Nai Isak ma kesel Abimelek
26
Tabug mese, amnahas antaman pah naan, on le' amnahas tabug nai Abraham anmoni fe'. Es on naan nai Isak antoti he kalu naleek te kesel Abimelek, atoni Filistinas sin kesel, anfeen ee meinuan he in natgua nbi kuan Gerar. 2 In anmo'e on le' naan, natuin UISNENOG nakliil On noin ee mnak, “Ho naik amnao moi pah Masir. Au of uklila' ko balel abjaan. 3-4 Kalu ho mutgua on le' atoni anao-amnemat ambi balel naan, Au of 'ok ko, ma 'fee ko tetus ma athoen huma'-huma'. Au of a'mo'e ho sufam sin amfau-hutug on le' akfuun een et nenog. Ma Au 'fee noi ho sufam sin pah le' iij ma in kuan een oke'. Na'ko ho sufam-ka'um sin naan, of ale' uuf-uuf anbi pah-pinan iij napenin tetus ma athoen. Nok lalan naan, Au uteba' Au lasi manpaa' 'ok ho ama' nai Abraham.a 5 Au 'mo'e on le' iij, natuin ho ama' natuin Au lomik, Au plenat, ma Au atolan.” 6 Ma nai Isak natgua ntahan anbi kuan Gerar.7 Bi Ripka naan namaas. Es on naan tabug atoni sin le' anbin balel naan niit, sin anmatotin anmatoom nok ne. Mes nai Isak natael ee mnak, “Bi Ripka naan, au feto'.” In namtau kalu in anmanaku' mnak in feel, atonin naan of anlolog ma ansimo neki bi Ripka. 8 Nai Isak natgua suug aloog anbi naan. Tabug mese, kesel nasneku' niit nai Isak nok bi Ripka na'ko in nesu kiso'. In niit sin anmahoon feel-monel. 9 Ma in anleek tuaf he nnao no'en nai Isak, ma nakain ee mnak, “Isak! Au uhine ulek-leko' ulali, bifeel naan, ho feel! Mes nansaa' am es ho mak ho feto'?”
Ma nai Isak natael ee mnak, “On ii, aam kesel. Au umtau kalu au utoon am 'ak au feel, naik-naika tuaf abjaan sin anlolo niis kau.”
10 Lalit kesel natael ee mnak, “Kalu anmu'i tuaf anbi le' ii le' antuup nok ho feel, ho lo he musaan kai! Nansaa' am es ho mmo'e on naan noi kai?”
11 Lalit nai Abimelek namnauba' neki haan matani' noi in toog een am nak, “Hi ala ki mimnau milek-leko'! Sekom-sekog le' anmo'e amle'ut noi atonij ii ai' in feel, au of a'hukum umatel.”
Sin anmatoen anmatoom nok oe hani' een
12 Tabug naan nai Isak nalele anbi pah naan. In napeni in lelel nesan anfani ha'el natun mese, natuin UISNENOG anfee ne tetus-athoen. 13 In amu'in sin ansaatg ok piut, tal antee in anjali atoni amu'it namneo-namneo. 14 In bijael, a'bibij, ma a'bibi-kasel anmasaatg ok namfaun. In ameput een namfaun amsa'. Tal antee atoni Filistinas sin anselo natenab amle'ut noi ne.
15 Fe' unun, nai Isak in amaf nai Abraham sin anhanin oe hani' namfau. Mes tabug iij, atoni Filistinas sin ankuub nale'un oe hani' een naan neki naijaan.
16 Lalit kesel Abimelek naguab nok nai Isak am nak, “Isak! Leko nneis ho mnao musaitan hai pah iij ee nai. Hai mail, ho matanim, annesi nani kai.”
17 Lalit nai Isak annao nasaitan kuan naan, ma anfani natgua anbi nonof Gerar. 18 Ma in anhani nafani' oe hani' een le' sin ankuub sin naan. Ma in nakanab oe hani' een naan, natuin kaanf een le' unu' in amaf ee nakanab nani sin.
19 Tabug nai Isak in ameput sin anhanin oel anbin anonof Gerar nane, sin anhani napeni oe mata es, le' naspula anpoi. 20 Mes atukus een na'ko Gerar anmatoen nok nai Isak in atukus een, natuin oe hani' naan. Sin nak, “Iij hai oel!” Es na' nai Isak nakanab oe hani' naan Esek, le' in oten, ‘matoes’.
21 Lalit nai Isak inin, anhani oel es antein. Mes sin anmatoen ntenin, natuin oe hani' naan. Es na' nai Isak nakanab oe hani' naan Sitna, le' in oten ‘anmalaban een’.
22 Lalit in nasaitan balel naan, ma nhani nteni oe hani' mese. Tabug le' iij, sin ka nmatoen fa leh. Es na' nai Isak nakanab oe hani' naan Rehobot, le' in oten ‘bale meinuan’. Ma in naguab am nak, “Tabug iij, Uisnenog anfee kai balel he mitgua mbi bale meinuan ii. Anbi iij, na' hai mibe'i mihoni' ma misuuf he msaatg om.”
23 Na'ko nane, nai Isak sin annaon an'anin Beer Seba, he natguan anbin naan. 24 Faij naan, UISNENOG nakliil On noi ne, ma naguab am nak, “Isak! Au le' iij, ho ama' nai Abraham in Uisnenog. Es on naan naik mumtau, natuin Au 'pao ma 'panat ko. Au of a'fee ko tetus ma athoen. Ma ho sufam-ka'um sin of ansaatg ok namfau. Au 'mo'e on le' iij, natuin Au lasi manpaa' 'ok ho ama'.”
25 Lalit nai Isak anbaki fatug he nafena' me'i fuat anbi naan. Ma in antoti makasi noi UISNENOG anbi balel naan. In natgua nbi naan, ma in ameput sin anmulai nhanin oel antenin.
Kesel Abimelek ma nai Isak anmahalan neekf een
26 Tabug naan, kesel Abimelek neem na'ko kuan Gerar. In nok in amnono leko nai Ahusat, ma in meo-pa'e nai Fikol, neman ma nateef nok nai Isak. 27 Es on naan nai Isak antoti mnak, “Aam kesel! Nahunut hi mli'u kai mpoi ma'ko hi pah. Ma tabug iij hi iim he minsa'a mtein?”
28 Lalit sin natael ee mnak, “On ii! Tabug iij hai mihine mak Uisnenog anpao ma anpanat ko, anhao ma anbabi ko. Natuin lasij naan, hai miten-tenab, leko nnesi hit nua kit tahakeb lasi manpaa'. Ho msuup am mak, 29 hi of ka mmo'e fa lasi amle'ut noi kai, on le' hai ka mmo'e fa lasi amle'ut noi ki msa'. Namneo hai nekam naleko nok ki. Es na' nenog naan, hi misaitan hai pah iij nok taimamut. Hai mihine namneo-namneo, UISNENOG es anfee ki tetus-athoen.”
30 Lalit nai Isak anmo'e fesek noi sin. Sin anbukaen nabguan. 31 Anmiu nfini on nane, sin ansupan. Ma nai Isak nafetin sin he nfanin nok taimamut.
32 Nenog naan, nai Isak in ameput een neman ma natoon am nak, “Aam! Hai mipeni milali oel.” 33 Lalit nai Isak nakanab oe hani' naan Seba, le' in oten nak ‘supat’. Ma sin nakanab koot naan Beer Seba tal antee tabug ii.b
Nai Esau ansao bifeel nuug na'kon uuf abjaan