3 Es on naan nai Abram anli'tuu ma naluli' tal antee naijaan. Lalit Uisnenog naguab piut am nak, 4-5 “Au 'mo'e lasi manpaa' 'ok ko, on ii: ho of amjali aam uuf moi uuf namfau. Es on nane, ho kanam naan ka nai Abram fa leeh (le' in oten nak ‘amaf le' mateka'’), mes nai Abraham (le' in oten nak ‘aam uuf noi uuf namfau’). 6 Au of a'mo'e ho sufam-ka'um sin amfau-hutug. Au of uhakeb uuf namfau na'ko sin, ma kesel namfau of anpoin ma anbolan na'ko sin.

7 Au 'naa' uhel-helan lasi manpaa' iij 'ok ko ma ho sufam-ka'um sin. Lasi manpaa' iij nabal-baal, natuin Au le' iij, Uisnenog noi ko ma noi ho sufam-ka'um sin. 8 Au of a'fee pah Kana'an ok-oke' noi ko ma noi ho sufam-ka'um sin. Tabug iij, ho aal mutgua mtahan aah. Mes of ho sufam-ka'um sin anpaal pah Kana'an iij, tal antee nabal-baal. Ma Au of a'jali sin Uisnenog amsa'. 9-10 Mes ho mok ho sufam-ka'um sin lo he mnaa' mihel-helan lasi manpaa' ii. Atoni sin ok-oke' lo he maheli' een. 11-13 Anmulai tabug iij, ale' atonij le' nmoni naan nenog faan neki nsae, lo he anhelin. Ho mok ho nonot, ho ameput sin ok-oke', ho atel sin le' ho msoos maan sin anbin pah abjaan, hi ala ki lo he maheli'. Helit naan, anjali taka' nak hit nua kit hit lasi manpaa' iij mamalak anbi hi aom een. 14 Atoni' mee le' ka nheli fa, ka napeni fa paa' anbi Au lasi manpaa', ma ka maso'it fa anbi Au toog.”

15 Lalit Uisnenog anluut In aguaban am nak, “Anmulai tabug iij, ho naik amteek amteni ho feel mak Sarai, mes mak Sara'. 16 Au of a'fee tetus-athoen noi bi Sara', he in nahoni' nfee ko li'aan moonl es. Teeb! Bi Sara' of anjali in iin uuf noi uuf namfau. Ma kesel namfaun of anpoin ma anbolan na'ko in sufan.”

17 Es on naan nai Abraham anli'tuu ma naluli' tal antee naijaan. Mes anbi in nekan nanan, in anmaan. In natenab am nak, “Atoni mnasi le'uf on le' au, toon natun mese, of upeni li'ana' on mee? Ma bi Sara' le' anmoni toon bo' seog ee, ma namnasi le'uf een amsa', in nabe'i nahoni' on mee?” 18 Es on naan in anbaisenu Uisnenog am nak, “Usi'. Maut he nai Isma'el es anpaal au pusaak sin. Ka saa'-saa' fa.”

19 Mes Uisnenog natael am nak, “Kahaf! Ho feel bi Sara' of nahoni' li'aan moonl es. