Nai Yakop antee in aam usi' nai Laban in umel
29
Lalit nai Yakop annao nfini n'ani pesit manas-asaen. 2 In anna-nao te, in niit oe hani' es anpaumaak kuan es. Anpaumaak oe hani' naan, anmu'i a'bibij ma a'bibi-kasel, pukan teen le' anpaon he napenin oe mninu'. Mes anmu'i fatu naek mese antobe naan oe hani' naan. 3 Bijaas, kalu mu'it een naan nabgua nalalin, na' atukus een antita naskotun fatug naan, lalit ankuin oel ma na' na'inut sin. Ninu nalalin, sin antobe nafani'.4 Es on naan nai Yakop annao ntoti atukus een naan am nak, “Hueh! Hi ma'ko mee?”
Sin nataen am nak, “Hai ma'ko kuan Haran.”
5 Lalit nai Yakop antoti nteni mnak, “Hi mihine au aam usi' nai Laban, aa oo? In le' naan, nai Nahor in anah.”
Ma sin nataen am nak, “Hai mihinel.”
6 Nai Yakop antoti piut am nak, “In n'ao-mina', ka?”
Sin nataen am nak, “Anaef ee et le' nae. In n'ao-miin. Mail. In aan feto bi Rahel anpoo' neki in mu'it een neman he na'inut sin anbin le' ii. Ho mpao mbi ii.”
7 Lalit nai Yakop naguab anteni mnak, “Manas namteet goe. Es on naan leko nneis mu'it een le' neem nabguan nalalin ii, hi mi'inut sin nai. Lalit hi mpoo' meki sin he sin nekun ma'ug.”
8 Mes sin naprotes matani' nak, “Hoi, ka on fa naan! Hai lo he mpao atukus sin neman ok-oke' neki sin mu'it een anteen iij ee fe'. Hena' hai mtita miskotun fatug naa, he mi'inut mu'it een naan.” 9 Nai Yakop fe' naga-guab nok atoni sin nane, bi Rahel neem antee nok in amaf ee mu'it een. Bijaas, in natuku mu'it een naan.
10 Tabug nai Yakop niit bi Rahel nok in abibin ma abib-kasen nane, in annao ntita nani fatu tobef naan. Lalit in na'inut in aam usif in mu'it een. 11 Ma in anneek bi Rahel, ma nkae. 12 Lalit in naguab noi bi Rahel am nak, “Au le' ii, baif bi Ripka in anah.” Es on naan bi Rahel naen anfani noi umel he natoon noi in amaf.
13 Tabug nai Laban anneen haan tonas nak nai Yakop naan, in fetof bi Ripka anah, in naen ansenug. Tabug sin na'ekun, nai Laban anhoog ma nneek ee. Lalit in nok ne noi in umel. Ma nai Yakop natu'in ale' saa'-saa' noi in aam usi'. 14a Ma nai Laban naguab am nak, “Namneo! Hit nua kit umel nanan!”
Nai Yakop ansao bi Lea ma bi Rahel
14b Tabug nai Yakop natgua nok sin funan mese, 15 nai Laban naguab noi ne mnak, “Ako! Au ka 'lomi fa he ho mmepu luum-luum aah moi kau, natuin hit nua kit umel nanan. Es on naan ho mtoti fauk?”
16 Nai Laban anmu'i aan feto nuug. Ahunut, in kanan bi Lea. Amunit, in kanan bi Rahel. 17 Bi Lea in maat penun.a Mes bi Rahel in human namaas, ma in aon ee msa' lo lekog. 18 Nai Yakop in anmofu neek noi bi Rahel. Es on naan in natae nai Laban am nak, “Au 'mepu noi ko toon hiit, lamun ho mlomi he au 'sao bi Rahel.”
19 Lalit nai Laban natael ee mnak, “Lekog! Nane es le' naleko nneis, natuin hit nua kit umel nanan. Maut he au anah bi Rahel naik ansao atoni teta'. Es on naan ho mutgua mbi ii, he mmepu moi kau.” 20 Lalit nai Yakop anmepu toon hiit, hena' in nabe'i ansao bi Rahel. In anneek niis bi Rahel. Es on naan toon hitu le' naan, on le' nenog fauk aah.
21 Toon hitu namsopu te, nai Yakop namnauba' aam usif nai Laban am nak, “Aam usi'! Au 'mepu toon hiit gue. Tabug iij, amnona' kau bi Rahel he au 'saog.”
22 Es on naan nai Laban anmo'e fesek noi lasi matsaos naan. In anhone too mfaun anbin kuan naan. 23-27 Faij naan, nai Laban ka nfee fa bi Rahel, mes in anfee bi Lea he ntaam noi nai Yakop in tenda. Es on naan nai Yakop antuup nok bi Lea. Nok-nok ana', na' nai Yakop nahine nak in antuup nok bi Lea. Es on naan nai Yakop anmatoe in aam usif nai Laban am nak, “Au 'aten ok toon hiit he 'sao bi Rahel! Fun kaah ho mseek ee meki bi Lea! Nansaa' am es ho mputakne'o kau on le' ii?”
Lalit nai Laban natael ee mnak, “Ho naik mutoo'! Tatuin hai halat anbi balel iij, feto muni' ka nabe'i fa he nmatsao nahunun feto unu'. Es on naan leko nneis on ii! Ho mpao he fesek nenog hitu namsopu fe', na' ho mupeni bi Rahel. Mes ho lo he mmepu mteni toon hitu noi kau.” Lalit nai Laban anfee in atel bi Silpa he njali bi Lea in atel.
28 Nai Yakop anlomi natuin. Ma fesek nenog hitu namsopu te, nai Laban anfee bi Rahel he nai Yakop ansaog. 29 Lalit nai Laban anfee in atel bi Bilha he njali bi Rahel in atel. 30 Ma nai Yakop ansao bi Rahel amsa'. In anneek annesi bi Rahel. Es on naan in nmepu nteni toon hiit noi in aam usif.
Nai Yakop in anah sin
31 Mes UISNENOG nahine nak nai Yakop anneek annesi bi Rahel. Es on nane, In nkolen bi Lea he nahoon. Mes bi Rahel kahaf. 32 Bi Lea na'apu', ma nahonis li'aan moonl es. In nakanab li'ana' naan nai Ruben (le' in oten nak ‘mail, anmu'i anah’),b natuin in naguab am nak, “UISNENOG nail niit au susal. Es on naan tabug iij, au monel he nail kau.”
33 Lalit bi Lea na'apu' anteni, ma nahonis li'aan moonl es. In nakanab, nai Simeon (le' in oten oni' nak ‘atoni' anneen nalali’), natuin in nak, “UISNENOG anneen nalali nak au monel ka nfaloli kau fa. Es na' In anfee nteni kau li'ana' ii.”
34 Lalit bi Lea na'apu' anteni, ma nahoni' li'aan moonl es. In nakanab li'ana' naan nai Lewi,c natuin in naguab am nak, “Nok le' li'ana' ii, au lasij oke' nalaal je. Namneo, au monel of nakii' anbi kau, natuin au uhoni' li'aan monel teen gue ma a'fee ne sin.”
35 Lalit bi Lea na'apu' anteni, ma nahoni' li'aan moonl es. In nakanab li'ana' naan nai Yahuda (le' in oten oni' nak ‘bo'is’), natuin in naguab am nak, “Tabug le' iij, au he 'pules UISNENOG!” Lalit bi Lea ka nahoni' fa leeh.