Nai Yakop anfani neem noi pah Kana'an
37
1-2a Le' iij, nai Yakop sin tu'in. Nenog mese, nai Yakop anfani nteni, ma natguan anbin pah Kana'an, le' in amaf nai Isak natgua anbi naan na'ko unu'.Nai Yusuf nok in tataf sin
2b Tabug naan, nai Yakop in aanh es na'ko in feel bi Rahel, kanan nai Yusuf. Tabug in nmoni naan toon bo'es am hiit, in nok in tataf sin bijaas annaon natuku' sin abibin ma abibi-kasen nabgua. In tataf sin, nai Yakop in feel bi Bilha ma bi Silpa sin aanh een. Nai Yusuf le' iij, in aloi lasij noi in amaf, anmatoon nok in tataf sin, sin amo'ek een.
3 Tabug nahonis nai Yusuf, nai Yakop namnaas je. Es on naan in anneek nanes-nesib nai Yusuf na'ko in anah abjaan sin. Tabug mese nai Yakop antoti tuaf he nsoo soo-balu mnanu es lekon kah,a ma anfeel ee noi nai Yusuf. 4 Tabug in tataf sin niit nak sin aamf ee anneek nanes-nesib noi nai Yusuf, sin na'unu' nai Yusuf, tal antee sin ka nlomin fa he naguab een nokan.
5-7 Faij mese, nai Yusuf an'unumai. Lalit in natoon unumait naan noi in tataf sin am nak, “Hoi! Hi mneen fe'! Au unumai mnak hit tfutu hit ane-gandum sin anbi lelel. Ma au anel malefi' le' mafutu een naan, anfeen anhaken amneof aah. Mes hi anel sin anhaken anfuun am nateef naan au nuug, lalit naluli een ma nabesan noin au nuug.” Annenan on nane, in tataf sin na'unu' antenij.
8 Lalit sin nakain nai Yusuf am nak, “Hoi! Ho mak oni' ho he mjali kesel he muplenat kai, oo?” Sin neek menan ee matani', natuin in natoon unumait naan noi sin.
9 Lalit nai Yusuf an'unumai ntein. Es on naan in natoon noi in tataf sin am nak, “Hoi! Au 'unumai a'tein. Au 'iit manas, funan, ma kfuun bo'es am mese. Sin naluli een ma nabesan noi kau lek-leek.” 10 Tabug nai Yusuf natoon nalali unumait naan noi in amaf ma in tataf sin, in amaf nakain nai Yusuf matani' mnak, “Unumai saa' es le' naan! Ho mutenab mak, au 'ok ho ina' ma ho tata' sin neman he anneek ho haem een, oo? Ho lomim maan!” 11 Es on naan nai Yusuf in taatf een na'unu' namneo-namneo. Mes in amaf natenab unumait een naan anbi in nekan.
Sin nasosa' nai Yusuf he anjali atel anbi pah Masir
12 Tabug mese, nai Yusuf in tataf sin neki sin amaf in abibin ma abibi-kasen annaon npaumak-maak kuan Sikem. 13 Ka loog fa te, in amaf nak, “Usu! Ho tata' sin natukun mu'it anpaumak-makan etan Sikem. Es on naan ho muloitan he mnao mail miit sin fe'.”
Nai Yusuf natael ee mnak, “Lekog, aam.”
14 Lalit in amaf nak, “Ho mnao mail miit ho tata' sin nok mu'it een fe'. Sin on mee? Lekon ka, ai' on mee? Lalit ho mfani uum he mutoon kau.”
Lalit nai Yusuf annao nasaitan amnefu' pah Hebron ma ankono ntee Sikem. 15 Antee nae le' te, in nami sin anfuun am nateef anbi amnefu' naan. Tabug in na'eku tuaf mese, tuaf naan antoit je mnak, “Ho mami saa'?”
16 Nai Yusuf natael ee mnak, “Aam, au 'ami au tata' sin. Sin anpoo' neki hai mu'it een he nhao sin anpaumak-maak anbin balel ii. Ai' ho miit sin, aam?”
17 Tuaf naan natael ee mnak, “Sin ka etan fa iij antenin. Mes sin nak he nnaon ntenin anpaumak-maak kuan Dotan.”
Lalit nai Yusuf annao natuin sin, tal in niit sin anbin Dotan. 18 Mes tabug nai Yusuf fe' anbi loog, sin niit nalalij leh. Es on naan sin nma'akolan he nlolog. 19 Lalit sin nmaguab een am nak, “Hi mail miit. A'unumait ee neem een! 20 Iim nai he tlolo tisan. Lalit hit taiti tpolin ee noi abola' oe hani mese anbi ii. Lalit hit tatonan hit ama' mtak, mu'i fuij sin anpisug ma neku nalalij len! Mautu he hit tail tiit in unumait een on meel!”
