Abiten Sodom sin maufinuk een
19
Tabug Uisnenog fe' naguab nok nai Abraham, In ameput een le' tua nua' een naan, annaon nfinin noin koot Sodom. Sin anteen ee te, manas he noi anmouf gue. Tabug naan, nai Lot fe' antoko anbi eno' he ttaam toi koot naan.a In niit tua nua' een nane, in nnao nsenu sin. In nlituu' ma naluli' anbi sin maatk een. 2 Lalit in naguab am nak, “Sin ama' ala ki! Au 'toti ki he mkoen om iim moi au umel fe'. Maut he amboe hi haem ma hi nimam ma mtuup maan faij mese ambi ii. Nnesi noi anmiu, na' hi mnao mfiin.”Mes sin nataen am nak, “Makasi. Mes ho naik muhaeb om! Maut he hai mtuup ambi koot iij in amnelan.”
3 Mes nai Lot anfuli' sin piut, tal antee sin nlomin he antuup antahan een anbin in umel. Ma nai Lot sin antunun utunu' ma nabaalb een bukaet, ma sin anbukaen nabguan. 4 Tabug sin fe' ka ntupan fa fe', atoni Sodom een, abaut-anaet neman ok-oke'. Sin anhaken anfuun naan nai Lot in umel. 5 Sin anhunun ma nasi'ug nai Lot alafgua-lafug am nak, “Hoi, Lot! Atoni nua' een lelon naa, esan mee? Mupoitan sin neman, hai he mihoo' sin!”
6 Es on naan nai Lot anpoi, lalit na'eek nesug. 7 In naguab am nak, “Aok-abjaan ala ki! Hi naik ammo'e le'uf on naan noi au tamu sin ii. 8 Iti hi mneen fe'! Au aan feton, tuaf nuug. Sin munif lek-lekon, ma ao-'temef fe'. Maut he au 'nona' ki sin. Hi he minsa'an sin amsa', es le' hi. Mes hi naik ammo'e saa'-saa' moi au tamu sin ii. Tatuin hit halat, au lo he 'panat sin.”
9 Mes atoni Sodom sin ankua' een am nak, “Ho naik amselo mok! Ho atoni amnemat. Ho atoni teta'. Es on naan ho ka mmui' fa hak he m'atol kai. Leko nneis ho muskotu ma'ko balel ii. Kalu kaah fa te, hai mmo'e amle'ut moi ko, annesi na'ko noi tua nua' een naan!” Lalit sin antita ma nsapal napasib nai Lot. Ma sin ala sin ok-oke' annaon he ntutu nale'un nesug.
10 Mes tamu nua' een naan, annona napoitan sin aniimk een ma nheel nataam nai Lot noi umel nanan, ma sin ankuus nesug. 11 Lalit sin nafolob atoni Sodom le' abiten nesug, es on naan sin an'abala-leon guah he namin nesug. Mes sin ka niit ee fa.
Uisnenog napoitan nai Lot sin na'kon Sodom
12-13 Lalit tamu nua' een naan, nak nai Lot am nak, “Lot! UISNENOG nahine nalali abiten koot iij sin maufinuk een. Es on naan In anleek kai he iim mile'un mani koot ii. Es on naan ho mmu'i mteni' nonot abjaan et koot iij, ai' kaha? Kalu nmu'i aan mone, aan feto, aan upuf, ai' sekom-sekog. Meki sin ampoi nai ma'ko koot ii!”
14 Ma nai Lot annao naguab nok atoni munif nuug le' nafnekan in aan feton am nak, “Amneen milek-leko'! Tabug iij, maen ampoi labah ma'ko koot iij ee nai! Natuin UISNENOG he nale'un niis koot ii!” Mes sin nateenb een nak ai' nai Lot namoe.
15 Nnesi noi anmiu, Uisnenog In ahake een naan, naseke' nai Lot sin he naen anpoin lab-laab nai. Sin naguab een am nak, “Lot! Amfeen nai! Meki ho feel, ma ho aan feto nua' een naan, maen ampoi misaitan koot iij ee nai. Naik-naika hi mmate palsuum, ma mimle'u mibgua mok koot ii.”
16 Mes nai Lot fe' he na'eob on. Fun kahaf, in amneot, UISNENOG he nsoi nafetin naan ee. Es on naan tamu nua' een naan anhuku naan nai Lot in animan, in feel, ma in aan feto nua' een naan, he napoitan sin na'kon koot naan. 17 Ma tuaf mese na'ko le' tamu nua' een naan, nak, “Maen miheel, he mmoon! Naik amniik! Naik misnaas ambi nonof! Maen amsae moi nu'af nae he hi mmoon!”
