Sin namin nai Isak bifeel he nmatsaob
24
Nai Abraham in ua mnanu, tal antee in namnasi le'uf. UISNENOG anpanat ma anfeen ee tetus-athoen. 2-3 Nai Abraham anmu'i in atoni palsait mese, le' an'ulus ale' kanan in amu'in. Tabug mese, nai Abraham no'en ee mnak, “Amneen mulek-leko'! Au 'toti ko, he ho msuupa ampake UISNENOG le' anmo'e neno tunan ma pah-pinan In kanan, mak, ho naik amtoti bifee munif na'ko atoni Kana'an sin he mmatsaob ee nok au anah nai Isak. 4 Mes ho lo he mnao moi au kua-mnasi', moi au nonot een. Ho mami bifee munif mese ambi nae, he mmatsaob ee nok au anah.”5 Lalit atel naan antoti nai Abraham am nak, “Lekog! Mes au he 'mo'e on mee, kalu bifee munif naan ka nlomi fa he neem nok noi ii? Kalu on nane, au lo he 'eki nai Isak he tmatsaob ee nbi nae, ai' on mee?”
6 Nai Abraham natael ee mnak, “Ho mumnau mulek-leko'! Maski on meel amsa', ho ka mube'i fa he meki au anah annao noi nae! 7 Mumnau, UISNENOG le' annaa' kuasat et neno tunan, neki kau 'poi u'lali a'ko au kua-mnasi', ma neki kau a'taam a'tee balel ii. Ma In nahakeb lasi manpaa' nok kau msa' am nak, ‘Au of a'fee ko balel iij ok-oke' noi ho sufam-ka'um sin.’ Es on naan naik ho nekam naan na'oni'. Ho mnao. Uisnenog of anleek In ahake na'ko sonaf neno tunan he nasoitan lalan noi ko, he ho mube'i mu'eku mok bifee munif, le' he njali au anah in feel. 8 Mes kalu bifeel naan ka nlomi fa he neem nok ko noi iij ee te, ho supat iij ka neku ko fa. Maski on meel amsa', ka nabe'i fa he ho meki nai Isak moi nae.”
9 Lalit atel naan ansuup anbi nai Abraham am nak, “Lekog. Au 'mo'e utuin ho guabam een nane ok-oke'.”
10 Es on naan atel naan anpili naan bijakase unta bo'es. In nasaeb bale' mamasa' ma ma'upa' huma'-huma' anbin bijakase unta sin. Ma in nok in amnono sin annaon noin nai Nahor in koot et pah Mesopotamia.b
11 Atel sin naan annaon piut tal antee koot naan in ninen. Lalit sin nasnasab sin bijakase unta sin anbin naan, anpaumaak oe hani' mese. Tabug naan manas anmaab len. Bijaas, bifee munif sin neman he nkuin oel anbi oe hani' naan. 12 Lalit atel naan an'onen am nak, “UISNENOG le' au aam usi' Abraham in Uisnenog. Ambaban musoitan kau lalan, maut he au salit ii antee ma upeni in nesan alekot. Muklila' Uisnenog Ho nekam alekot moi au aam usi', ma mumnau in lasi manpaa' noi kau. Maut he naleko te, au u'eku 'ok nai Isak in feel anbi balel ii. 13 Usi', au hake et oe hani' ee ninen. Li' feto munif sin neman na'ko koot he nkuin ma nsuun oel na'kon oe hani' ii. 14 Es on naan au 'toti Ko, on ii: kalu au uguab 'ok bifee munif mese m'ak, ‘Palmisi. Kalu naleko te, musanut ho ana'i oel ee he au 'inu 'aan akle'og.’ Kalu in natael ee mnak, ‘Lekog. Ma au of u'inut ho unta sin amsa'.’ Naa, le' naan anjali taka' nak, bifee munif naan es le' Uisnenog Ho mpilij anjali nai Isak in feel! Nok ataka' naan, au uhine 'ak, Uisnenog mululu' mulali Ho manekam noi au usi', nai Abraham.”
