28
Lalit nai Isak no'en nai Yakop, ma nfee ne tetus ma fainekat am nak, “Amneen mulek-leko'! Ho naik amsao bifee munif na'ko pah Kana'an. 2 Mes ho mnao moi Padan Aram, moi ho babaf nai Betuel in umel. Ho mnao ma msao ho aam usi' nai Laban in aan feto es.a 3 Maut he Uisnenog le' Akuaas Matani' naan, es anfee ko tetus, he ho anah sin namfaun, ma ho sufam-ka'um sin anjalin uuf-uuf namfaun le' matani' een. 4 Maut he Uisnenog In lasi manpaa' noi nai Abraham nanete noi ko, ma noi ho sufam-ka'um sin. Maut he ho mupeni pah iij, le' Uisnenog anba'an nalalij noi nai Abraham.”b 5 Naguab nalali on nane, nai Isak nafetin nai Yakop he nnao noi Padan Aram, noi in aam usi' nai Laban ma babaf nai Betuel sin umel.Nai Esau ansao nai Isma'el in aan feto es
6 Nai Esau anneen nak nai Isak anfee nalali tetus noi nai Yakop, ma antaal ee he naik ansao aan feto munif na'ko pah Kana'an. In anneen amsa' nak in amaf anlelug he annao ma ansao aam usi' ee in aan feto es et Padan Aram. 7 Lalit nai Yakop natuin in inaf-amaf sin fainekat, es on naan in nnao noi Padan Aram.
8 Nai Esau nahine msa' nak, in amaf ka nlomi fa in feel een na'ko pah Kana'an. 9 Es on naan in nnao noi in aam besaf nai Isma'el, lalit in ansao nai Isma'el aan feto bi Mahalat. Bi Mahalat naan, nai Nebayot fetof.
Nai Yakop an'unmai nbi Betel
10 Lalit nai Yakop annao nasaitan Beer Seba noi kuan Haran. 11 Tabug manas anmouf, in antee balel mese, ma in antuup anbi naan. Tabug in he ntuup, in naiti fatug mese he n'aka'nunu'.
12 Faij naan in an'unmai. In niit elak mese, le' in tunan ansolait on anbi nenog. Lalit Uisnenog In ahake neno tunan sin ansae-nsanun anbin elak naan. 13 Anbi unumait naan, nai Yakop niit UISNENOG anhake nbi in abnapan, lalit In naguab am nak, “Au le' iij, UISNENOG, ho babaf nai Abraham ma ho ama' nai Isak sin Uisnenog. Au of a'fee ko pah ii noi ko ma noi ho sufam-ka'um sin. 14 Ho sufam-ka'um sin of namfaun on le' afu skuku'. Ma sin of nasana ok ma anbatis ok noin balel-balel. Na'ko ho sufam-ka'um, ale' uuf anbin pah-pinan of napenin tetus-athoen.c 15 Mumnau mulek-leko'! Ho mnao moi meel am meel aah, Au 'ok ko, 'pafa' ma 'panat ko. Au of 'eki ko amfani uum moi pah ii. Au ka usaitan ko mmese fa. Ma Au of uteba' lasi manpaa' een le' Au 'fee ko sin.”
16 Tabug nai Yakop anfeen na'ko tupas naan, in naguab am nak, “Au fe' uhine 'ak, UISNENOG et balel le' iij amsa'!” 17 Es on naan in namtau. Ma in natenab am nak, “Balel iij anmo'e kau m'au funuk een anfenan. Namneo-namneo, Uisnenog In umel et le' ii! Ma eno' he ttaam toi sonaf neno tunan, es le' ii.”d
18 Nok-nok ana', nai Yakop anfeen. Lalit in naiti fatu aka'nunu' naan, ma nahakeb ee njali taka'. Lalit in n'oop mina' anbi fatug naan, ma n'onen noi Uisnenog. 19 In nakanab balel naan Betel, le' in oten nak ‘Ume Uisnenog’. (Nahunut balel naan, kanan, Lus).
20 Lalit nai Yakop ansuup am nak, “Kalu Uisnenog nok kau, anpao ma npanat kau a'bi au lalan iij, ma nfee kau amnahat ma pakel, 21 tal antee au 'fani 'uum 'bi taimamut ma ao-mina', UISNENOG of anjali au Uisnenog. 22 Fatug le' au uhakeb iij, anjali bale onen noi Uisnenog. Ma saa'-saa' le' Uisnenog anfee kau sin, au of a'fee ufani' paaf mese na'ko bo' es.”