Nai Yusuf in aklaa noni muti namneek
44
Sin anbukaen nalalin, nai Yusuf nase'og anaak mepug anbi in umel ee mnak, “Hoi! Ho mnao mulai pena'-anel moi atonin iij sin kalon een naan, tal naheun nfiin-nfiin. Lalit ho mtao mufani' sin loit een es-es ate noi sin kalon een naan. 2 Lalit ho maiti au klaa noni muti, ma mtaog ee moi aheti susug in kalog.” Es on naan in nmo'e natuin nai Yusuf in aplenat.3 Anmiu nok-nok ana', nai Yusuf nafetin sin nok sin bijakase keledai sin he nnaon nfanin ma nekin amnahat. 4 Sin nnaon ka loog fa fe' na'kon koot nane, nai Yusuf natoon noi anakaf nane mnak, “Ho mnao mli'u mutuin atonin naan labah. Kalu mupeni sin, ho mak sin am mak, ‘Nansaa' am es hi mmo'e maufinu noi anaef? Hi mifani' in neek alekot nok mo'et amle'ut on naan! 5 On meel em'es hi mibaak meki hai anakaf ee in aklaa noni muti? Hi ka mihine fa, oo? Aklaas naan ka npakel fa aal he nbukae oel, mes anpakel amsa' he nami atoni' in aguan, natuin aklaas nane matua'! Hi moe'm een iij, lo le'uf 'teeb-teeb!”’
6 Lalit anakaf nane anli'u natuin sin tal antee napeni sin. Es on naan in natoon noi sin natuin ahaa nai Yusuf in aguaban lelon.
7 Lalit sin naprotes matani am nak, “Aam, ho salit, on mee? Hai msuup. Hai ka nuug fa he mmo'e le'uf on naan! 8 Ho muhine kuum. Loit een le' nenog naan anbin hai kalon een naan, hai mfee sin anfanin noi ko. Es on naan hai ka mibe'i fa he mibaak hi anakaf in aklaas naan na'ko in umel. Hai ka nuug he mibaak fa, aam! 9 Aam, ho mpukai ma mtae kuum. Mupeni aklaas naan anbi sekog in kalog, amhukum misan! Maut he hai bian ee, amjali atel moi ko.”
10 Lalit anakaf nane naguab am nak, “Kahaf! On ii. Kalu au 'iit ee anbi sekog, in le' naan anjali au atel. Hi bian ee, amnao mkoon.”
11 Es on naan sin nasanut kalon een nane, labah. Lalit sin anpukai nani sin. 12 Ma anakaf naan anpalekas kalon een naan ok-oke', anmulai na'ko atoni anaet inij, tal antee aheti susug inij. Es on naan in niit aklaa noni muti' naan, anbi nai Benyamin in kalog.
13 Nail nitan on nane, nai Benyamin in taatf een sin neek een aklati-aklati een. Lalit sin nasaeb nafani' sin kalon een noin sin bijakase keledai sin, he ntaman anfanin noin koot.
14 Tabug sin anteen nai Yusuf in umel, in anbi nane fe'. Es on naan sin nli'tuun anbin nai Yusuf in human ma in matan. 15 Lalit nai Yusuf anhaan maslaal noi sin am nak, “Hoi! Nansaa' am es hi mmo'e kau on le' iij? Hi ka mihine fa? Anaet on le' au, anpake malog le' he nami atoni' in aguan.”
16 Lalit nai Yahuda natael ee mnak, “Oin oo! Uisnenog anpukai napoitan hit sanat sin. Lalit hai he mak saa' antein, aam? Hai he mimneob hai tuam een on mee, aam! Kalu ho mtahan hai oli', leko nneis ho mtahan kai ok-oke'. Maiti kai mjali ho aten.”
17 Mes nai Yusuf natael ee mnak, “Kahaf! Niit aklaas nane anbi sekog, in es le' he anjali au atel! Hi bjaan ee, am'ao soon. Amfani nai moi hi ama'!”
Nai Yahuda antoti he anseek nai Benyamin
18 Lalit nai Yahuda annao npaumak-maak nai Yusuf, ma naguab am nak, “Au 'baisenu ko, aam. Au uhine 'ak ho kuasam naan namnees nok kesel in kuasan kuun. Natuin lasij naan, naik muto'an kau, aam. Au 'toti meinuan he au uguab aan akle'og. 19 Nenog naan, ho mtoti kai mmak, ‘Hi ama' nok hi oli' tuaf es fe' esan keen, aa oo?’
20 Lalit hai mitae mmak, ‘Hai ama' namnasi nfiin je. Hai oli' aheti susug mese. Tabug nahonis, hai ama' namnais je. Aheti susug in tataf, anmate nalaal je. Sin nua sin, sin inaf anmate nalaal je. Ma tabug iij, hai oli' aheti susug naan, in anmees. Es na' hai ama' anneek nisan.’
21 Lalit ho mlelu kai he hai meki hai oli', he ho miit. 22 Es on naan hai mitae mmak, ‘Li'ana' le' nae, ka nuug he nnao nasaitan fa hai ama'. Kalu in nnao nasaitan ee te, hai ama' lo he nmate kuun nai, es le' naan.’
23 Es on naan, ho mutae mmak, ‘Kalu hi ka meki fa hi oli' nane, hi ka noi he miit amtein kau fa leen.’
24 Lalit hai mfaan. Hai mtee hai ama', hai mitoon mani lasin le' ho muguab sin moi kai. 25 Ala loog ate, hai mnaaht een oke een leh. Lalit hai ama' anleek kai he mfani iim amteni moi pah Masir he msoos amnahat. 26 Mes hai mitae mmak, ‘Aam honi'! Hai ka nuug he mnao fa moi ne ntein. Natuin kesel in tuaf mapalsa'ij, naguab nani mnak, kalu hai ka mok fa hai oli', hai ka nuug he miit amteni fa in human. Es on naan hai lo he meki hai oli' aheti susug nane fe', hena' hai mnao.’
27 Lalit hai ama' naguab am nak, ‘Hi mihine mani. Au feel bi Rahel in aanh een, tuaf nuug aah. 28 Ahunut annao namneek. Oni' mu'i fui nuug anpisug ma neku nalaal jel eeh. Es na' antee tabug iij, au ka 'iit a'tenij fa. 29 Kalu hi maiti meki aheti susug ee nteni ma'ko kau, ma in napeni amleut, hi mtao mteni kau susal moi au atoni mnasi' kau, he mate nai.’
30-31 Es on nane, au 'baisenu ko, aam. Kalu au 'fani 'oi au ama', mes au ka 'ok fa aheti susug le' iij, of lo hai ama' anmate kuun eeh. Natuin in asmanan anmafutu nok li'ana' ii. Ma in namnasi nfiin jeh. Es on naan kalu hai mtao mteni susal, in of anmaat. 32 Saa' antein, au 'paa' ulali noi au ama' 'ak, au utae li'ana' ii. Au 'paa' noi au ama', kalu au ka 'eki ufani' fa li'ana' iij noi ne, maut he au utae kuuk sanat naan, tal antee au 'maat.