Nai Yakop namtau noi he nateef nok in tataf nai Esau
32
Lalit nai Yakop sin annaon nfinin. Ma Uisnenog In ahake sin na'kon neno tunan neman ma na'eku nokan. 2 Tabug niit sin on nane, in naguab am nak, “Le' balel iij, Uisnenog In solalus sin bale snasat!” Es on naan sin nakanab balel naan, Mahanaim, (le' in oten nak ‘bale snasat nuug’).3 Lalit nai Yakop anlelu in ameput tuaf fauk annaon nahunun noin pah Edom (es le' Seir), he anfee hanaf noi in tataf nai Esau, nak in he neem. 4 Nai Yakop naguab noi in ameput sin nane mnak, “Hi mnao meki hanaf noi au tata' nai Esau mmak, ‘Aam Esau! Ho atel nai Yakop kau a'sonu' hanaf, tabe ma tola' noi ko. Na'ko faijan unu' tal antee tabug iij, ho atel kau, utgua abi hit aam usif nai Laban in umel. 5 Tabug iij, ho atel kau, 'mu'i' bijael, bijakase keledai, abibij, ma abibi-kasel. Au 'mu'i atel amsa', es le' atonij ma bifeel. Au 'leek tuaf sin le' iij, he neki ko hanaf, nak au he 'uum. Au ufnekan anbi au nekak, henati' ho mtopu kau nimaf nuug.”’ Es on naan tuaf een naan annaon.
6 Tabug sin anfani neman noin nai Yakop, sin nekin hanaf am nak, “Hai mnao miteef milali mok ho tata' nai Esau. Tabug iij in neem ma nok tuaf natun haa, he nateef nok ko.”
7 Anneen on nane, nai Yakop in ansaon ee leti-leti, ma in namtau nmaat. Lalit in anbati in ameput sin ma mu'it een ok-oke', anjalin pukan nuug. 8 In natenab am nak, “Kalu nai Esau neem ma nbaan pukan ahunut, pukan amunit naenan he nafetin naan ok.”
9 Lalit nai Yakop an'onen am nak, “Koi, Uisnenog! Usi' le' au babaf nai Abraham ma au ama' nai Isak naluli' ma nabees noi Ko! Amneen maan kau fe'. Uisnenog, nenog naan, Ho es le' amleek kau he 'fani 'uum 'oi au umel ma au nonot, a'bi pah le' ii. Ho es le' amba'an kau mmak, Ho of muloitan he muleko' sin ok-oke'. 10 Au le' iij, atoni ka maso'it fa, mes Ho manekam moi kau nabal-baal. Fe' unun, tabug au 'laak noel Yarden le' iij, au 'ekij haa tees. Mes tabug iij, au 'fani 'uum 'eki tuaf pukan nuug ma mu'it amsa'. 11 Au umtau, naik-naika au tata' nai Esau neem ma nbaan niis kai. Es on naan au 'toti Ko Usi' he mufetin maan kai na'ko nai Esau in animan. Hai ala kai es le': au, ma au feel-anah sin, ma au atel sin ok-oke'. 12 Usi', Ho es amba'an mak, Ho es le' amfee kau tetus athoen, ma amfee kau sufa'-ka'uf on le' snaen een anbi tasij ninen, le' tuaf abjaan sin ka nso'i nabe'i sin fa.”
13 Lalit nai Yakop antuup anbi balel naan. Anmiu on nane, in naloitan mu'it he nfee sin noi in tataf. 14 In anpili naan abibi inaf natun nuug, abibi kesog bo' nuug, abibi-kase inaf natun nuug, abibi-kase kesog bo' nuug, 15 bijakase unta inaf bo' teen le' fe' nasusun anah, bijae inaf bo' haa, bijae kesog bo'es, bijakase keledai inaf bo' nuug, ma bijakase keledai kesog bo'es. 16 Lalit, in anbati mu'it een naan, neog mese ate noi pukan mese. In anfee pukan mese ate nok in atukus. In natonan sin am nak, “Hi mnao mihuun. Au utuin ki 'bi hi kotim. Hi mnao, mes pukan es nok pukan es ate mas anmaklo'an.”
17 Lalit nai Yakop naplenat anakaf noi pukan ahunut ee mnak, “Kalu au tata' nai Esau nateef nok ko, ma in antoti mnak, ‘Ho he mnao moi mee? Sekog in ameput, es le' ho? Mu'it een le' iij, sekog inin? 18 Ho mutae mmak, ‘Mu'it een le' iij, ho atel nai Yakop inin. In ansonu' sin noi in tataf, usi' nai Esau. In namuun.”’ 19-20 In naplenat on le' nane msa' noi atukus pukan abjaan am nak, “Kalu hi miteef mok au tata' nai Esau, hi mnona mu'it een le' ii. Lalit hi mitoon ee mak, au umuni et kotin.” Nai Yakop natenab am nak, kalu in anfee mu'it een le' naan ok-oke' ate, nai Esau of nekan ee ansaisuum ma naleek. 21 Es on naan in ansonu' mu'it een naan nahunun. Mes faij naan, in antuup nabala anbi naan.
Nai Yakop nok Uisnenog anmabu'in
22 Faij naan, nai Yakop anfeen ma naloitan in feel sin nua sin, in atel sin le' in npana' sin, ma in anah sin bo'es am mese, he sin annaon nlakan noin noel Yabok in panin. 23 Tabug sin ala sin anteen noel naan in panin, in ansonu' in pusaak sin ok-oke' noin ne.
24 Mes nai Yakop anlaa' anmees anbi noel ee panin. Lalit atonij mese neem. Atonij naan nok nai Yakop anmabu'in anbin naan, tal antee nnesi noi anmiu. 25 Tabug atonij naan annaben nak, nai Yakop he niis eel een, in antufu nai Yakop in sakin, tal antee in nuin pusun uun napau npoi na'ko in talun. 26 Es on naan atonij naan naguab am nak, “Mufetin kau. Kle'og es ate manas he npee' ee.”
Mes nai Yakop natael ee mnak, “Ho muguab amfee kau tetus fe', na' au ufetin ko.”
27 Ma atonij naan antotij ee mnak, “Ho kanam sekog?”
In natael ee mnak, “Nai Yakop.”
28 Lalit atonij naan naguab am nak, “Ho kanam naan, ka nai Yakop fa leen. Mes anmulai tabug iij, atoni' anteek ko nak, nai Isra'el (le' in oten, ‘anmabu'i nok Uisnenog’), natuin ho mmabu'i matani' mok mansian ma mok Uisnenog, tal antee ho miis.”
29 Es on naan nai Yakop antotij ee mnak, “Ho kanam sekog?”
Mes atonij naan natael ee mnak, “Ho he mtoti kau au kanak he saa'?” Lalit in naguab anfee tetus noi nai Yakop anbi naan.
30 Es on naan nai Yakop naguab am nak, “Au 'iit ulali Uisnenog humaf nok humaf, mes au 'moni fe'.” Natuin lasij naan, in nakanab balel naan, Peni'el (le' in oten, ‘Uisnenog In human’).