Nai Yakop naen nasaitan nai Laban
31
Tabug mese, nai Yakop anneen niit nai Laban in anah sin naguab een am nak, “Tabug iij, nai Yakop anmu'i namneo-namneo, oo! In anmusi niis hit ama' in amu'in.” 2 Es on naan nai Yakop nail in aam usif ee human anmetak, ma ka on fa le' bijaas he lekog.3 Lalit UISNENOG naguab nok nai Yakop am nak, “Antee in tabug len, es le' ii. Es on naan ho lo he mfani nai moi ho ina'-ama' sin. Au of 'ok ko.”
4 Lalit nai Yakop anlelu no'en bi Rahel ma bi Lea, he neman ma na'eku nokan anbi mnefu', le' sin mu'it een balak een. 5 Lalit in naguab noi sin am nak, “Muni' iij, au 'ail hi ama', human anmetak piut noi kau. Ma in ka nail naan kau fa msa' on le' un-unun. Mes Uisnenog, le' au ama' nabees noi Ne naa, nok kau. 6 Hi nua ki mihine, al-aloog le' iij, au 'mepu matani' 'oi hi ama'! 7 Mes maski on nane msa', in namoe kau tenij-tenij. In anseek au sebat ha'el bo'es eeh. Maski on nane msa', Uisnenog anpafa' ma npanat kau. 8 Tabug hi ama' naguab am nak, ‘Mu'i koto' een anjalin ho baen haet-pusel,’ mu'it een naan nahonin aan akoto' oke'. In anmo'e on naan noi kau tenij-tenij. 9 Uisnenog anmo'e on naan, he In naiti hi ama' in mu'it een ma anfee kau sin.
10 Tabug mese, tabug mu'it een naan antotin he anmaho'en, au unumai mnak, ale' keson sin ok-oke' le' anmaho'en naan, anmu'i koto'. 11 Lalit Uisnenog In ahaket na'ko sonaf neno tunan, no'en kau anbi unumait am nak, ‘Yakop!’
Lalit au utae m'ak, ‘On mee?’
12 Lalit in natoon kau mnak, ‘Mail fe'! Ale' keson le' anmaho'en iij, aal anmu'ij haa koto'. Au 'atol on naan, natuin Au 'iit ale' saa'-saa' le' nai Laban anmo'e sin noi ko. 13 Au le' iij, Uisnenog le' nakliil On noi ko anbi Betel. Anbi nae, ho muhakeb fatug, lalit am'oop mina', ma m'onen moi Kau. Lalit ho muhakeb lasi manpaa' nok Kau anbi nae. Tabug iij, ho lo he mnao musaitan pah le' iij, ma mfani moi ho ina' ma ho ama' sin pah.”’
14 Lalit bi Rahel ma bi Lea nataen am nak, “Es le' ho. Hai mituin aah! Hai ka mmui' fa paaf amteni na'ko hai ama'. 15 Al-aloog le' iij, hai ama' in naan kai on le' atoni teta'. In nasosa' nalali kai. Lalit in anpake nonin naan. 16 Ale' kanan amaus le' Uisnenog naiti sin na'ko aam Laban naan, tabug iij anjali pusaak noi kit ma noi hit anah sin. Es on naan kalu Uisnenog nak on meel ate, tatuin aah!”
17-18 Lalit nai Yakop anmulai npainote in bale' een. In nasaeb in feel-anah noi bijakase unta sin, ma anpoo' neki in mu'it een ok-oke', ma nasaeb neki bale' een le' in napeni sin anbi Padan Aram, he annaon noin pah Kana'an.
19 Tabug naan, nai Laban annao nkateli in a'bibi-kasen sin funuk een. Ma bi Rahel nabaak neki in amaf in fatu-fuat malula'. 20 Nai Yakop sin anfeen annaon namek-meka'. Sin ka natonan fa in aam usif. 21 In neki nani in amui'n sin ok-oke', lalit sin annaon nok manapat ma anlaak anbonin noel Efrat, Ma sin annaon an'anin anu'af Gileat.