Nai Abraham in atel na'eku li' feto bi Ripka
15-16 In ka n'onen nalali fa fe', li' feto munif mese neem. In kanan, bi Ripka. In le' naan nai Abraham in olif nai Nahor ma bi Milka sin anah nai Betuel in anah. Bi Ripka namaas namneo, ma fe' ao-'temef. In ansanu noi oe hani' naan, lalit in ankui oel noi in ana'i oel, lalit in ansae nfaan.
17 Tabug bi Ripka ansae nfaan, nai Abraham in atel naan naen neem ansenug. Lalit in antoti mnak, “Palmisi! Amfee maan kau oel he au 'inu 'aan akle'og.”
18 Lalit bifee munif naan natael ee mnak, “Lekog!” Lalit in nasanut in ana'i oel naan labah, ma anfeen atel naan he niin. 19 Ninu nalali on nane, bifee munif naan naguab am nak, “Maut he au 'kui oel he u'inut ho bijakase unta sin. Maut he sin ninun tal namsenan.” 20 Lalit in annao n'opan oe nesif naan anbi a'ba'i oel. Lalit in ansae-nsanu he nkui oel na'ko oe hani' naan, ma na'inut unta sin ok-oke', tal antee namsenan. 21 Nai Abraham in atel naan anhake ma n'elah kuun, mes nail nalek-leko' li' feto munif naan anmeep. In natenab am nak, “Le' Uisnenog anpiilj eel, es le' iij ee, oo?”
22 Unta sin ok-oke' ninun tal namsenan. Lalit atel naan naiti kaleli mnatu' le' sin bijaas antaog anbi sin panak een, ma niti mnatu' pasan mese ma nanitib bifee munif naan in animan nua sin.c 23 Lalit atel naan antoti mnak, “Ho ama' in kanan, sekog? Kalu leko te, faij iij au 'tuup a'tahan a'bi ho ama' in umel.”
24 Ma bifee munif naan, natael ee mnak, “Au ama', kanan nai Betuel. Au babaf, es le' nai Nahor. Au oin baba, es le' bi Milka. 25 Anbi hai umel anmu'i hala' tupa' noi ki. Ma anmu'i ma'ug noi ho mu'it een.”
26 Lalit atel naan naluli' ma nabees noi UISNENOG. 27 Ma in naguab am nak, “Pules ma bo'is noi Uisnenog! Usi' nasoitan lalan noi kau, tal antee au u'eku 'ok au aam usi' in nonot sin anbin ii. Nok lalan naan, Uisnenog naklila' In nekan alekot noi au aam usi', nai Abraham, ma najalib in lasi manpaa' noi kau.”
28 Lalit bifee munif naan naen anfani labah, he natoon lasij naan noi in umel nanan. 29-30 Bi Ripka in naof, kanan nai Laban. Tabug in niit amnatu een, ma anneen bi Ripka in aguaban nane, nai Laban naen anpoi lab-laab, he na'eku nok atel, le' anhake nabala fe' nok in bijakase unta sin anpaumaak oe hani' naan. 31 Lalit nai Laban naguab am nak, “Aam! UISNENOG neki ko mtee iij ee nok ao-mina'. Es on naan naik amhake mubalah ambi ii. Au 'toti he tnao toi hai umel. Hai miloitan ke'an, ma bukaet noi ko ma noi ho unta sin.”
Nai Abraham in atel antaam antoti bi Ripka
32 Lalit nai Abraham in atel naan annao natuin nai Laban, he nnaon noi nai Betuel in umel. Nai Laban sin nasanut anpeni sin bale' een na'ko unta sin. Lalit sin anhao unta sin neki ma'ug. Sin nekin oel amsa' he atel naan nok in amnono sin anboe sin haek ma animak een. 33 Tabug sin an'atol bukaet anbin me'ij, atel naan naguab am nak, “Nahunu na'ko hai he mbukae, au 'toti meinuan akle'og he utoon 'aan hai salit fe'.”
