Nai Yahuda ma in upuf bi Tamar
38
Lalit nai Yahuda annao nasaitan in olif-tataf sin, ma natgua nok in amnono lekog nai Hira anbi kuan Adulam. 2 Anbi naan, anmu'i anaef mese, atoni Kana'an, in kanan nai Sua. Nai Yahuda anlomi in aan feto mese. Lalit in ansaog. Ma in nahoni' li'aan monel anma'akatuin een. 3 Aan mone unu, sin nakanab nai Er. 4 Aan mone tnana', sin nakanab nai Onan. 5 Lalit aheti susug, kanan nai Sera. Tabug nahoni' nai Sera, sin natnanin noi kuan mese, in kanan, Kesip.6 Tabug aan mone unu nai Er nanae', nai Yahuda annao neki bale futus he ntoti li' feto munif mese, in kanan bi Tamar. Lalit nai Er ansao bi Tamar. 7 Mes nai Er naan atoni maufinu. Es nane, Uisnenog anhukun namatel. Es on naan nai Er anmaat, mes ka nmu'i fa anah.
8 Lalit nai Yahuda anlelu aan mone tnana' mnak, “Onan! Ho tata' anmate nalaal je, mes in ka nmu'i fa anah. Es on naan tabug iij, tatuin atoni mnasi sin halat, ho lo he mseek ho tata' he msao in feel. Nok lalan nane, maut he ho muhoni' li'ana' noi ho tata' in paa'.”
9 Nai Onan nahine halat naan. Mes in ka nlomi fa he nahoni' noi in tataf nai Er. Es on naan tabug in antuup nok bi Tamar, in akmiin oen ee n'oop ee npoi henati' bi Tamar naik na'apu' he nahoni'. 10 Nai Onan anmo'e on naan, es on naan nato'ab niis Uisnenog. Manum Uisnenog anhukum niis ne msa'.
11 Tabug nai Yahuda nail in aan mone nua' een le' ansao bi Tamar nane anmaten, in namtau. In natenab, naik-naika in aan mone aheti susug nai Sera ansao bi Tamar, of in anmate msa'. Es on naan in nnao natonan in upuf bi Tamar am nak, “Tamar! Leko nneis ho mfani moi ho amaihonit sin. Kalu au anah nai Sera nanae', na' ho mfani uum he msaog.” Lalit bi Tamar anfaan.
12 Ka loog fa te, nai Yahuda in feel ee anmaat. Es on naan in nkae ma ansuus tal antee neno nukat sin namsopun,a in no'en in amnono nai Hira, he sin nua sin annaon noin kuan Timna. Anbi naan, atoni sin ankateli abibi-kasen sin funuk een, he nasosa' sin. Akatelis een namfaun ma sin fesek een amsa'.
13 Es on naan tuaf abjaan sin natonan bi Tamar am nak, “Ho aam na'ij annao et Timna, he n'ulus tuaf akateli funu noi in abibi-kasen.”
14 Tabug naan, nai Yahuda in aan mone aheti susug na'nae nalaal je. Mes bi Tamar nahine nalali nak in na'if ee ka nlomi fa he nai Sera ansaog. Es on naan bi Tamar nami lalan he ntoti in paa'. In anseek nani in tai-kulut een, lalit in anpake tais alekot. In anpake lipa ma ansaklubu naan in human. Lalit in nnao antoko anbi eno' he ttaam toi kuan Enaim, anbi le' lalan he tnao toi Timna. 15 Tabug nai Yahuda annao npe'o kuan naan in laal tamas, in niit bifeel es. In natenab am nak oni' bifee fetog, natuin bi Tamar in bale pakel on le' bifee mahai le' ansimo loit. Anneis-nesij in ankuub naan in human. 16 Nai Yahuda ka nahine naan fa nak, bifeel naan in upuf. Es on naan in annao anpaumaak bifeel naan, ma antotij ee mnak, “Hoi! Kalu ho mlomi, au 'tuup 'ok ko. Ho mtoti fauk?”
Mes bi Tamar natael ee mnak, “Es le' ho. Ho lomim maan on mee, au utuin aah.”
