Bi Ripka namoe nai Isak he anfee tetus noi nai Yakop
27
Tabug nai Isak namnasi nalaal je, in maatn een anfolon nmaten. Es on naan in no'en in aan mone unu' le' in anneek nisan am nak, “Esau! Ho uum fe'!”Nai Esau natael ee mnak, “On mee?”
2 Nai Isak natoon ee mnak, “On ii! Au umnais je. Au ka uhine fa au neno 'maten. 3 Es on naan maiti ho bale' sekot een naan, amnao nai he mseko maan kau mu'i fuij es. 4 Lalit ho muhaan maan kau amnaah amin-minat le' au 'lomij, lalit mekij neem. Au 'eku ulali te, au 'fee ko tetus. Ma kalu au 'fee ulali ko tetus, au 'mate msa' lekog.”
5 Lalit nai Esau annao ma anseko. Mes bi Ripka anneen niit nai Isak in aguaban naan. 6 Lalit bi Ripka naguab noi nai Yakop am nak, “Hoi, Ako! Amneen mulek-leko! Lelon au 'neen ho ama' naguab nok ho tata' nai Esau, am nak: 7 ‘Ho mnao mseko maan kau mu'i fuij es, he muhaan ee namin-namiin noi kau. Kalu au 'eku ulali te, au 'fee ko tetus anbi UISNENOG In matan.’ 8 Es on naan ho mneen mulek-leko'! Au uguab saa' ate, mutuin. 9 Tabug iij, amnao nai moi hit abibi-kasen, ampili maan abibi tipu apokat nuug. Amlolo sin, ma maiti meki sin sisin een naan neman noi kau. Au of uhaan sin utuin ho ama' in lomin. 10 Kalu au uhaan ulali te, ho meki sin noi ho ama' he in anbukae. Lalit in anfee ko tetus fe', hena' in anmaat. Nok lalan naan, ho es mupeni tetus. Ka ho tata' fa.”
11 Mes nai Yakop naguab nok in inaf ee mnak, “Oin! Mes au tata' nai Esau in aon ee mafunu'. Au aok ee, kahaf! 12 Naik-naika ama' anpoe au aok ee, ma in nahine nani nak au umoel. Ma in ansukat kau!”
13 Ma in inaf ee nak, “Ako. Naik mumtau. Maut he au es a'atol! Kalu ho ama' ansukat ko, maut he au es le' a'sutaij. Tabug iij, amnao nai he mlolo abibin naan.”
14 Lalit nai Yakop annao anpili naan abibin naan. Ma in nlolo sin, ma neki sin sisin noin in inaf. Ma bi Ripka nahaan sin namin-minan on le' nai Isak in lomin. 15 Lalit bi Ripka annao naiti nai Esau in bale' pakel le' namasan, ma anfeen nai Yakop he npake sin. 16 In an'amu nai Yakop in animan een ma in neon, anpake pasu 'bibij naan. 17 Lalit in anfee sisi hana' een naan nok utunu' noi nai Yakop.
18 Lalit nai Yakop neki sisi hana' een naan noi in amaf. In naguab am nak, “Aam! Au 'uum eeh.”
Nai Isak natae ma antootj ee mnak, “Hoi! Ho sekog ko?”
19 Ma nai Yakop natael ee mnak, “Au le' ii, ho aan mone unu', nai Esau! Au 'mo'e utuin ho lekat. Amfeen nai he mbukae. Au uhaan sisij na'ko mu'i fuij le' au 'heke 'aan. Ambukae nai, hena' lalit muguab amfee kau tetus!”
20 Lalit nai Isak naguab am nak, “Ho matani le'uf ko! Ho mseko labah, oo!”
Nai Yakop natael ee mnak, “Au upeni labah, natuin UISNENOG le' ama' ho mubees noi Ne, es le' anbaban kau.”
21 Lalit nai Isak no'en nai Yakop am nak, “Ho mpaumaak kau fe', he au 'poe 'iit ko! Ho nai Esau, ai' kaha?”
22 Lalit nai Yakop ansilik antaam ma npaumak-maak in amaf. Ma anaef ee anpoel, ma naguab am nak, “In hanan, on le' nai Yakop in hanan! Mes in animan, on le' nai Esau in animan.” 23 Mes nai Isak ka nahine fa nai Yakop natuin in animan mafunu' on le' nai Esau. Mes tabug in he nfee tetus noi nai Yakop, 24 in antoti nteni mnak, “Ho le' ii, nai Esau namneo-namneo, aa oo?”
Ma nai Yakop natael ee mnak, “Namneo, aam!”
25 Lalit nai Isak naguab am nak, “Ho mnona' sisij naan he au 'ekug. Lalit na' au 'fee ko tetus.” Es on naan nai Yakop annona sisi ma tua min-kase noi in amaf, ma in anbukae. 26 Lalit in amaf naguab am nak, “Koijoo. Ampaumaak uum he mhoo ma amneek maan kau.”
