Tuaf tenu neman ma nateef nok nai Abraham
18
Tabug mese, nai Abraham natgua npaumaak nai Mamre in hau naek een. UISNENOG neem ma nakliil On noin ee. In tu'in on ii: nenog naan, manas malalan ee kah, es on naan nai Abraham antook ma n'etu anin anbi in tenda in nesun. 2 Tabug nai Abraham na'aiti matan on nane, in niit tuaf teen nhaken anbi naan. Es on naan in naen ansenu sin. In anli'tuu, 3 ma in naguab noi sin am nak, “Sin ama sin! Kalu leko te, au 'toti he tkoen nok teem toi hi atel kau au tenda ii. Maski ambukae oe luum-luum ahaa msa', lekog. 4 Sin ama' ki ala ki misnaas ba-baun ambi haug sin mafok een. Maut he au atel sin nekin oel ma nboe hi haem ma hi nimam. 5 Au 'nao uloitan bukaet noi ki, maut he hi mipeni ha'tanis a'kle'og, hena' hi mkoen om amkoon. Au 'maliin he 'tuthae 'aan ki.”Lalit sin nataen am nak, “Lekog. Hai mesi mok naan.”
6 Lalit nai Abraham naen antaam noi tenda nanan, ma natonan bi Sara' am nak, “Labah! Maiti maan uut alekot, aluk mese. Ammo'e maan kit utunu'.”a
7 Lalit in naen noi in bijae nuug, ma anpili naan bijae apokat ana' mese. In anlelu in ameput es he nlolog ma nahaan in sisin. 8 Lalit nai Abraham annao naiti susug, susug alites, ma sisi hana' le' fe' nahaan nalalij, lalit in neki sin noi amneem fe'un naan. Tabug sin anbukaen, in anhake nbi haug mese in uun ma antuthae sin.
9 Es on naan sin antotij ee mnak, “Abraham! Ho feel bi Sara' et mee?”
Lalit in natael sin amnak, “Et tenda ee nanan.”
10 Ma tuaf mese na'ko sin tenu sin naan naguab am nak, “Of toon amnemat on le' iij, Au 'fani 'uum. Tabug naan, ho feel bi Sara' of nahoni' nalali li'aan moonl es.”
Tabug sin naguab een on nane, bi Sara' anneen na'ko nesug ee kotin. 11 Tabug naan, nai Abraham ma bi Sara' sin namnasin le'uf eeh. Bi Sara' ka napeni nteni fa funan. 12 Anneen sin naguab een on nane, bi Sara' anmani neek aah. In natenab am nak, “Hmmh! Au umnasi le'uf eeh. Saa' anteni', au monel anpeulame ma naklelit on eeh. Nok lalan mee, he hai aom een anmonin on le' amatsao fe'un, he mipeni anah?”
13 Lalit UISNENOG antoti nai Abraham am nak, “Nansaa' am es bi Sara' anmaan? In natenab nak ai' saa' le' Au uguab ee ii of ka njali fa, natuin in namnasi, oo? 14 Au le' iij, UISNENOG! Ka tiit tani fa saa' es, le' Au ka ube'i 'mo'el fa. Mumnau mulek-leko, oo! Kalu Au 'fani 'uum too amnemat, bi Sara' of nahoni' nalali li'aan moonl es.”
15 Anneen on nane, bi Sara' namtau. Lalit in natotan matani' am nak, “Au ka 'mani kuuk fa!”
Mes Uisnenog natael ee mnak, “Lelon ho mmani namneo.”
Nai Abraham antabal Uisnenog he naik anhukum abiten Sodom
16 Lalit tuaf tenu een naan annaon nfinin noin koot Sodom. Nai Abraham annao nafetin sin antee lalan atnanan. Anteen nane, sin napene niit koot Sodom. 17 Lalit UISNENOG natenab am nak, “Leko nneis, Au utoon noi nai Abraham am 'ak, Au he ule'un koot Sodom. 18 Natuin nai Abraham in sufan sin of masaatg ok tal namfaun, ma anjalin uuf mese, le' matani'. In of anjali amneki tetus-athoen amsa' noi ale' kanan uuf anbi pah-pinan ii. 19 Au 'pili ulalij eel eeh, he in nanoni' in anah sin ma tuaf abjaan antein, he natuin UISNENOG In lalan ee piut, ma anmonin nok neek amneot ma amnonot. Kalu sin anmo'en on le' nane, Au lasi manpaa' noi sin of nateeb on.”