21 Anneen on nane, in tataf nai Ruben nami lalan he nafetin naan nai Yusuf. Es on naan in nakain in olif een am nak, “Hoi! Hit naik atlolog! 22 Leko nneis, hit tpolin tataam ee noi abola' oe hani' le' ii. Balel iij, bale luman. Es on naan ka tiit fa tuaf le' nahine mo'et le' ii. Lamun hit naik atmo'el he naa' ee nsai.” In naguab on naan, natuin in he nafetin nai Yusuf he anlelug he nfaan.
23 Tabug nai Yusuf neem antee, sin nhekel ma nkasu nani in soo-balu alekot naan. 24 Lalit sin nheel anfonat, ma npolin nataam ee noi abola' oe hani' naan.
25 Lalit sin anbelok anfanin ma anbukaen. Sin fe' anbukaen on nane, nok askeken sin niit atoni' pukan mese neman. Pukan amneemt een naan anpaken bijakase unta. Sin nasaeb een bale' he nasosa een. Bale' sosa' een naan es le': hau foo meni' in oen, fukal huma'-huma', ma hau malog huma'-huma'. Ankis-kison ate, pukan amnemat sin naan, atoni Ismaelas sin le' neman na'kon kuan Gileat. Sin he nnaon noin balel aloo noi pah Masir.
26 Lalit nai Yahuda naguab noi in olif-tataf sin am nak, “Hoi! Leko nneis on ii. Hit naik atlolog. Hit tapeni saa'? Maski on meel amsa', hit ka nuug fa he takolo' taan in naa'. 27 Leko nneis hit tasosa' noi atoni Ismaelas sin. Maski hit atmo'el on meel ee msa', hit oli honi ee. Es on naan hit naika tamenab.” Lalit sin nma'akatu'in lasij naan.
28 Es on naan tabug atoni asosat sin naan he nkonon,b nai Yusuf in tataf sin anheel napoitan na'ko abola' naan. Ma sin nasosa' noi atoni Ismaelas sin. In upan loi muti' afgua' bo' nuug.c Lalit asoost een naan neki nai Yusuf anteen pah Masir.
29 Tabug sin nasosa' nai Yusuf, nai Ruben ka nahine fa. Es on naan tabug in nnao noi abola' nane, in naskeek, natuin nai Yusuf ka et fa nanel een. Lalit in anpisu naklati in pakel anbi in aon, natuin in ansuus anmaat. 30 Ma in anbelok anfani noi in olif sin am nak, “Oin oo! Nai Usu ka et fa abola' oel ee! Tabug iij au he unsaa' a'tein?”
31 Lalit sin nlolo 'biib jes. Sin naiti nai Yusuf in soo-balug alekot naan, ma ankeep' ee noi naa' naan. 32 Lalit sin naiti soo-balu manaa' naan ma nekij noi sin amaf, ma natonan am nak, “Aam! Hai maiti soo-balug ii. Mail miit ee. Naik-naika nai Usu in soo-balug.”
33 Nail soo-balug nane, nai Yakop nahine nanij noi in anah in soo-balug. Es on naan in natael ee mnak, “Oinoo! Namneo, au anah in soo-balug es le' ii. Ka tahine fa mu'i fuij sin anpisu niis ne et mee. Oin oo! Au anah anmate nalaal je!”
34 Lalit nai Yakop anpisu naklati in soo-balug, ma ntainuus kalo kufa', natuin in ansuus anmaat.d In nkae anme'-me'ul aloog noi in anah naan. 35 In aan monel ma aan feto neman ma nhatanij, mes ka nabe'ij fa. In naguab am nak, “Kahaf! Au of a'suus amaat tal antee au 'maat. Natuin au ka nuug fa he 'niken au anah le' ii.” Es on naan nai Yakop ansuus anmaat leen piut, natuin in namnau in anah nai Yusuf.
36 Tabug nai Yakop fe' ansuus on nane, asosat een naane anteen nalalin pah Masir. Sin neki nai Yusuf ma nasosa' noi kase naek mese, kanan nai Potifar. In le' iij, kesel pah Masir in anaak apaot.