Nai Abraham anmatsao ntein
25
Nai Abraham ansao nteni bifeel es, kanan bi Ketura. 2 Bi Ketura nahonis li'ana een le' ii: nai Simran, nai Yoksan, nai Medan, nai Midian, nai Isbak, ma nai Sua. 3 Nai Yoksan in aanh een, es le' nai Seba ma nai Dedan. Nai Dedan in suufn een, es le': atoni Asuras, atoni Letus, ma atoni Leumas. 4 Nai Midian in aanh een es le': nai Efa, nai Efer, nai Henok, nai Abida ma nai Eldaa. Sin ok-oke' le' ii, bi Ketura in sufan.5-6 Tabug nai Abraham anmoni fe', in anbati nani noi bi Hagar ma bi Ketura sin anah een, mese-mese nok in amu'in. Lalit in anlelu sin he nnaon natguan anbin pah Kana'an antoot pesit manas asaen, he sin naloon na'ko in anah nai Isak. Mes in bale' pusaak sin ok-oke', in nnona' sin noi nai Isak.
Nai Abraham anmaat
7-8 Nai Abraham anmaat tabug in anmoni naan toon natun mese bo' hitu mniim (175). 9-10 Lalit in anah nai Isak ma nai Isma'el ansuub anbi nuat Makpela, le' anpaumaak kuan Mamre. Fe' unun, nai Abraham ansoos po'an naan na'ko atoni Hetes mese, le' in kanan nai Efron, nai Sohar in anah. Sin ansuub nahunun bi Sara' anbi nuat naan. 11 Nai Abraham anmate nalali. Uisnenog anfee tetus-athoen noi nai Isak ma in anmoni nbi tetus ao-mina' ma taimamut. Tabug naan, nai Isak natgua npaumaak oe hani' Beer Lahai Roi.
Nai Isma'el in sufan
12 Nai Isma'el in tu'in on ii. In le' naan, nai Abraham nok in feel atnana' bi Hagar sin anah. Bi Hagar naan, bi Sara' in atel na'ko pah Masir. 13-16 Nai Isma'el in aan mone een tuaf bo'es am nuug. In aanh een es le' ii: anma'akatuin een na'ko ahunut antee aheti susug, es le': nai Nebayot, nai Kedar, nai Atbeel, nai Mibsam, nai Misma, nai Duma, nai Masa, nai Hadat, nai Tema, nai Yetur, nai Nafis, ma nai Ketma. Li'aan monen le' iij, sin anjalin aam uuf noi toog pah bo'es am nuug, mese-mese anmu'i kuun in pah. Sin nakanab sin pah, mese-mese natuin sin baabf een sin kaank een.
17 Nai Isma'el anmaat tabug in anmoni naan toon natun mese bo' tenu mhiit (137). 18 Mes in sufan een naan, anmamusun es nok es. Lalit sin nabatin ma natguan nbatis ok anmulai na'ko Hawila tal antee Sur, le' anmahaumaak nok pah Masir, ankono ntee pah Asur.a
Tu'in na'ko nai Esau ma nai Yakop
19 Nai Abraham in anah nai Isak in tu'in, es le' ii. 20 Tabug nai Isak ansao bi Ripka, nai Isak anmoni naan toon bo' haa. Bi Ripka in amaf, es le' nai Betuel. In naof, es le' nai Laban. Sin le' naan atoni Aramas, na'kon pah Padan Aram.b
21 Bi Ripka ka nahoni fa. Es on naan nai Isak an'onen ma antoti UISNENOG he nfai bi Ripka in apun. UISNENOG anneen in onen naan, es na' bi Ripka na'apu'. 22 Bi Ripka annaben, in na'apu' li'ana nuug le' ankoen. Li'ana een naan anmatikan een piut anbin sin inaf ee in apun. Es on nane bi Ripka natenab am nak, “Nansaa' am es li'aan nua' een ii, on le' ii?” Lalit in antoti noi UISNENOG.
23 Ma UISNENOG natael ee mnak,
“Anbi ho apum aan, anmu'i naan li'ana' nuug le' of he njalin uuf nuug le' sin of anmamusun piut-piut.
Aan muni' of nabe'i nnesi na'ko aan unu'.
Ma tataf aan of anjali ameput noi in olif.”
24 Tabug in nenog antee, bi Ripka nahonis li'ana nuug le' ankoen sin. Aan monel oke'. 25 Ahunut amtasa', ma in aon mafunu. Es na' sin nakanab nai Esau (le' he noi on le' kata mese, le' in oten ‘mafunu’).
26 Lalit na in olif. Mes tabug in anpoi, in nnaa' in tataf in haen tikan. Es na' sin nakanab nai Yakop (le' he noi on le' kata mese, le' in oten ‘haen tikan’). Tabug nahonis sin, nai Isak anmoni naan toon bo' neel eeh (60).
Nai Esau annona' in hak aan ahunut
27 Tabug li'ana nuug le' ankuan een naan nanaen, nai Esau anjali asekot. In anlomi he natgua anbi nasij. Mes nai Yakop atoni a'eet. In anlomi he anbij ahaa umel. 28 Nai Isak bijaas anlomi he neku sisi fuij. Es on nane, in anneek nanes-nesib nai Esau. Mes bi Ripka anneek nanes-nesib nai Yakop.
29 Tabug mese, tabug nai Yakop nahaan oef afgoel, nai Esau anfani neem na'ko sekot. In anhae nmaat ma namnaah anmate msa'. 30 Es on naan in naguab noi nai Yakop am nak, “Ako! Ho mpesi maan kau oef amtasa' le' ho muhaan ee naan. Maski ba-baun, he au uhelan 'aan ok! Au umnaah ka ube'i fa leh.” (Es on naan sin anteek ee Edom, le' he noi on le' kata mese, le' in oten, ‘mee'’.)
31 Lalit nai Yakop natael ee am nak, “Lekog, taat honi'. Mes kalu ho mfee kau ho hak aan mone ahunut nane fe'!”c
32 Ma nai Esau natael ee am nak, “Ahh. Ma palaak nok le' hak aan mone unu! Ho mpaal. Au umnaah ka ube'i fa leh. Ho mpesi maan kau oef labah he mekij neem. Au he 'eku labah.”
33 Mes nai Yakop naguab anteni' mnak, “Taat honi'. Ampao ba-baun. Ho msuup fe' mak, ho mnona' kau hak naan.” Ma nai Esau ansuup on le' naan. 34 Lalit nai Yakop anpesi ne oef afgoel naan ma nfee ne nok utunu. Nai Esau anbukae nalali on nane, in anfeen annao kuun.
Nok lalan naan, nai Esau annona' nani in hak aan mone ahunut.