2 Es on naan nai Yakop ankekog ee mnak, “Ho mak au Uisnenog kau? Au ka 'mo'e uhine fa li'ana' noi ko.”

3 Lalit bi Rahel naguab am nak, “On ii! Leko nneis ho mtuup mok au atel bi Bilha. Maut he in nahoni li'ana' noi kau.”

4 Lalit in nnona' bi Bilha noi in monel. Ma nai Yakop antuup nokan. 5 Lalit bi Bilha na'apu', ma in nahonis li'aan monel es. 6 Es on naan bi Rahel naguab am nak, “Uisnenog anneen au onen. Es on naan In anfee kau li'aan monel es. Uisnenog nafeek namnees ahaa au lasi.” Es on naan in nakanab li'ana' naan nai Dan (le' in oten nak ‘afeek lasij’).

7 Lalit bi Bilha na'apu nteni, ma nahonis li'aan monel es. 8 Es on naan bi Rahel naguab am nak, “Au 'ok au tata' ammali'un honit. Ma au 'iis 'aan ee.” Es on naan in nakanab li'ana' naan nai Naftali (le' in oten nak ‘anmali'un’).

9 Tabug bi Lea annaben nahine noi in ka nahoni' fa leeh, in nnona' bi Silpa he nai Yakop ansaog. 10 Lalit bi Silpa nahonis li'aan monel es. 11 Lalit bi Lea naguab am nak, “Au agua leko kau.” Es on naan in nakanab li'ana' naan nai Gat (le' in oten, nak ‘agua leko’).

12 Lalit bi Silpa nahonis anteni li'aan monel es. 13 Ma bi Lea naguab am nak, “Hoi! Tabug ii, na' au 'maliin! Mail kiim, of bifeen nuug naguab een am nak, au 'iis manenu' eeh.” Es on naan in nakanab li'ana' naan, nai Aser (le' in oten nak ‘malinat’).

14 Tabug mese, nateef tabug amnonut, nai Ruben annao nbi nasij. In napeni hau malog le' anbaban tuaf he kalu leko te nahoon. Lalit in nekij noi in inaf bi Lea. Nail niit on nane, bi Rahel antoti bi Lea am nak, “Koijoo, tata'! Amfee maan kau malog ba-babaun le' nai Ruben nekij naan.”

15 Mes bi Lea natael ee mnak, “Hoi! Ho bainesi' ko! Ho musiik mulali au monel. Ma tabug ii, he musiik amtein malog na'ko au anah. Ho ka mumaeb om fa, oo?”

Mes bi Rahel naguab am nak, “On ii, tata'. Kalu au upeni malog nane, faij iij ho mok hit monel.” Bi Lea anlomi on naan.

16 Manas anmabe on nane, nai Yakop anfani neem na'ko lelel. Es on naan bi Lea annao na'eku nokan, ma naguab ee mnak, “Aam! Ho lo he mtuup mok kau faij ii! Natuin au 'baen ulali ko 'eki au anah in malog.” Lalit faij naan, nai Yakop antuup nok bi Lea.

17 Lalit Uisnenog anneen bi Lea in onen. Es on naan in na'apu', ma nahonis li'aan moonl es. Tabug iij, in nahoni' ha'el niim eeh. 18 Lalit bi Lea nakanab li'ana' naan nai Isaskar (le' in oten ee nak ‘baen haet’), natuin in naguab am nak, “Uisnenog anbaen nalali au haet, natuin au 'nona' ulali bi Silpa he ansao au monel.”

19 Lalit bi Lea na'apu' nteni, ma nahonis li'aan moonl es. Le' ii, ha'el neel eeh. 20 In naguab am nak, “Uisnenog anfee kau hadia. Es on naan tabug iij, au monel lo he ntola' kau, natuin au uhoni' ulali li'aan monel neel eeh.” Es on naan in nakanab li'ana' naan nai Sebulon (le' in oten nak ‘anfee tola'’).

21 Lalit bi Lea nahonis li'aan feto es. Ma in nakanab, bi Dina.

22 Mes Uisnenog namnau bi Rahel amsa', ma In anneen in onen totis. Es on naan In anfai bi Rahel in apun. 23 Ma in na'apu' ma nahonis li'aan moonl es. In naguab am nak, “Uisnenog naiti npolin au lasi mael.” 24 Es on naan in nakanab li'ana' naan, nai Yusuf (le' in oten oni' nak ‘maut he in anfee nloul’), natuin in naguab am nak, “Au 'toti he Uisnenog anfee nloulu kau li'aan moonl es antein.”