Ma nai Laban natael ee mnak, “Neu! Lekog.”
34 Atel naan naguab am nak, “Au le' iij, hi babaf nai Abraham in atel. 35 UISNENOG anfee tetus nathoe noi au usi' atonij, tal antee in anmu'i namneo-namneo. Uisnenog anfeen ee muti'-mnatu', atel bifeel ma atonij, ma mu'it amfau-hutug, es le': bijael, bijakase unta, bijakase keledai, a'bibij, ma a'bibi-kasel. 36 Tabug au usi' bifeel ma au usi' atonij namnasin on nane, oin Sara' nahonis naan li'aan monel es. In es le' he ansimo usi' Abraham in pusaak een ok-oke'. 37 Es on naan au usi' nai Abraham anlelu kau he 'suup am 'ak, ‘Ka nabe'i fa he ho maiti bifee munif Kana'an, he matsaob ee nok nai Isak. 38 Mes ho lo he maiti bifee munif na'ko au nonot sin, he njali nai Isak in feel.’
39 Lalit au 'toti au usi' atonij am 'ak, ‘Mes on mee kalu li' feto munif naan ka nlomi fa he neem nok noi ii?’
40 Lalit in natael ee mnak, ‘UISNENOG le' au utuin In lomin piut naan, of anleek In ahake na'ko sonaf neno tunan he nasoitan lalan noi ko, he ho mube'i mu'eku mok li' feto munif, le' he njali au anah in feel. 41 Mes kalu au nonot sin ka nlomin fa he nfee li' feto munif naan he neem nok ko noi iij ee te, ho supat ii ka neku ko fa.’
42 Es on naan lelon au 'uum atee oe hani' naan, au 'onen a'bi au nekak 'ak, ‘UISNENOG le' au usi' Abraham in Uisnenog. Ambaban musoitan kau lalan, maut he au salit antee ma upeni in nesan alekot. Maut he leko te, au u'eku 'ok nai Isak in feel anbi balel ii. 43 Usi', au 'hake et oe hani' ee ninen. Ma li' feto munif sin neman na'kon koot he nkuin ma nsuun oel anbin ii. Es on naan au 'toti on ii: kalu au uguab 'ok bifee munif mese m'ak, “Palmisi! Kalu leko te, musanut ho ana'i oel ee he au 'inu 'aan ba-baun.” 44 Kalu in natael ee mnak, “Lekog! Ma au of u'inut ho unta sin amsa'.” Le' naan anjali taka' nak, bifee munif naan es le' Uisnenog Ho mpilij anjali nai Isak in feel!’
45 Au ka 'onen ulali fa fe' ate, bi non Ripka neem neki in ana'i oel, ma nkui oel anbi oe hani' naan. Tabug in ansae nfaan, au 'toitj ee m'ak, ‘Palmisi! Amfee maan kau oel he au 'inu 'aan ba-baun.’ 46 Ma in nasanut in ana'i oel naan labah am nak, ‘Lekog! Maut he au 'kui oel he u'inut ho bijakase unta sin.’ Lalit au 'inu, ma au bijakase unta sin ninun amsa'.
47 Lalit au 'toitj ee m'ak, ‘Ho ama' in kanan, sekog?’
In natael ee mnak, ‘Au ama', es le' nai Betuel. Au babaf, es le' nai Nahor. Ma au oin baba, es le' bi Milka.’ Lalit au upakeb kalelij anbi in panan, ma unitib ee niti mnatu' pasan mese.