20 Es on naan, UISNENOG naguab noi nai Abraham am, nak “On ii! Au 'neen ulali too mfaun sin ansakoin abiten koot Sodom ma koot Gomora sin maufinuk een anbainesi le'uf. 21 Es manum Au 'sanu 'uum, he 'iit 'eki Au matak ma uhine ale' saa'-saa' le' Au 'neen sin naan, namneo ka, ai' kaha. Kalu kaah fa te, Au of uhine msa'.”
22 Tabug UISNENOG fe' naguab nok nai Abraham, tua nua' een naan sin annaon nfinin noin koot Sodom. 23 Nai Abraham annao nhake npaumak-maak Uisnenog, lalit in anbaisenu ma antabal am nak, “Koi, Aam Usi'! On mee? Ho he mule'un atoni alekot ma atoni amle'ut haef mese nani, oo? 24 Kalu nmu'i tuaf alekot bo' niim (50) anbi koot naan, Ho he mule'un sin ok-oke' amsa', aa oo? Ai' Ho ka mule'un fa koot naan, natuin Ho mneek sin. 25 Aam Usi'! Naik ammo'e on naan! Naik-naika atoni alekot naan anmaten amsa', tabug Ho mule'un atoni maufinut een. Aam Usi', Ho es amjali Afeek Lasi anbi neno tunan ma pah-pinan. Es on nane, Ho kuum es muhine mak le' nane ka namneo fa.”
26 UISNENOG natael ee mnak, “Kalu Au upeni tuaf alekot bo' niim anbi koot Sodom, Au ka 'hukum fa koot naan, natuin Au 'neek sin.”
27 nai Abraham naguab anteni' mnak, “Aam Usi'. Naika muto'an kau. Leko te, au he uguab a'tein'. Au le' iij aal mansian a'olet. Au ka uhine fa saa'-saa'. 28 Taleta', kalu ka ntee fa tuaf alekot bo' niim, mes aal tuaf bo' haa mniim aah, on mee? Kalu ankulan aah tuaf niim, on mee? Ho he mule'un koot naan fe' aa, oo?”
Uisnenog natael ee mnak, “Kalu Au upeni tuaf alekot bo' haa mniim anbi koot naan, Au ka ule'un fa.”
29 Lalit nai Abraham antabal anteni' mnak, “Kalu aal tuaf alekot bo' haa, on mee, Aam Usi'?”
In natael ee mnak, “Kalu Au upeni tuaf alekot bo' haa, Au ka 'hukum fa sin.”
30 Nai Abraham antoti nteni mnak, “Aam Usi', naik mutoo'. Mes kalu aal tuaf alekot bo' teen guah, on mee?”
In natae nak, “Kalu Au upeni tuaf alekot bo' teen, Au ka 'hukum fa sin.”
31 Lalit nai Abraham antoti nteni' mnak, “Aam Usi', naik mutoo'. Au he 'toti ateni' ba-babaun. Kalu aal tuaf alekot bo' nuug aah, on mee?”
In natael ee nteni mnak, “Kalu nmu'i tuaf alekot bo' nuug, Au ka nuug fa he 'hukum koot naan.”
32 Nai Abraham nasopu in haan totis am nak, “Aam Usi'. Au 'toti haef es anteni', mes naika muto'an kau. Kalu aal anmu'i tuaf alekot bo'es aah, on mee?”
In natael ee msa' am nak, “Kalu Au upeni tuaf alekot bo'es anbi naan, Au ka ule'un fa koot naan.”
33 Naguab nalali on nane, UISNENOG annao nfiin. Ma nai Abraham anbelok anfaan.