5 Tabug Nai Yakop anneen nak anmu'i atonij mese napaisa in aan feto nok aseke', in n'elah kuun, ma ka nmo'e fa saa'-saa'. Natuin tabug naan, in aan monel sin natukun mu'it anbin amnefu'. Es on naan in anpao sin tal sin anfani neman ok-oke'.

6 Tabug naan, nai Sikem in amaf nai Hemor, neem noi nai Yakop, he antaam antoti bi Dina. 7 Tabug sin nua sin naguab een ate, nai Yakop in aan monel sin, anfani neman na'ko amnefu'. Ma tabug sin nneen nak nai Sikem napaisa sin fetof nok aseke' ate, sin neek een namenan, ma sin nato'an matani'. Lalit sin naguab een am nak, “Lasij on le' naan, ka nabe'i fa he anjali nbi pah Isra'el! Ma ka nabe'i fa he hit atkolen mo'et amle'ut on le' naan.”

8 Lalit nai Hemor anfuli' nai Yakop am nak, “Aam Ako! Namneo, au anah nai Sikem anmofu neek noi ho aan feto bi Dina. In anlomi he nsaog. Es on naan au 'toti ko henati' kalu leko, amfee kai ho anah bi Dina he au anah nai Sikem ansaog. 9 Kalu naleek, hit aanh een anmatsaon. Hi aan mone sin, ansao hai aan feton. Ma hai aan mone sin, ansao hi aan feton. 10 Maut he hi mitgua mibgua mok kai msa' ambi le' ii. Hi mlomi kiim he mitgua mbi meel am meel aah. Lalit hi misosa', ma mipeni maus ambi ii.”

11-12 Lalit nai Sikem naguab nok bi Dina in amaf, ma in naof een am nak, “Hi mtoti saa'-saa' haa, au utuin ki. Hi he mtoti loit he abtai ufani' bi Dina, ma nonij fauk-fauk amsa', au 'baen! Lamun hi mlomi he au 'sao hi feto'.”

13 Mes nai Yakop in aan monel sin nahinen nalalin nak nai Sikem napaisa bi Dina nok aseke'. Es on naan sin naguab anputa-kliun nai Sikem ma in amaf nai Hemor. 14 Sin nataen am nak, “Ka nabe'i fa he hai matsaob hai feto' nok atonij le' ka maheli' fa! Lasij naan, namaeb kai! 15 Mes in laal poit ee on ii. Hi atonin balel iij, abaut-anaet, lo he mheli' on le' hai. 16 Kalu hi mmo'e on naan, na' hit tmatsao tuuk am tuuk. Ma hai of mitgua mibgua mok ki msa' ambi iij, he hit ala kit atjali on le' pah mese. 17 Mes kalu hi ka mmo'e mituin fa hai lomim een, ma ka mlomi fa he miheli', hai msimo mifani' hai feto', lalit hai mnao misaitan balel ii.”

18 Nai Hemor ma nai Sikem ansimo sin aguab een naan nok alekot. 19 Mes nai Sikem ka nalaan naan fa in tuan, natuin in anmofu neek noi bi Dina. In amneot, abiten pah naan antola' nai Sikem. 20 Es on naan nai Hemor ma nai Sikem annaon noin bale feek lasij kuan naan, et eno' he ttaam toi kuan, ma nabguan am naguab een nok abiten pah naan. Sin naguab een am nak, 21 “Aok-abjaan ala ki! Atoni Israel sin le' iij anlomin he nmoni nabguan nok kit anbin taimamut. Es on naan maut he sin natguan nok kit anbi hit pah le' ii. Hit pah le' iij mas anmeinua noi kit ok-oke'. Hit aan mone sin nabe'i ansao sin aan feton. Ma sin aan mone sin amsa' nabe'i ansao hit aan feton. 22 Sin aal antotin lasij aan'-ana' es na'ko kit. Lasij naan es le', hit ala kit atonij abaut-anaet, amnasif-munif lo he taheli' on le' sin. 23 Kalu hit tmoni tabgua tok sin, sin mu'it een, ma sin amu'ik een ok-oke' anjalin hit pusaak sin amsa', ai'? Es on naan leko nneis hit tsimo sin haan totis naan. Iim he ala kit taheli' ok-oke'! On mee? Hi mlomi, oo?”

24 Lalit atoni sin le' nabguan anbin naan, anlomi natuin nai Hemor ma nai Sikem sin aguab een naan. Es on naan atonij abiten balel naan, sin naheli' een ok-oke'.

25 Nenog tenu te, tabug sin paap een fe' namenan, bi Dina in naof nai Simeon ma nai Lewi, naiti neki sin suni een ma antaman nok manifa' noi kuan naan. Ma sin anlolo niis atonij sin naan ok-oke'. 26 Nai Hemor ma nai Sikem amsa', sin anlolo sin. Lalit sin nok nafani' sin fetof bi Dina na'ko nai Sikem in umel, ma anfanin noin sin umel.

27 Lalit nai Yakop in anah abjaan sin, antaman noin pah naan, ma nasiik neki pah naan in nesan. Sin nato'an, natuin anmu'i tuaf napaisa sin fetof nok aseke' anbi balel naan. 28 Sin nasiik neki tuaf abjaan een sin bale' een ok-oke' na'ko sin umel sin naank een. Ma sin anpoo' neki tuaf abjaan een sin mu'it een amsa' na'ko amnefu'. 29 Sin anheke neki bifeel een, li'ana' een, ma nasiik pah naan in bale' ma'upa' een ok-oke'.

30 Tabug nai Yakop nahine lasij nane, in naguab noi nai Simeon am nai Lewi am nak, “Nansaa' am es hi mmo'e maan kit lasi amle'ut iij? Hi misusab kau! Of abiten Kana'an, abiten Peris, ma ale' abiten pah le' iij, nato'an niis kau. Sin anmu'in tuaf namfau. Hit aal afgua' fauk aah. Kalu sin neman nbaan kit, of hit atle'u tfiin.”

31 Mes sin nataen nok haan to'as am nak, “Aam! Ho mutenab mak ai' hai he mkolen sin he nmo'e hai feto' on le' bifee fetog, ee oo?”