Nai Yusuf na'oteb kesel pah Masir in unumait een
41
Toon nuug namsopu on nane, kesel pah Masir an'unumai. In an'unumai mnak, in anhake nbi noel Nil in panin. 2 Nok askeken ate, in niit bijael hiit anpook anmaten. Bijaen iij sin aok een nalim-liman. Sin anpoin na'kon noel naan in nanan, ma nekun ma'ug anbin naan. 3 Lalit anmu'i naan bijael hitu antein, anpoin na'kon noel naan. Sin aok een, anmolemun. Sin anhaken anpaumaak bijae apokat sin naan. 4 Lalit bijae amolemut sin naan, an'olo nani bijae apokat een naan. Es on naan kesel naskeek anfeen aah.
5 Tabug in antuup ma nfini nfaan, in an'unumai ntein. In niit anel punel hiit anpoin na'kon anel uu' mese le' nasbeeb anfiin. Sin punek een anaek ma manesa'. 6 Lalit in niit anteni anel punel hiit. Mes manas anhoi ma anin anfuu sin ma an'uknenen. Es on naan sin an'apa een. 7 Lalit ane apa' een naan an'olo naan ane mapune een naan. Lalit kesel anfeen. Na' in nahine nak, in an'unumai ntein.
8 Anmiu nfini on nane, kesel in tenab ka ntainina' fa. Es on naan in naplenat he no'en ale' kanan ahinet anbi pah Masir. Lalit in natonan sin unumait een naan, mes ka tiit fa tuaf mese, le' nabe'i na'oteb sin.
9 Lalit anaak balab loitan bukae-mninut noi kesel, na' namnau niit nai Yusuf. Es on naan in annao nbaisenu kesel ee mnak, “Au 'baisenu ko, aam! Ho atel kau, au 'saan. 10 Nahunut, tabug aam kesel ho musesu kau 'ok au aok-abjaan, ma mutaam kai mbi ume buij, 11 faij mese, hai nua kai m'unumai. Es-es nok in unumait ee kuun. Ma unumait een nane msa' sin otek een ka paap mese fa. 12 Anbi ume buij, anmu'i atoni Ibranis mese, fe' munif. Anaak ume buij naitij anjali anaak mepug anbi ume buij. Hai mitonan hai unumait sin naan. Es on naan in na'oteb sin. 13 Na'ko lasij naan, aam kesel ho muna'at mufani' kau au mepug. Mes au aok-abjaan, ho mhukum mu'matel. Lasin le' naan, namnees nok saa' le' atoni Ibranis naan na'oteb sin!”
14 Anneen on nane, kesel anleek tuaf he naen labah he neki nai Yusuf na'ko ume buij. Lalit nai Yusuf annao npiu' ma anseek in pakel, ma annao he nateef nok kesel. 15 In neem antee, kesel naguab noi ne mnak, “Anah! Au unumai, mes ka tiit fa tuaf mese, le' nabe'i he na'oteb unumait een naan. Mes anmu'i tuaf le' natoon kau nak ho mube'i.”
16 Es on naan nai Yusuf natael ee mnak, “Aam kesel. Ho atel kau msa' ka uhine fa saa'-saa'. Uisnenog anmese kuun es na'oteb ale' kanan unumait. Of oni' In anlomi he natoon ko tu'in alekot.”
17 Lalit kesel natoon unumait een naan. In nak, “Anbi au unumait ee naan, au 'hake 'bi noel Nil in panin. 18 Ma anmu'i bijae apokat hiit, sin aok een nalim-liman. Sin anpoin na'kon noel naan, ma annaon nekun ma'ug anbi noel naan in panin. 19 Lalit anmu'i bijael hitu antein neman. Mes bijaen naan anmolemun. Au fe' ka 'iit kuuk fa bijael human on le' naan anbi pah Masir ii! 20 Mes au 'sanmaak! Natuin, nok askeken, bijae amolemut een naan, an'olo naan bijae apookt een naan. 21 Sin n'olo nalali sin on nane msa', bijaen naan anmolemun nabaal aah. Lalit au uskeke' 'feen aah.
