Nai Yusuf, ma kase naek Potifar in feel
39
1-2 Nenog nane, atoni Ismaelas sin neki nai Yusuf annao noi pah Masir. Anbi naan, anmu'i kase naek mese, kanan nai Potifar. In le' naan, anakaf noi ale' solalus sin le' anpao kesel pah Masir in sonaf. Nai Potifar ansoos nai Yusuf na'ko asosa' sin naan, he in naitij anjali atel anbi in umel. Anbi naan, UISNENOG anbaban nai Yusuf. Es on nane, in mepug sin ok-oke' nanaob on nok alekot. 3 In usi' nail nai Yusuf in mepug sin naan lo lekog, in nahine namneo-namneo nak UISNENOG anbaban nai Yusuf. 4 Es on nane, aam usif naan anlomi haa nai Yusuf, ma anpalsaij. Es on naan in naiti nai Yusuf anjali opaas noi in umel. In annona' in umel he nai Yusuf an'ulus. In bale' pusaak sin, nai Yusuf es an'ulus sin amsa'. 5 Natuin nai Yusuf natgua nbi naan, es na' Uisnenog anfee tetus noi in aam usif, atoni Masir naan. In umel nanan, in pusaak sin, in lelel-po'an, ma in mepun naan nanaob on nok alekot. 6 Tabug nai Potifar niit nai Yusuf in mepug sin lekog ok-oke', in ka natenab fa saa'-saa' antein. In nahine he naah haa.Tabug naan, nai Yusuf in aon ma in human, naleko nmaat een. 7 In natgua anbi nael ka loog fa, mes nai Potifar in feel in nekan anmofu noi ne. Es on naan in na'oki' nai Yusuf he kalu lekog sin nua sin antupan.
8 Mes nai Yusuf ka nlomi fa. In natael ee mnak, “Naika on naan! Au aam usif Potifar anfee kau kuasat he 'ulus in mepug ok-oke. 9 Anbi umel iij, ka tiit fa tuaf le' annaa' aplenat annesi kau. Aam usif nana'at kau ale' saa'-saa' he 'ulus sin. Mes in ka nana'at ko fa noi kau. Nok lalan mee, he au 'mo'e lasi amleut le' ii? Lasij naan, nasuli nok Uisnenog In lomin amsa'!”
10 Maski on nane msa', mes nai Potifar in feel na'oki' nai Yusuf piut. Mes nai Yusuf ka nloe natuin ee fa.
11 Tabug mese, nai Yusuf antaam noi umel he nail mepug. Nenog naan, ka tiit fa tuaf mese anbi naan. 12 Es on naan bifeel naan neem ma nnaa' nai Yusuf in soo-balug, ma anheel ee mnak, “Uum nai! Hit nua kit atmes-mees. Uum he hit ttuup nai.”
Mes nai Yusuf ka nlomi fa. Es on naan in namaunum anpatik on, tal antee in soo-balug naan natkasu' naan. Ma in naen anpoi. Mes bifeel naan annaa' natau nai Yusuf in soo-balug.
13 Tabug nai Potifar in feel niit nai Yusuf naen nasaitan in soo-balug, 14-15 in no'en ameput sin, ma natonan sin am nak, “Hoi! Hi iim he mail miit! Lelon atoni Ibranis naan, antaam anbi au ke'an. In he nmo'e amle'ut noi kau, mes au 'kua' uheel 'aan jok. Mail miit, in naen ma nabelak nani in soo-balug. Au monel, in naiti neki naan kuun atoni amaufinut ii he nmo'e nama-maeba kit!”
16 Es on naan nai Potifar in feel annaa' soo-balug naan, tal antee in monel anfani neem. 17 Tabug in monel anfani neem, in natoon am nak, “Amneen! Atoni Ibrani le' ho maiti mekij neem nok kit naan, lelon in ntaam noi au ke'an. In he napaisa kau nok aseke'! 18 Mes au 'kua' uheel 'aan jok ma 'o'en ameput sin. Es on naan in naen namneek, nabelak nani in soo-balug ii.”
19 Anneen in feel natoon on nane, nai Potifar natoo' matani'. 20 Es on naan in anleek tuaf ma annaon nheke nai Yusuf. Ma sin nataam ee nbi kesel in ume buij.
21 Mes UISNENOG ka nniken fa nai Yusuf. Es on naan In anbaban piut, tal antee anaak ume buij naan anneek nisan. 22 Lalit in npalsai nai Yusuf. Es on naan in anfee ne kuasat he n'ulus atoni buij sin ma ale' kanan mepug anbi ume buij nanan. 23 Es on nane, anaak ume buij naan in ka natenab fa mepug saa'-saa' anbi ume buij. UISNENOG anbaban nai Yusuf piut-piut, es na' in mepun anbi ume buij nanaob ok nok alekot.