Nai Yakop nateef in tataf nai Esau
33
Nenog naan, nai Yakop niit nai Esau neem neki atoni' tuaf natun haa. Lalit in anbati in anah sin es-es nok sin inaf. 2 In nahunub in atel sin le' in fee pana' sin naan nok sin anah sin anbi maat. Lalit bi Lea nok in aanh een, na' anbi kotin, bi Rahel nok in anah nai Yusuf. 3 Mes nai Yakop annao nahun-hunu anbi maat. Tabug he noi anpaumaak in tataf, in nli'tuu ma nabees nakteni ha'el hiit.4 Mes tabug nai Esau niit in olif nai Yakop, in nan-naen aah he na'ekug. Lalit in nhoo ma anneek maas aloog. Ma sin nua sin ankaen nse'-se'ul een. 5 Tabug nai Esau niit bifeen naan ma li'aan een nane, in antotij ee mnak, “Tuaf amfa-faun iij, sekog een?”
Ma nai Yakop natael ee mnak, “Sin le' iij, tuaf een le' Uisnenog anfee sin noi ho atel kau.”
6 Lalit in fee pana' een naan, ma sin anah sin neman ma nabesan noin nai Esau. 7 Lalit bi Lea nok in anah sin neman ma nabesan noin nai Esau. Amunit, nai Yusuf nok in inaf bi Rahel neman ma nabesan noin nai Esau.
8 Lalit nai Esau antoti mnak, “Pukan ahunut een le' ho mleek sin nahunun ma nekin mu'it naan, ho salit ee saa'?”
Lalit nai Yakop natael ee mnak, “On ii, tata'! Au 'fee ko sin luum-luum, henati' ho mtopu kau nok neek meinuan ma maliin.”
9 Mes nai Esau natael ee mnak, “Ako! Au maus een namfau msa'. Es on naan naik amfee kau saa'-saa'.”
10 Lalit nai Yakop natael ee mnak, “Taat honi', naika mutenab on naan. Ho lo he msimo sin, he njali taka' nak, ho mtopu kau nok nimaf nuug. Natuin tabug lelon au 'iit ko mkumani, on le' au 'iit Uisnenog ankumaan. 11 Ma au 'toti ko taat honi', maut he ho msimo au feet een naan, natuin feet een naan sin ka ma'upa een fa. Uisnenog anneek niis kau, es na' In anfee kau ale' saa'-saa', natuin au paluut sin.” Nai Yakop anfuli' in tataf nai Esau, tal antee in anloom. Es on naan nai Esau ansimo feet een naan.
12 Lalit nai Esau naguab am nak, “Kalu on nane, hi miloitan he tnao nai! Of au a'nao 'aat ki.”
13 Mes nai Yakop natael ee mnak, “Mautu kuun, tata'. Mail kuum. Li'aan een fe' babaun een. Es on naan sin ka nuug fa he annaon lab-laab. Mu'it abjaan fe' nahonin nalalin. Kalu hit taseke' sin he annaon lab-laab nenog mese ahaa, mu'it een iij of anmaten ok-oke'. 14 Es on naan leko nneis, ho muhuun. Hai mnao babaun-babaun ma mituin ki anbi hi kotim. Au of 'uum he 'kiso ko 'oi Seir.”
15 Lalit nai Esau naguab anteni mnak, “Kalu on nane, au ubati au ameput abjaan he nok ko, he sin anjalin anone lalan noi ki.”
Mes nai Yakop natael ee mnak, “Naika muhaeb om! Lamun au uhine ulali 'ak ho mtopu kaug een.”
16 Anneen on nane, nai Esau annao nasaitan sin, he nfani noi Seir. 17 Mes na'ko balel nane, nai Yakop annao noi Sukot. Anbi naan, in anmo'e umel, ma anmo'e o'af noi in mu'it sin ok-oke'. Es on naan sin nakanab balel naan, Sukot (le' in oten nak, ‘umel le' he natguan ntahan een’).
18 Ma nai Yakop sin anteen nok ao-mina' noin kuan Sikem et pah Kana'an, na'kon Padan Aram. Lalit sin nmo'en asanel, ma natguan npaumak-maak kuan naan. 19 Naijaan le' sin natguan le' naan, nai Yakop ansoos nafeek na'ko nai Hemor, nai Sikem in amaf. In anbaen neki loi muti' afgua' natun mese. 20 Anbi naan, in anbaki fatug he nmo'e me'i fuat. Lalit in nakanab balel naan, El-Elohe-Isra'el (le' in oten, ‘Uisnenog naan, Isra'el in Uisnenog’).