22 Lalit au 'tupa 'fini 'faan. Ma au unumai 'teni. Au 'iit anel punel hiit, anpoin na'kon anel uu' mese le' nasbebe anfiin. Sin punek een anaek ma manesa'. 23 Lalit au 'iit a'tein, anel punel hiit. Mes ani nuatus ee anfuu sin ma an'uknene een. Es on naan sin an'apa een. 24 Ma ane apa' een naan an'olo naan ane mapune een naan. Lalit au 'feen. Ma au utoon unumait een iij noi ahinet sin. Mes ka nmu'i fa tuaf mese, le' nabe'i he na'oteb unumait een naan.”
25 Lalit nai Yusuf anbaisenu mnak, “Aam kesel. Unumait een naan, sin otek een mese aah. Uisnenog natoon nani ko, saa'-saa' le' In he nmo'el. 26 Unumait een naan sin otek een on ii: bijae hitu apookt een naan, ma ane hitu mapune een naan, of es le' tabug amnahat een natha-hoe toon hiit. Sin otek een mese aah. 27 Ma bijae hitu amolemut een naan, ma ane punel hitu a'apa een naan, of es le' tabug amnahas toon hiit.
28 Es on naan Uisnenog natoon nani saa' le' In he nmo'el. On le' lelon au uguab. 29 Hit of tapeni tabug athoes toon hiit atbi pah Masir ok-oke'. 30-31 Lalit na' hit tapeni tabug amnahas toon hiit. Amnahas naan matani', tal antee ka tiit tani fa amnahat anbi hit pah ii. Ale' pah iij namnaah ok-oke', tal antee sin ka namnau nteni fa tabug amnahat een anhoen.
32 Es on naan aam kesel, ho mupeni unumait nono nuug le' naan, in oten nak, Uisnenog nafeek nalali nak, ka loog fa nteni te, saa' le' In nafeek sin naan, lo he anjalin.
33 Es on nane, au penit on ii: leko nneis aam kesel ho mami tuaf ahinet mese, le' an'ulus nahine nok alekot. Lalit ho maitij he n'atol ma naloitan lek-leko pah le' ii. 34 Tabug amnaah ahoet toon hitu naan, leko nneis aam kesel ho maiti tua teta' mese anteni, he in nabguab pena'-anel na'ko toog sin lelen. Pena'-anel naan anbati sin paaf niim, he nabelak paaf mese. 35 Sin lo he natuin aam kesel ho plenat, he sin ansimo pena'-anel na'ko kuan-kuan anbin pah Masir ii. Lalit sin lo he nabelak sin anbin umel le' he tabelak amnahat een. Lalit lo he npao sin lek-leek. 36 He tabug toon hiit amnahas naan antee te, hit fe' atmu'i mnahat. Kalu sin n'atol ee on le' nane, ka tiit fa tuaf he namnaah anmaat.”
Kesel pah Masir nasaeb soo-balu-pilug noi nai Yusuf
37 Anneen nai Yusuf naguab on nane, kesel ma in anaak anaet sin, anlomin he natuin in aguab een naan. 38 Lalit kesel naguab am nak, “Uisnenog In Asmanan ankuaas nai Yusuf le' ii. Es on nane, hit ka nuug he tapeni fa tuaf mese anteni, le' annesi na'ko nai Yusuf.”
39 Lalit kesel naguab nok nai Yusuf am nak, “Uisnenog natoon ko ale' kanan lasin ii. Tabug iij, hai fe' mihine mak ho atoni ahinet ko. Ma ho hinem aan annesi na'ko too mfaun. 40 Es on naan tabug iij, au 'aiti ko mjali au atoni mapalsa'it. Ho mjali anakaf ambi au sonaf. Au toog sin lo he natuin ho plenat een. Mes aal au 'mese, le' au 'nesi ko.”