17 Nai Yahuda ntabal am nak, “On meel kalu au 'fee ko abibij mese, ho mlomi, oo?”
Lalit bi Tamar natael ee mnak, “Lekog. Lamun ho mfee kau bale' mese fe'. Leek-leka' ho msonu' abibij naan, na' ho msimo mufani' ho bale' manta'en le ii.”
18-19 Es on naan nai Yahuda antoti ntein je mnak, “Au he 'fee ko bale' saa'?”
Bi Tamar natael ee mnak, “Ho mfee kau bale' malula' le' ho mukfilit ee naan nok nani in tanin. Lalit ho tees nane msa'.” Es on naan nai Yahuda anfee bale' een naan.
Lalit sin nua sin antuup nabguan. Ma bi Tamar anfaan. In nkasu nani in tai-pake alekot naan ma in lipa, lalit in anpake nafani' in tai-kulut een. Namuni te, bi Tamar annaben nak in na'apu' nalaal je.
20 Ka loog fa nteni te, nai Yahuda antoti babat na'ko in soob leko nai Hira mnak, “Ho meki 'bibij ii moi bifee fetog le' et Enaim, he msimo maan kau au bale' een le' in annaa' sin.” Nai Hira annao ntee Enaim. In antoti nuu-mneem, mes ka niit ai' ka na'eku fa bifeel naan. 21 Es on naan in antoti abiten balel nane mnak, “Au he 'toti 'aan. Hi miit bifee fetog mese, le' bijaas antok-toko nbi kuan in eno' 'tama' ee, oo? In et mee?”
Mes sin nataen am nak, “Aam, ka tiit fa bifee fetog et ii.”
22 Es on naan nai Hira anfani neem noi nai Yahuda. In natoon am nak, “Au ka u'eku 'aan fa 'ok bifeel naan. Au 'ami ma 'hae 'maat, mes abiten nael nak, ka tiit fa bifee fetog anbi naan.”
23 Nai Yahuda natael ee mnak, “Maut he in npaal bale' een naan! Lamun tuaf abjaan sin naik namaeba' kit. Natuin au he 'baen, mes hit ka ta'eku fa bifeel naan.”
24 Anfini funan tenu on nane, tuaf abjaan annaon ma natonan nai Yahuda mnak, “Ho upuf bi Tamar naan, anmoo' lon on le' bifee fetog. Tabug iij in na'aap.”
Anneen on nane, nai Yahuda natoo' anmaat. Lalit in anlelu tuaf atonas nane mnak, “Amnao amheel meki kau bifeel nane neem noi iij, he totug ahon-honis!”
25 Lalit sin annaon ma nheel neki bi Tamar. Mes in naiti napoin bale' mamalak ma tees naan. Ma in anleek tuaf he nnao natoon noi in na'if ee mnak, “Aam. Amtae mulek-leko' bale' een le' iij fe'. Tuaf le' anmu'i bale' mamalak ma tees le' iij, in es le' na'apus kau.”
26 Nail niit bale' een nane, nai Yahuda nahine nani nak bale' een naan, lo inin. Lalit in naguab am nak, “Namneo! Bifeel naan ka nsaan fa. Au es le' asanat. In namneo. In amneot, au lo he matsaob ee nok au anah nai Sera, mes au es le' ka 'lomif. Amnao mifetin ee nai!” Lalit nai Yahuda ka ntuup nabgua nteni fa nok bi Tamar.
27 Bi Tamar in tabug he nahoni anteel ee. Es on naan in nahoni' li'ana nuug le' ankuan sin. 28 Tabug in nahoni', li'aan es in animan anpoi nahuun. Bifee amnail amaihonit anfutu' aba mtasa' anbi in animan. In nak, “Le' iij, es le' ahunut.” 29 Mes li'ana' naan anheel nataam in animan anfaan. Lalit in koen ee anpoi nahuun. Es on naan bifee atusis naan nak, “Hoi. Ho lo matani', oo! Es manum ho musiik ma ampoi muhuun!” Lalit sin nakanab li'ana' naan nai Peres (le' in oten nak, ‘nasiik he npoi’). 30 Lalit na' in olif le' mafutu aba mtasa naan anpoi. Sin nakanab nak, iij nai Sera (in oten ee nak ‘amtaas le'uf’).