ho benu' sin, he sin nasaeb een pena'-anel noi sin bijakase keledai een, he nekin nnaon noin pah Kana'an. 18 Lalit amlelu sin he neki ho ama' ma nonot sin neman ok-oke', he sin natnani neman noin iij ee nai. Au of a'feen sin naijaan ma balel le' naleko nnesi anbi pah Masir iij, he sin natguan ma nmonin anbin naan, ma sin napenin amnahat na'ko balel naan. 19 Amlelu sin he sin neki nani kaleta bijakasel fauk na'ko iij, he sin nasaeb li'ana een, ma ho ama'. 20 Sin naika natenab bale pusaak sin le' sin ka nabe'i neki sin fa. Natuin pah Masir iij, nahenu nok bale' le' naleek. Sin of anpaal sin.”
21 Anneen on nane, nai Yusuf anfee kaleta bijakasel fauk, ma bukael anbi lalan, natuin kesel in a'an. Ma in olif-tataf sina naloitan een he nfanin natuin kesel in a'an. 22 Nai Yusuf anfeen sin tai fe'ug amsa', es-esat pasan mese. Mes in anfee nai Benyamin loi muti' afgua' natun teen, ma tai fe'ug pasan niim. 23 In ansonu' noi in aam honi' bale saa'-saa' le' naleek na'ko pah Masir, ma nasaeb sin anbi bijakase keledai monel bo'es. In anfee nloulu ntein pena'-anel, utunu', ma mnahat huma'-huma', nasaeb sin noin bijakase keledai inaf bo'es. In nalaib sin bukael noi tabug sin anbelok anfani neman noin pah Masir. 24 Lalit in annao naseon sin, ma namnauba sin am nak, “ Hi naik ammatoe mbi lalan ee, oo!”
Nai Yakop anneen nak nai Yusuf anmoni fe'
25 Lalit sin nnaon nfanin noin sin amaf et pah Kana'an. 26 Anteen nae, sin natonan sin amaf ee mnak, “Aam honi'! Ho anah nai Yusuf anmoni fe'. In kase naek et pah Masir! In nnaa' aplenat.”
Tabug nai Yakop anneen, in namkaak ma ka npalsai fa sin aguab een naan. 27 Mes tabug sin natoon nalali nai Yusuf in aguab een naan, ma in niit kaleta bijakase' le' nai Yusuf ansonu' he nasaeb nekij noi pah Masir, na' in anpalsai. 28 Es on naan in naguab am nak, “Koijoo! Au aanh ee anmoni fe'! On le' nane, na' au maliin. Au lo he 'nao 'iit 'aan ee fe', na' au 'mate msa', lekog.”