41-42 Lalit kesel annosu in kaleli mamalak, ma napakeb noi nai Yusuf in aklulun. Ma in naguab am nak, “Nok lalan iij, au usaeb soo-balu-pilug noi ko amjali au atoni mapalsa'it anbi pah Masir ii.” Lalit in napakeb nai Yusuf soo-balu mnanu ma'upa' mese, ma na'inub inuh amnatu mese.
43 Lalit in nana'at in kaleta bijakasel mese anteni', he nai Yusuf ansae. Anmu'i tuaf-tuaf naen anbin kaleta naan in matan ma ankua' een tenij-tenij am nak, “Awoo! Misoitan lalan! Amtola ma mbaisenu!a Anaet ee, he nkoen on anfiin!” Nok lalan naan, kesel naiti nai Yusuf anjali in atoni mapalsa'ij anbi pah Masir.
44 Lalit kesel naguab nok nai Yusuf am nak, “On ii. Ho muhine mani, au le' iij kesel. Au utoon ulali toog pah Masir 'ak, kalu ho ka mkolen sin fa te, sin ka nabe'in fa he anmo'en saa'-saa'.”
45 Lalit kesel nakanab nai Yusuf am nak, Safnat Panea, natuin abiten Masir sin kaank een. In nasaob nai Yusuf nok li' feto munif es, in kanan bi Asnat. Nai Yusuf in na'if, kanan nai Potifera. In es le' nanaak lasi palsait anbi koot On.b Nok lalan naan, nai Yusuf anjali atoni makana' ma mateka' anbi pah Masir.
46 Tabug sin nasaeb nai Yusuf soo-balu-pilug, in nmoni naan toon bo' teen goen. Lalit in nnao anfuun ma nateef kuan-kuan ma balel-balel anbi pah Masir. 47 Anbi tabug athoes toon hitu naan, sekit ma mnonut nathoen. 48 Lalit nai Yusuf annao ma nabguab sekit ma mnonut anneisi ntein, ma nabelak sin anbin umel le' he nabelak amnahat een. Sekit ma mnonut na'ko balel-balel le' npaumaak koot meel te, in nabelak sin anbi ume belak abguat anbi koot naan. 49 Tal antee anel le' in nabguab ma nabelak sin naan, namfau le'uf. On le' asnaen et tasij ninen, tal antee ka tiit fa tuaf mese, le' nabe'i nso'i naan sin.
50 Tabug amnahas naan ka ntee fa fe', nai Yusuf in feel bi Asnat nahoni' li'aan mone nuug. 51 Es on naan nai Yusuf naguab am nak, “Uisnenog anmo'e kau ma au 'niken 'ani au susal tabug au 'poi a'ko au ama' in umel.” Es na' in nakanab in aan mone unu', nai Manase (le' oni' paap mese on le' kata mese anteni, nak ‘niken’).
52 Tabug in napeni li'aan mone muni' ee te, in naguab anteni mnak, “Au upeni susal am mane'at namfau 'bi balel ii. Mes Uisnenog anfee kau tetus, ma au uhoni' abi ii.” Es on naan in nakanab li'ana' naan, nai Efraim.c
53 Lalit tabug athoes toon hitu naan namsoup. 54 Ma tabug amnahas toon hitu naan anmulai ntaam, namnees nok le' nai Yusuf naguab nanij. Anbi balel-balel, amnahas ee antaman sin, mes anbi pah Masir, anmu'i amnahat, natuin sin nabelak anbi ume belak abguat. 55 Ala loog on nane, abiten pah Masir anmulai namnahan. Lalit sin annaon ma ntotin amnahat na'ko kesel. Es on naan kesel anleek sin he nnaon noi nai Yusuf, he natuin in aplenat.
56 Mes amnahas naan matani' le'uf. Tal antee balel-balel anbi pah Masir in nanan napenin amnahas ok-oke'. Es on naan nai Yusuf anmulai nasoitan ume belak amnahat sin ma nasosa' pena'-anel noi abiten Masir. 57 Lalit tuaf abjaan sin na'kon meel am meel neman ma ansosan amnahat na'kon nai Yusuf anbin pah Masir. Natuin tabug amnahas naan namneo-namneo matani'.