Atoni buij nuug an'unumain, ma nai Yusuf natoon sin otek een
40
1-3 Anbi ume buij naan, anmu'i naan anaak mepug tuaf nuug le' anmepu nitan anbin kesel pah Masir in sonaf. Es nanaak mepug balab loitan bukae-mninut noi kesel; ma es antein nanaak mepug balab loitan bukae-kokis noi kesel. Sin nua sin anmo'en sanat noi kesel. Es na' kesel ee natoo', ma nataam sin noin ume buij. Es on naan sin nabguan balel mese nok nai Yusuf anbin ume buij naan. 4 Lalit anaak ume buij naan naplenat nai Yusuf he n'ulus anakaf tuaf nuug le' naan. Sin nabguan anbin ume buij naan, tal antee oni' toon es ai' toon nuug.5 Faij mese, tua nua' een naan an'unumain. Es-es, nok in unumait ee kuun. Ma unumait een naan amsa' sin otek een ka paap mese fa. 6 Anmiu on nane, nai Yusuf neem ma niit atoni nua' een naan, sin nhuum sanan. 7 Lalit in antoti sin am nak, “Nansaa' am es nenog ii hi mhuum 'saan on naan?”
8 Es on naan sin nataen am nak, “Faij ii, hai mismaan. Mes hai ka mihine fa in oten.”
Lalit nai Yusuf natae sin am nak, “Ka tiit fa mansian es, le' he nahine nani unumait een sin otek een naan, aal Uisnenog es le' nahine sin. Mitoon miit kau hi unumait een naan. Maut he au 'ami 'iit sin otek een na'ko Uisnenog.”
9 Lalit anaak mepug balab loitan bukae-mninut noi kesel naan, natoon am nak, “On ii. Au unumai m'ak, au 'iit hau anggur uu' mese, 10 to'ef teen. Haug naan nanoo, nasuuf, ma nafgua kii'-kii' tal namnatun. 11 Es on naan au 'iit, au 'naa' kesel in aklaa oel. Es on naan au 'aiti haug naan in afguan amnatus, ma au 'aes noi klaas oel naan. Ma au 'nona' ee noi kesel he nbukae.”
12 Anneen on nane, nai Yusuf natoon ee mnak, “Aam. Unumait naan in oten on ii: to'ef teen le' naan, in oten nenog teen. 13 Anbi nenog tenu amnemat le' iij, kesel of napoitan ko na'ko ume buij ii. Lalit in nasaeb nafani soo-balu-pilug noi ko, he munaak amfani moi balab loitan bukae-mninut noi ne. 14 Kalu ho guam aan naleko on nane, naik amniken kau, oo! Kalu ho mneek kau te, ambaban kau he mutoon moi kesel ee, he napoitan kau na'ko balel ii. 15 Natuin, kalu he tail lasij ee in amneot, sin naiti kau nok aseke' na'ko abiten Ibrani sin pah. Anbi balel iij amsa', au ka 'mo'e fa lasi amle'ut mese amsa'. Mes sin nheke kau ma nataam kau noi ume buij, on le' atoni maufinu.”
16 Anneen niit unumait naan in oten ee naleko nmaat, on nane, anaak balab loitan bukae-kokis noi kesel naguab noi nai Yusuf am nak, “Ba'e! Au unumai amsa' on ii: au 'suu aba' aktuta' teen. 17 Aba' aktuta' fafon, matua' nok kokis huma'-huma' noi kesel. Mes kolon sin neman ma nloto nani kokis een le' anbin au 'nakak.”
18 Anneen on nane, nai Yusuf natael ee mnak, “Aam! Ho unumait naan in oten on ii: aba' tenu een naan, sin otek een nenog tenu msa'. 19 Nenog tenu amnemat le' iij, kesel of anleek tuaf he neem anketu nani ho 'nakam. Lalit sin nkaton ho aom anaen naan noi nii ma'aika'. Ma kolon sin neman, anpisun ma nloto nani ho aom sisim maan ok-oke'.”
20 Nenog tenu ankono on nane, nateef nok kesel ee in neno maihonin. Es on naan in anmo'e fesek noi in anaak mepug sin ok-oke'. In naplenat he sin annaon napoitan anaak mepug tuaf nua' een le' anbin ume buij. 21 Lalit in nasaeb soo-balu-pilug anfani noi anaak balab loitan bukae-mninut, he nanaob nafani' in mepug.
22 Mes anaak balab loitan bukae-kokis noi kesel aan, sin nkaton in ta'un ee, namnees nok saa' le' nai Yusuf in aguaban.
23 Mes anaak balab loitan bukae-mninut naan, anniken nani nai Yusuf.