25 Tabug bi Rahel nahonis nalali nai Yusuf, nai Yakop naguab nok nai Laban am nak, “Aam! Kalu naleko te, au 'fani 'oi au pah ee fe'. 26 Maut he au 'eki au feel ma au anah sin amsa'. Ho muhine mulali, au 'mepu matani' noi ko. Es on naan au 'baen ufeek sin eeh. Natuin lasij naan, tabug iij sin nfanin au nuug leh.”

27 Lalit in aam usif natael ee mnak, “Ako! Ho mneen fe'. Takseel a'sobal. Au 'iit ulali, ma au uhine 'ak Uisnenog anpake ko he nfee kau tetus-athoen. 28 Es on naan tabug iij ho mtoti fauk-fauk aah, au 'baen! Lamun ho mutgua mok kau mbi ii, ma mmepu noi kau.”

29 Lalit nai Yakop natael ee mnak, “Aam, ho miit kuum, au mepun. Nok lalan naan, ho mu'it sin nasaatg ok piut. 30 Tabug au ka 'uum fa fe' ate, ho 'mu'im een ka namfau fa fe'. Mes tabug iij, ho atoni amu'it. Uisnenog anfee ko tetus, natuin au mepug. Tabug iij, antee in tabug leen he au 'mepu noi au feel-anah sin.”

31 Lalit nai Laban antoti mnak, “Lekog. Es on naan au he 'baen on mee 'oi ko?”

Nai Yakop natael ee mnak, “Aam, ho naik musuusb om he amfee kau saa'-saa'. Au of utuku piut ho mu'it sin, mes lamun au 'mo'e 'aan mo'et mese'. 32 Amfee kau meinuan, he nenog ii au 'nao 'oi ho mu'it een. Au he 'beti' 'aan a'bibij ma 'bibi-kasel le' ka koto' fa. Sin le' naan, ho nuug. Mes le' akoto' een, au nuug. Ma au 'heti ale' 'bibi-kase metan amsa'. Maut he sin ok-oke' naan, anjalin baen noi au haet-pusel.^a 33 Anbi neno amunit, of na' ho muhine mak au neek ee muti', ai' kaha? Tabug meel am meel aah, ho uum he mpalekas au mu'it sin. Kalu ho miit a'bibij le' ka koto' fa, ai' abibi-kasel le' muti', ho muhine mak au es le' ubaak 'aan ho nuug.”

34 Lalit nai Laban anlomi natuin am nak, “On le' nane, lekog.” 35 Mes anbi nenog naan, nai Laban anbatis a'bibi-kasen le' akoto', ma abibi-kasen le' metan. Lalit in anlelu in anah sin he natuku mu'it een naan. 36 Nalalit sin neki mu'it een naan annaon naloon na'ko nai Yakop, noi balel mese le' in aloon ee atnao hae te nenog tenu fe' na' attee. Ma nai Yakop natuku in aam usif ee in abibin ma abibi-kase anesit een nane fe'.

37 Lalit nai Yakop anketu naan hau-sbakef na'ko haug huma' teen. In ansapi antui lala hau-sbakef een naan. 38 In antao hau-sbakef een le' in ansapi antui lala sin naan, anbin aba'i oel. Mui't een naan bijaas anmaho'en anbin balel naan. 39 Es on naan tabug mu'it een naan anmaho'en anpaumaak hau-sbakef le' antui' lala sin naan, of nahonin ana' koto'.

40 Lalit kalu nai Laban in mu'it sin es le' he anmaho'en een, nai Yakop na'ailab sin noi a'bibij ai' a'bibi-kasel le' koto'. Lalit sin nahonin aan koto' amsa'. Nok lalan naan, in mu'it een kuun nasaatg ok piut. Lalit in anbeti sin na'kon nai Laban inin. 41 Tabug mu'it meel le' abe'it anmaho'en, nai Yakop antao hau-sbakef le' in anluul sin naan, antoom aba'i oel, le' anhaumaak sin maatk een. 42 Mes kalu in nail mu'it meel anpukalemu' tabug he anmaho'en, in ka ntao fa hau-sbakef een naan. Es on naan nai Laban in napeni mu'i apukalemu'. Mes nai Yakop inin ok-oke' es le' apokat ma matani'. 43 Nok lalan nane, nai Yakop anjali atoni amu'it. In anmu'i abibij, abibi-kasel, bijakase unta, bijakase keledai, ma atel, le' mafaun ee kah.