Nai Laban anli'u natuin nai Yakop
22 Anfini nenog teen, nai Laban napeni hanaf nak, nai Yakop anfeen naen nalaal je. 23 Lalit nai Laban no'en nabguab inin, he sin anli'u natuin in upuf naan. Sin anli'u sin tal antee nenog hiit, na' napeni sin anbin anu'af een Gileat.
24 Faij nane, Uisnenog nakliil On noi nai Laban anbi unumait. In naguab am nak, “Laban! Ampanat ho fefam, tabug ho muguab mok nai Yakop.”
25 Faij naan, nai Yakop nahakeb nalali tenda anbi 'nu'af een Gileat. Nai Laban sin nahakeb een tenda amsa', ka naloog fa na'ko balel naan.
26 Lalit nai Laban neem nateef nok nai Yakop. Ma in naguab am nak, “Yakop! Ammo'e on meel am es ho maen meki au aan feton nok mek-meka? Ho on le' meki tuaf le' ho mheke maan sin anbin makenat. 27 Hoiih, ho maen ka mutoon kau fa. Ho ka mpake fa atolan akle'og he museon kau, oo! Kalu ho mutoon kau lek-leko,a oni' au mmo'e fesek he ufetin ki 'eki malinat ma sakanat. 28 Ho sanat mese antein, ho ka mfee kau fa meinuan he au 'tabe ma 'neek 'aan au anah ma sin anah sin hena' au ufetin sin. Ho mo'em iij on le' a'olet an! 29 Au he usaan ko te, labah! Mes faij naa, Uisnenog, le' ho ama' nabees noi Ne na, nakain kau mnak, kalu au uguab 'ok ko, au lo he 'panat au fefak. 30 Au uhine 'ak ho mumnau ho kuan, he mfaan. Mes nansaa' am es ho mubaak meki au fatu-fuat le' malula' een?”
31 Lalit nai Yakop natael ee mnak, “Aam, naika muto'an kau! Au 'feen a'nao nok manifa' natuin au aotiun gok, kalu ho ka mlomi fa he mkolen kau li'ana' een he nok kau, of on meel?” 32 Mes nai Yakop ka nahine fa noi in feel bi Rahel es nabaak neki fatu-fuat le' malula' een naan. Es on naan in naguab am nak, “Aam, le' fatu-fuat malula' een naan, ho m'etu kuum! Kalu ho mupeni sin anbi sekog, mumatel haa. Ampukai hai bale' een ok-oke'! Kalu mupeni ho bale' pusaak abjaan amsa', maiti mufani' sin. Maut he tuaf een le' iij anjalin saksiij.”
33 Lalit nai Laban anpoi ma antaman sin tenda een mese-mese. Nahunun nai Yakop in tenda. Lalit bi Lea. Lalit noi bi Bilha ma bi Silpa sin amsa'. Mes ka niit fa bale' een naan. Namuni te, in antaam noi bi Rahel in tenda. 34 Mes bi Rahel ansukub nakolo' fatu-fuat malula' een naan anbi apeni' bijakase unta. Lalit in antoko natau apeni' naan. Nai Laban anpalekas bi Rahel in tenda ee nanan ne ok-oke', mes ka napeni fa bale' een naan.
35 Es on naan bi Rahel naguab nok in amaf ee mnak, “Aam honi', naik mutoo'. Au ka 'feen fa, natuin au upeni funan.” Es on naan nai Laban nami piut, mes ka niit fa fatu-fuat malula' een naan.
