3 Lalit nai Yusuf in tataf sin le' tuaf bo'es naan, naloit een he annaon nsosan amnahat noin pah Masir. 4 Mes nai Yakop ka nkolen fa nai Yusuf in olif nai Benyamin he nok sin. In natenab am nak, “Naik-naika li'ana' naan napeni amleut amsa' on le' in tataf.” 5 Anbi meel am meel, tuaf abjaan sin annenan nalalin nak anmu'i mnahat et pah Masir, es on nane, too mfaun annaon ma ansosan amnahat anbin naan. Amnahas naan, lo nanaob on anteen pah Kana'an amsa'. Lalit nai Yakop in aanh een^a annaon ma nsosan amnahat anbi nael amsa'.

6 Tabug naan, nai Yusuf anjali tuaf mapalsa'ij noi kesel pah Masir. Kalu sekom-sekog neem na'ko meel am meel he ansoos pena'-anel, nai Yusuf es nasosa' anfeen sin. Es na' tabug in tataf sin neman nteen, sin nli'tuun ma ntola, tal antee sin anneek naijaan. 7-8 Tabug in niit sin on nane, in nahine nani sin. Mes nai Yusuf anmoo'l on on le' atoni Masir, es na' sin ka nahinel fa. Lalit in antoti sin nok haan maslaal am nak, “Hi le' iij, ma'ko mee?”

Sin nataen am nak, “Ho aten kai ma'ko pah Kana'an. Hai iim he msoos amnahat na'ko ko.”

9 Lalit nai Yusuf namnau in unumait een neno ahunut fe'. In haka'tau sin am nak, “Au ka 'palsai ki fa! Hi of amata' ki. Hi iim mami he mihine pah Masir in lasi manifa' een, lalit hi mbelok amfaan he iim ma ammabaan kai, ai'?”

10 Mes sin nataen am nak, “Kahaf, aam! Hai le' iij aal ho atel aa kai. Namneo-namneo hai ala iim he msosa haa amnahat. 11 Hai ala kai le' iij, hai amaf mese. Hai ka amata' kai fa, aam! Hai atoni alekot kai.”

12 Mes nai Yusuf naguab naheel am nak, “Hoi! Hi mimoe. Naik amputa-kliun kau! Au uhine 'ani 'ak hi amata' ki. Hi iim he mami pah le' ii in lasi manifa' een!”

13 Lalit sin naprotes matani'. Ma sin nataen noi nai Yusuf am nak, “Kahaf! Hai le' ii aal ho atel aah kai. Hai iim ma'ko pah Kana'an. Hai amma'olin-tatan bo'es am nuug. Hai ala kai amaf mese. Hai oli' aheti susug nabalah nok hai ama'. Ma hai olif es anteni', annao namneek.”

14 Nai Yusuf natae sin am nak, “Kahaf! Namneo aguab le' lelon au uguab ee naan. Hi le' iij lo amata' ki. 15 Es on naan hi lo he mfee kau bukti fe', he au uhine 'ak hi aguab een lelon na namneo, ai' kaha. Au 'suup! Kalu hi oli' aheti susug ka mok ne fa neem noi iij ee te, hi ka mibe'i fa he mnao misaitan pah le' ii! 16 Es on naan hi mpili maan tuaf mese he annao naan hi oli' neem noi ii. Abjaan sin, au 'tahan sin. Au he 'iit, hi aguab een naan namneo, ai' kaha. Kalu kahaf, namneo, hi le' ii amata' ki.” 17 Lalit nai Yusuf anlelu ma nataam sin noi ume buij ee nanan, nenog teen.

18 Nenog tenu on naan te, nai Yusuf annao ma naguab nok sin anbin ume buij ee mnak, “Au le' iij, umtausan Uisnenog. Ma au utuin In lomin piut-piut. Au ufetin ki he hi mmoon. Mes hi lo he minokab aguab mese. 19 Kalu hi aguab een namneo-namneo tebe te, hi lo he miklila' kau bukti. In laal poit on ii: au 'tahan tuaf mese anbi ume buij le' ii. Hi bian amfani moi hi pah, he meki mnahat moi hi nonot sin. Natuin sin anpao ki he mekin sin amnahat. 20 Lalit hi iim meki hi oli naan, he anjali bukti mese, nak hi atoni neek amneot. On nane, hi ka mimoe kau fa. Maut he nok lalan nane, au naik a'hukum umate ki.”

Sin anneen on nane, sin anlomin. 21 Lalit sin naguab een es nok es am nak, “Neu! Leek gue! Tabug ii hit tapeni hit amo'ek nenog naan in neesn eel eeh. Hit tmo'e le'uf noi hit oli'. Hit tail tiit noi in ansuus anmaat, in ntoti neki haan sakoit he hit atbaban, mes hit ka tfalolij fa. Es on naan tabug iij, hit atsuus on le' iij ee msa'.”