27 Tabug nai Yakop anpaumaak he nhoo ma anneek in amaf, nai Isak nafoi nahine nai Esau in bale pakel sin fook een. Lalit in anfee tetus noi nai Yakop am nak,
“Au anah in foon, on le' amnefu' le' UISNENOG nasanut tetus,
28 Maut he Uisnenog nasanut akum na'ko nenog,
he ho lelen nasuni ma nasbeben!
Maut he In anfee ko pena'-anel anha-hoen,
ma ho po'an anggur een nafguan anha-hoen.
29 Uuf-uuf een of anjalin ho aten een,
ma uuf-uuf na'ko pah-pah of naluli' ma ntola' ko.
Maut he ho muplenat ho aom-abjaan sin ok-oke',
ma sin ala sin of anli'tuun anbin ho humam ma ho matam.
Sekog es le' ansukat ko, sin of napenin sukat amsa'.
Mes sekog es le' anfee ko tetus, sin of napenin tetus amsa'.”
Nai Esau anfani neem ma ntoti tetus na'ko nai Isak
30 Tabug nai Isak anfee nalali tetus, ma nai Yakop fe' anpoi nasaitan in amaf, in tataf nai Esau anfani neem ma neki mu'i fuij le' in anheke naan. 31 Es on naan in annao nahaan, lalit in nekij noi in amaf. In naguab am nak, “Aam! Amfeen he mbukae nai. Au uhaan ulali sisi fuij le' au 'nao 'seko 'aan. Ambukae mulali te, amfee kau tetus.”
32 Nai Isak naskeek. In antoti mnak, “Hoi! Ho seko ko ntein?”
Lalit nai Esau natael ee mnak, “Au nai Esau kau! Au ho aan mone unu.”
33 Es on naan nai Isak na'ta'ij. Lalit anaef ee antoti mnak, “Kalu on nane, lelon sekog es le' neki kau sisij ma au 'ekug? Au 'eku ulali, ma 'fee ulali tetus noi tuaf naan. Ma au ka ube'i fa he 'heel ufani' tetus le' au 'feel ee naan.”
34 Anneen in amaf naguab on naan, nai Esau nekan nameen, ma nkae nse'-seul. Ma naguab naheel-heel am nak, “Koi, aam! Amfee kau tetus amsa'!”
35 Mes nai Isak nak, “Ho oli' neem ma namoe nalali kau, ma nabaak naan ho tetus.”
36 Lalit nai Esau naguab am nak, “In namoe kau hael nuug ee. Nahunut, in namoe kau ma ansimo naan au hak aan mone unu. Tabug iij, in namoe kau nteni ma ansimo naan au tetus. Es on naan in kanan ‘Yakop’. Mes ho mmui' tetus abjaan antein he mfee kau, oo?” (Kanaf Yakop in oten ‘nnaa' haen tikan’. Mes in oten abjaan ‘amoet’.)
37 Lalit nai Isak natael ee mnak, “Au ulatan ulali ho oli' anjali ho usi'. Ma in amnono sin ok-oke' anjalin in atel sin. Au 'fee ne pena'-anel nho-hoen, ma hau fgua anggur anho-hoen amsa'. Es on naan Esau! Tabug iij au he 'fee ko tetus saa' a'tein?”
38 Anneen on nane, nai Esau noki in amaf ee piut am nak, “Aam, ho mmu'i haa tetus mese, aa ka? Au 'palsai, ho of ammu'i mteni abjaan. Maski aan'-ana' amsa', lekog!” Ma in anmulai nkae ntein.
39 Lalit nai Isak natae in anah nai Esau am nak,
“Ho monim of naloo' na'ko lele ma'afa' een,
ka tiit fa akum ansanu na'ko nenog he napeet ho naijaan een.
40 Ho suni' aan of es anfee ko he mmoon.
Mes maski on meel am meel msa', ho mjali atel noi ho oli'.
Aal kalu ho mlaban mube'ij, of na' ho mufetin maan om ma'ko in animan.”
Bi Ripka anlelu nai Yakop he naen
41 Nai Esau nato'an le'u nai Yakop, natuin nai Yakop nasiik naan in tetus. Mes in natenab am nak, “Ka 'loog fa, of nai ama' anmaat. Es on naan au 'paog. Be'at ee oke', au 'lolog!”
42-43 Tabug bi Ripka anneen nai Esau in salit naan, in no'en nai Yakop am nak, “Ho mneen mulek-leko'! Ho tata' ansali nalali he nbalas in neek menas. In he nlolo niis ko. Es on naan ho maen nai moi ho aam usi' nai Laban et Haran. 44 Amnao mutgua mtahan ambi nae, tal antee ho tata' in nekan ansaisuum. 45 Kalu in nniken nani saa'-saa' le' ho mmo'e sin noi ne te, au of a'leek ma 'lulu tuaf he neti naan ko. Natuin au ka 'lomi fa he uneku au aanh een nua sin haef mese naan.”
46 Lalit bi Ripka naguab nok nai Isak am nak, “Au neek baek nai Esau in fee nua' een le' na'kon atoni Hetes sin ii! Kalu nai Yakop ansao li' feto munif Hetes, leko nneis au mate nai.”