36 Nai Yakop natoo' ma anhuum puut, es on naan in anhaan maslaal noi in aam usif nai Laban am nak, “Au ule'un ho saa'? Tal ho mli'u mutuin kau, on le' au atoni abulalut kau. 37 Ho mpukai mulali ale' au bale' een ok-oke'. Ma ho mupeni saa'? Maiti mekij neem noi matan iij he hit tiit ok-oke'. Maut he hit aok-abjaan sin le' iij, nafeek niit nak bale' naan, sekog inij. 38 Toon bo' nuug een au 'aten ok anbi ko. Tabug au utuku ho mu'it sin naan, ka ta-tiit fa mese he anmous. Au ka uktunu he 'eku 'iit fa mese amsa'. 39 Kalu anmu'i mu'i fuij namate ho mu'it sin, au ka utoon ko fa, mes au 'seek sin. Kalu anmu'i tuaf nabaak naan ho nuug, ho mlelu kau he 'seek, maski au ka 'saan fa. 40 Anbi tabug manas, manas anlaal kau. Anbi tabug faij, au 'mainiik tal uta'ij a'maat. Au 'bee', ma ka 'tuup leko fa, natuin au 'panat ho mu'it sin naan. 41 Toon bo' nuug naan namneo! Au 'mepu toon bo'es am haa he 'sao ho aan feton. Lalit a'aten ok a'teni toon nee, he uheti. Au 'aten ok al-aloog le' naan, mes ho mseek au sebat naan ha'el bo'es. 42 Naan, anmu'i Uisnenog le' au babaf nai Abraham ma au ama' nai Isak nabesan noi Ne. Kalu In ka npanat kau fa, ho mli'u mulali kau, ma au 'fena 'nao luum-luum aah. Mes Uisnenog ka nfolon ma nkoson fa au susal. In niit kau noi au 'mepu matani'. Es na' faij naa, In neem ma nakain ko.”
Nai Yakop ma nai Laban nahakeb een lasi manpaa'
43 Anneen nai Yakop naguab on nane, nai Laban natael ee mnak, “On ii! Bifee nua' een naan, au aanh een. Li'ana een le' sin nahonis sin naan, au cucu sin ok-oke. Mu'it een le' iij, namneo au nuug. Ale' saa'-saa' le' ho miit sin anbin iij, au nuug. Mes au he unsaa'? Au ka ube'i fa he 'tahan sin. 44 Es on naan, leko nneis hit nua kit tahakeb lasi manpaa'. Ma hit nua kit lo he tmoni tatuin hit lasi manpaa' naan.”
45 Es on naan nai Yakop naiti fatug anaek mese, ma nahakeb anbi naan, he anjali taka'. 46 Lalit nai Yakop anlelu in ameput sin he nabguab een fatug, ma natupub sin. Ma sin antokon ma anbukaen nabguan anpaumaak fatun naan. 47 Es on naan nai Laban nakanab fatu tupuk nane mnak, Yegar Sahaduta. Mes nai Yakop nakanab, Galeet.b
48 Lalit nai Laban naguab am nak, “Fatu tupuk iij, anjali taka' le' ansaksii hit lasi manpaa'.” Es on nane, balel naan, in kanan, Galeet. 49 Nai Laban nakanab balel nane msa' nak, Mispa (le' he noi on le' kata abjaan le' in oten ‘bale paot le' nalaat’), natuin in naguab am nak, “UISNENOG of nekin On nail ma anpao kit, he maski hit nua kit atmakloo' amsa', hit naik attanhai hit lasi manpaa' ii. 50 Kalu ho mmo'e amle'ut moi au anah sin iij, ai' amsao bifeel ateta', au of ka uhine fa. Mes mumnau! Uisnenog anjali saksiij noi hit nua kit. 51-52 Mail miit fatu ahaket iij, ma fatu tupuk een ii. Mumnau! Fatun le' iij amsa', anjalin nakat. Ho ka mube'i fa he mtanhai fatun le' iij, he mmo'e amle'ut noi kau. Ma au msa' on naan. 53 Hit tahakeb lasi manpaa' iij, atpake hit babaf sin Uisnenog. Es le' ho babaf nai Abraham, ma au babaf nai Nahor sin Uisnenog. In of nekin On anjali Afeek Lasij noi hit lasin.”
Anneen nalali on nane, nai Yakop ansuup anpake kanaf Uisnenog le' in amaf nai Isak naluli' ma nabees noi Ne.
54 Lalit nai Yakop anlolo mu'it ma in naiti neki sin sisij een ma natulu' sin noin Uisnenog anbin anu'af een naan. Ma in anhone tuaf een le' anbin naan, ma sin anbukaen nabguan, ma anbe'an tal anmiu nfiin.
55 Nok-nok ana' on nane, nai Laban anhoo ma anneek in anah sin ok-oke'. Lalit in naguab anfeen sin tetus, ma anbelok anfani noi in pah.