48 Ma au ululi' ma ubees 'oi Uisnenog am 'ak, ‘Pules-bo'is noi Uisnenog! Usi' Ho musoitan lalan moi kau, tal antee au u'eku 'ok au usi' atonij in nonot sin anbin balel ii. Ma au u'eku ulali 'ok nai Isak in feel amsa'.’ 49 Ma tabug iij, kalu sin ama ala ki amneek au aam usi' Abraham, mitoon kau muti'. Kalu ka fa te, mitoon kau muti' amsa'. Maut he au uhine 'ak, au he 'mo'e on mee.”
Bi Ripka in nonot sin ansimo oko'
50 Atel naan naguab nalali on nane, nai Laban ma nai Betuel nataen am nak, “Kalu UISNENOG es naloitan on nane, hai he mak saa' antein. 51 Bi Ripka es ii. Mok ne mnao nai. Maut he in anjali babaf nai Abraham in upuf, tatuin saa' le' UISNENOG an'atol nanij.”
52 Anneen on nane, nai Abraham in atel naan, nabees antee naijaan, ma antoti makasi noi UISNENOG. 53 Es on naan in naiti napoitan noni mnatu' ma noni muti', ma bale' pakel amasat, lalit anfee sin noi bi Ripka. In anfee noi bi Ripka in naof ma inaf ee msa' hadia le' ma'upa'. 54 Lalit nai Abraham in atel naan, ma in amnono sin, anbukaen nabguan. Lalit sin antupan anbin naan. Anmiu on nane, sin anfenan. Lalit atel naan natoon noi ume tuaf een am nak, “Au 'toti meinuan he mkolen kau, kalu lekog, hai mfani nai tabug iij moi au usi'.”
55 Mes bi Ripka in naof ma in inaf nak, “Hi mmanaap misek-seke' he saa'? Maut he bi Ripka nabalah naan nok kai nenog bo'es aah. Lalit na' hi mkoen om mok ne.”
56 Mes atel naan natael ee mnak, “Koi, oin! Naika mutau mteni kau! UISNENOG anbaban nalali kau, tal antee au u'eku ulalij een 'ok nai Isak in feel. Es on nane, hi mifetin kai he hai mfani ma meki lasij iij moi hai usi'.”
57 Ma sin natae atel nane mnak, “On ii! Hit to'en bi Ripka he 'toti toij. In alomin, on mee?”
58 Lalit sin no'en bi Ripka ma antootj ee mnak, “Ripka! Tabug iij, et le' ho. Ho mlomi he mok mani atonij iij ee kah, ai' on mee?”
Lalit bi Ripka natael ee mnak, “Au 'lomi he 'okan.”
Nai Isak ma bi Ripka anmatsaon
59-60 Lalit sin nafetin bi Ripka, ma in atel le' an'ulus ee na'ko in aan'-ana', he annaon nabgua nok nai Abraham in atel le' naan. Ma sin naseon bi Ripka neki tetus-athoen am nak, “Ripka! Maut he leko, Uisnenog anfee ko anah namfau, he ho sufam-ka'um een ansaatg ok nifun-nifun. Ma hai mifneek henati' ho sufam-ka'um een niis sin musun een amsa'!”
61 Lalit bi Ripka nok in atel naan, sin anpainote sin bale' een, ma ansaen bijakase unta, ma nnao nanin, natuin nai Abraham in atel naan.
62 Nai Isak natgua et pah Negep. Tabug naan, in fe' anfani neem na'ko oe hani' Beer Lahai Roi. 63 Neno mabe es, in anpoi na'ko in tenda he nna-nao kuun. In na'aiti in matan, ma napen-pene kuun on nane, in niit unta pukan mese annao neman.
64 Tabug bi Ripka nail niit nai Isak, in ansanu labah na'ko in unta. 65 Ma in antoti nai Abraham in atel nane mnak, “Aam, atonij le' annao neem le' nae, sekog?”
Atel naan natael ee mnak, “Nai Isak es le' nae.” Ma bi Ripka naiti in lipa' ma nsakatenu he ankuub naan in human.