Nai Abraham namoe kesel Abimelek
20
Lalit nai Abraham natnani na'ko Mamre, annao noi pah Negep et pesit ane'ug. In natgua anbi kuan Kades ma kuan Sur sin atnaank een. Mes ka loog fa on nane, in natnani nteni noi kuan Gerar. 2 Ma in natonan abiten kuan naan am nak, bi Sara' naan, in fetof. Es on nane, nai Abimelek, kesel Gerar, anleek tuaf ma antaam antoti bi Sara'. Lalit sin nekij noi kesel in sonaf.Lalit UISNENOG nasnasab bifee ahonit ma namobu bifee munif, na'ko kesel Abimelek in toog sin, natuin in ansimo naan nai Abraham in feel.a
3 Faij mese, Uisnenog nakliil On anbi unumait noi kesel naan. In naguab am nak, “Ho he mmaat eeh! Natuin ho msimo maan atoni' in feel!”
4-5 Mes nai Abimelek natael Ee mnak, “Usi'! Au ka 'poe 'iit fa bifeel naan. Ma au ka 'saan fa msa'. Nai Abraham nekin on natoon am nak, in fetof! Bifeel naan anmanaku' on le' nane msa'. Es on nane, au 'leek tuaf ma ntaam antotij nok neek aknino'. Es on naan Usi' naik musaan kau!”
6 Ma Uisnenog natael ee mnak, “Namneo. Au uhine 'ak ho nekam naan knino'. Ma Au es le' 'mo'e ko he naik ampoe bifeel naan. Nok lalan naan, ho ka musanab fa moi Kau. 7 Tabug ii, amnona' mufani' bifeel naan noi in monel. Atonij le' naan, Au mafefa knino'. Es on naan amtotij he n'onen henati' ho naik ammaat. Mes kalu ho ka mnona' mufani' fa bifeel naan, ho mumnau muleko'! Ho mok ho too nuug of ammate palsuum.”
8 Nok-nok ana', kesel no'en in ameput een ok-oke', ma natu'in in unumait naan. Es on naan sin ala sin namtaun. 9 Lalit kesel no'en nai Abraham, ma antotij ee mnak, “Au mmo'e 'saan ko saa', es ho mmo'e he hai mimle'u? Ho naika mumoe on le' naan. 10 Ho mutenab saa', es ho mmo'e on le' iij?”
11 Ma nai Abraham natael ee mnak, “Aam kesel! Au 'baisenu ko. Au utenab 'ak hi al-alaki ka mihine fa Uisnenog. Es on naan hi of mimate kau, he msao au feel. 12 Au uguab namneo, 'ak bi Sara' naan au feto'. Hai nua kai amaf mese, mes es-esat in iinf ee kuun. Es na' hai mmatsao on le' ii. 13 Es on naan tabug Uisnenog anleek kai he mpoi ma'ko hai kuan, ma mnao mila-'loo moi kua-teta', au utoon 'ani noi au feel ee m'ak, ‘Hit tbi meel am meel aah, kalu atoni' antoti anmatoom nok hit nua kit, ma kalu ho mneek kau te, mutae mak, hit nua kit fetof-naof.”’
14-16 Lalit kesel Abimelek annona' nafani bi Sara'. Ma in naguab nok bi Sara' am nak, “Tabug iij, au 'baen loi muti' nifun mese noi ho na'og, he nfani taka' am nak, au ka 'saan fa saa'-saa' noi ko. Maut he aal pah ii nahinen on le' naan!”
Lalit kesel naguab noi nai Abraham am nak, “Abraham! Au pah ii meinuan noi ko. Ho mlomi he mutgua ambi meel am meel aah, es le' ho.” Lalit in nfee ne bijael, a'bibij, ma a'bibi-kasel. In anfeen ee atel amsa', es le' atonij ma bifeel.
17-18 Tabug kesel annona' nafani' bi Sara' noi in monel, nai Abraham an'onen he Uisnenog nasoitan bifeen nuug naan sin apuk een. Ma sin nabe'i nahonin ntenin.b