18 Mes nai Lot natael ee mnak, “Koi, aam! Naik on naan! 19 Namneo, ho mbaban kai he hai mmoon. Mes anu'af nael ee, nakloo! Naik-naika hai ka mtee maan fa nae, amleu't ee napeni kai mbi lalan atnanan. 20 Mail miit. Anmu'i naan kuan aan' es ka naloo' fa na'ko ii. Kuan le' nae, ka mateka' fa, natuin in aan'-ana'. Es on naan kalu ho mloom, maut he hai m'anij haa, hena' hai mmoon.”
21 Ma in natael ee mnak, “Lekog! Amnao nai! Au of ka ule'un fa kuan le' naan. 22 Tabug iij, hi maen nai moi kuan naan! Natuin au of ka 'mo'e saa'-saa' fa fe', kalu hi ka mtee fa fe'.” Anmulai na'ko tabug naan, atoni' anteek kuan naan nak, Soar, le' in oten nak ‘aan'-ana'’.
Koot Sodom ma Gomora anputu nmaten
23 Tabug manas ansae, nai Lot sin anteen Soar. 24 Nok askeken, UISNENOG an'opan uul-aij ma balerang le' anpiin, ansanu neem na'ko nenog noi koot Sodom ma koot Gomora. 25 UISNENOG notu naklati koot een naan ok-oke' ma kuan een le' anbi balel naan, ma ale' kanan amonit, es le' mansian, mu'it, ma haug anbi naan.
26 Tabug nai Lot sin naenan, in feel, anniik. Nok askeken, in njali nii masi'.
27 Anmiu nok-nok ana', nai Abraham anfani nteni noi balel le' afjaan in anhake ma nkakoe UISNENOG. 28 Ma in napene nsanu noi Sodom ma Gomora ma nonof anaek naan ok-oke'. In nail, masu een ansaen noi nenog abgua-abgua anbi meel am meel. Ma ai apinat naan notu niis ale' saa'-saa'.
29 Tabug Usi' notu naklati' koot een naan, In namnau In lasi manpaa' noi nai Abraham. Es manum In anbaban ma napoitan nai Lot na'ko balel le' In nale'un naan.
Nai Lot ma in aan feton
30 Tabug naan, nai Lot namtau he natgua nabala anbi kuan Soar. Es on nane, in nok in aan feto nua' een naan, natnanin noin anu'af. Lalit sin natguan anbin nuat mese.
31 Tabug mese, in aan feto ahunut, nak in olif ee mnak, “Anbi balel iij, anfuun am nateef ka tiit fa atonij he ansao kit. Ma ka loog fa len, hit ama' namnasi kuun eeh, ma ka nmu'i fa sufa-ka'uf antein jen. 32 Es on naan leko nneis, hit tamafu hit ama'. Lalit hit ttuup tokan. Maut he hit atluut hit ama' he anmu'i sufa-ka'uf.”
33 Faij naan, sin na'inut sin amaf neki tua min-kase, tal anmafu nmaat. Lalit feto unu' annao ma ntuup nok in amaf. Mes anaef ee anmafu nmaat, es on naan in ka nahine fa noi in anmo'e saa' nok in aan feto.
34 Anmiu nfini te, feto unu' naan, natoon noi in olif ee mnak, “Faij iij, au 'tuup ulaalj een 'ok hit ama'. Lalim anfai, ho paam. Hit tamafu tteni hit ama', lalit ho mtaam amtuup mokan. Nok lalan naan, hit nua kit of tahoni' ma tluut hit ama' in sufan.”
35 Faij naan, sin namafu nteni anaef. Lalit aan feto aheti susug, annao ma antuup nok in amaf. Mes anaef ee anmafu nmaat, es on naan in ka nahine fa noi in anmo'e saa' nok in aan feto.
36 Nok lalan naan, sin nua sin na'apun na'kon sin aam honij. 37 Lalit nai Lot in aan feto unu nahoni' li'aan monel es. In nakanab in anah naan, nai Moab (le' he noi huma' mese on le' kata mese anteni', in oten ‘neem na'ko ama'’). In es le' anjali aam uuf noi atoni Moabas tabug ii. 38 Lalit aan feto aheti susug, nahoni' li'aan monel es. In nakanab, nai Ben Ami (in oten ‘li'ana' na'ko au nuug’). In es anjali aam uuf noi atoni Amon sin tabug ii.b