Nai Yakop sin naenan noi Betel
35
Lalit Uisnenog naguab nok nai Yakop am nak, “Au le' iij, Uisnenog le' nakliil On noi ko, tabug ho maen ma'ko ho tata' nai Esau. Tabug iij, ho mfeen ma maen nai ma'ko balel iij moi Betel. Amtee nae, ambaki me'i fuat ma amfee afgua'-tulu' noi Kau. Lalit ho mutgua mubalah ambi nane nai.”2-3 Lalit nai Yakop naguab nok in umel nanan ok-oke' am nak, “Tabug iij, hit he tnao toi Betel. Nahunut, tabug au a'bi susal-mane'at, Uisnenog anbaban kau anbi nae. Au he 'mo'e me'i fuat anbi balel naan. Es on naan tabug iij, hi maiti mpolin hi fatu-fuat le' malula' een ok-oke'. Miknino' hi tuam, ma mseek hi bale pakel, natuin hit he taluli' ma tabees toi Uisnenog.” 4 Es on naan sin nnona' sin fatu-fuat le' malula' een ma sin falon een amsa'.a Lalit nai Yakop ansimo sin ma ansuub sin anbi haug anaek mese in uun, anpaumaak kuan Sikem. 5 Tabug nai Yakop sin annaon nasaitan Sikem, Uisnenog anfee lasi mtaus noi toog pah anfuun am nateef, tal antee sin ka nabe'in fa he ntaon lasi le'uf noi nai Yakop sin.
6 Es on naan nai Yakop nok in toog pukan naan, anteen nok tainine' ma taimamut anbin Betel et pah Kana'an. (Betel naan, unu' fe' ate, in kanan, Lus.) 7 Anbi naan, nai Yakop anbaki fatug anjali me'i tulu'. Lalit in nakanab balel naan nak El Betel (le' in oten nak, ‘Betel in Uisnenog’), natuin nahunut Uisnenog nakliil On noi nai Yakop anbi naan, tabug in naen nasaitan in tataf.
8 Anpaumaak kuan Betel, anmu'i haug uu' anaek mese le' atoni' nakanab, Alon Bakut. In oten nak, ‘haug me'-me'ul’. In napeni kanaf naan, natuin tabug bi Ripka in bifee apailolit, es le' bi Debora anmaat, sin ansuub anbi haug naan in uun.
9 Tabug mese, tabug nai Yakop anfani neem na'ko Padan Aram, Uisnenog nakliil On antein, ma anfee ne tetus-athoen. 10 Uisnenog naguab am nak, “Anmulai tabug iij, ho kanam ka nai Yakop anteni fa len. Mes Au ukanab ko 'eki kaan fe'ug mese, es le' Isra'el.b 11 Au le' iij, Uisnenog le' Akuasat Matani'. Es on naan ho muhoni' ma musuuf namfa-fau. Uuf-uuf ma pah-pah of anpoin ma anbolan na'ko ho sufam ma ho ka'um sin. Ma ho of muhoni' maan kesel-kesel amsa'. 12 Pah le' nahunu Au 'feel ee noi ho babaf nai Abraham ma ho ama' nai Isak naan, tabug iij Au 'fee kog ee, ma ho sufam-ka'um sin.”
13-14 Uisnenog naguab nalali on nane, nai Yakop nahakeb fatug anbi naan, he anjali taka' he namnau Uisnenog In lasi manpaa'. Lalit in an'oop tua min-kase ma mina' anbi fatug naan, ma n'onen noi Uisnenog. 15 In nakanab balel naan, Betel.
Nai Yakop in feel bi Rahel anmaat tabug nahoon
16 Lalit nai Yakop sin annaon nasaitan Betel. Tabug sin he noi nhaumaak kuan Efrata (es le' Betlehem), antee in tabug lee he bi Rahel nahoon. Mes in nahoni' nok susal. 17 Tabug in nakes-kees on fe', bifeel le' nail ee natoon ee mnak, “Oin Rahel! Amhatani ho nekam. Ho anah atonij!” 18 Tabug bi Rahel he noi asnasan natfeek, in nakanab li'ana' naan, nai Ben-Oni (le' in oten, ‘li'ana' na'ko au susal-mane'at’). Lalit in asnasan natfeek. Mes nai Yakop nakanab li'ana' naan, nai Benyamin (le' in oten nak, ‘li'ana' anbi au nimak ane'ug’).
19 Lalit sin ansuub bi Rahel anbi lalan le' he tnao toi Efrata in ninen, (le' tabug iij in kanan, Betlehem). 20 Lalit nai Yakop nahakeb fatu natef mese anbi naan. Bi Rahel in fatu natef naan, esan fe', tal antee tabug ii.
Nai Yakop in aanh een
21 Lalit nai Yakopc natnani balel piut-piut. Tabug mese, in nahakeb asanel anbi menara Eder in aon abjaan. 22 Tabug sin anbin nane, nai Ruben antuup nok in amaf in fee pana' bi Bilha. Nai Yakop nahine lasij naan.
Nai Yakop in aan mone sin, tuaf bo'es am nuug.
23 Bi Lea in aanh een es le': nai Ruben (nai Yakop in aan mone unu), nai Simeon, nai Lewi, nai Yahuda, nai Isaskar, ma nai Sebulon.
24 Bi Rahel in aanh een es le': nai Yusuf ma nai Benyamin.
25 Bi Rahel in atel bi Bilha in aanh een es le': nai Dan ma nai Naftali.
26 Lalit bi Lea in atel bi Silpa in aanh een es le': nai Gat ma nai Aser.
Nahonis li'ana een naan anbi Padan Aram.
Nai Yakop in amaf nai Isak anmaat
27 Lalit nai Yakop annao nkiso ma nail in amaf nai Isak anbi Mamre anpaumaak kuan Kiryat-Arba (kuan naan, tabug iij, in kanan, Hebron). Nahunut, in babaf nai Abraham natgua anbi balel nane msa'. 28-29 Nai Isak anmoni naan toon natun mese bo' fanu te (180), na' in anmaat. Lalit in anah nai Esau ma nai Yakop, ansuub.