22 Es on naan nai Ruben namnaub sin am nak, “Hoi, sin au oli' ala ki. Nenog naan au 'taal ki, he naik minsaa'-saa' li'ana' naan! Mes hi ka mlae maan fa au guabak naan. Es on naan tabug iij, hit atsiu in afguan eel een. Nai Usu in naa' ee ansaen kit eeh.” 23 Sin naguab een on le' naan, mes sin ka nahinen fa noi nai Yusuf nahine sin aguab. Natuin tabug nai Yusuf naguab nok sin, in anpake aguab Masir. Lalit na' anmu'i aneteb aguaban nabaino' ee noi sin anpake aguab Ibrani.

24 Anneen sin naguab een on nane, nai Yusuf annao nasaitan sin, ma ankae nmes-mees anbi balel le' tuaf abjaan sin ka niit ee fa. Tabug in ankae nalali te, in anfani neem noi sin. Lalit in anleek tuaf ma anfutu nai Simeon anbi in olif-tataf sin humak ma sin matak.

25 Lalit nai Yusuf naplenat in ameput sin he nalain pena'-anel noi in taatf een sin kalon. Ma sin lo he antao nafani' loit een anbin kalon sin feefk een. Lalit ansoo sin. In anlelu he anfeen sin bukael amsa'. Ameput sin naan anmo'en natuin nai Yusuf in aplenat. 26 Lalit nai Yusuf in tataf sin nasaeb kalon naan noin sin bijakase keledai een. Lalit sin anpoin ma annaon nasaitan pah Masir.

27 Anbi lalan atnanan, sin nasnasan. Tabug tuaf es anfai in kalog he nhao in bijakase keledai, in niit in loit een anbin kalog fefan. 28 In naskeek! Es on naan in no'en in olif-tataf sin am nak, “Hoi! Hi iim he mail miit iij ee fe'! Hit tmate tkoon! Sin ntao nafani' au loit een es au kalog.”

Nail niit on nane, sin neek een namnekun. Sin namtau nmaten. Lalit sin naguab een am nak, “Uisnenog anmo'e saa' anteni es le' iij noi kit?”

29 Lalit sin nnaon nfinin. Anteen Kana'an on nane, sin natu'in noi sin amaf, saa'-saa' le' sin annaben niit, anmulai na'ko sin anbin pah Masir, tal antee sin nfani neman. 30 Sin natonan am nak, “Aam honi'! Kesel pah Masir in tuaf mapalsa'ij, matani' le'uf. In naguab aah amsa', ka tiit fa haan malule'. In nasuub ma ntu'matan kai, mnak hai mnao mimata' in pah. 31 Mes hai mitae mmak, ‘Kahaf, aam! Hai miguab namneo-namneo, aam. Hai ala kai le' iij, ka amata' fa. 32 Hai atoni neek alekot kai. Hai amma'oli-tatan tuaf bo'es am nuug. Hai amaf mese. Mes tuaf es na'ko kai, annao namneek, ma aheti susug nabaal aah nok hai ama' et pah Kana'an.’

33 Lalit kase naek ee nak, ‘Au he 'sobal ki. Hi atoni amneot, ai' kaha. Hi tuaf es lo he nabalah anbi ii. Hi bjaan amfani, meki mnahat moi hi nonot sin, he sin naik namnaah anmaten. 34 Hi lo he meki hi oli' neem noi iij ee fe'. Nok lalan nane, na' au uhine m'ak hi ka amata' ki fa, mes namneo-namneo hi atoni neek amneot. Es on naan au of ufetin hi benu' le' au 'tahan ee le' naan. Ma au 'kolen ki he mnao moi meel am meel aah, ambi pah le' ii.”’

35 Anpe'o nalalin on nane, sin anpukai sin kalon. Sin naskeken, natuin sin es-es, niit sin loit een anbin sin kalon. Niit on nane, nai Yakop nok in aanh een namtau nmaten.

36 Lalit nai Yakop naguab nok sin am nak, “Hi mo'em een, es na' au aanh een namnekun. Nai Usu namneek goen. Nai Meon antein. Tabug iij hi he meki mteni nai Min? Namneo-namneo hi he mha'mu'i kau, es le' ii!”

37 Es on naan nai Ruben naguab noi in amaf ee mnak, “Aam honi'! Amfee kau nai Min. Au utae. Au 'paa' 'ani, au lo he 'uum 'ekij anfani neem noi ko, aam honi'. Mes kalu kaah fa te, aam honi', ho mlolo au aan mone nua' een naan.”

38 Mes nai Yakop naguab am nak, “Kahaf! Ka nabe'i fa he hi meki nai Min. In tataf nai Usu anmate nalaal je. Tabug iij, aal in anmees. Kalu in napeni amleut anbi lalan atnanan, hi misusab miis kau, au atoni mnasi' iij, tal antee au 'taam 'oi opu 'maten.”^b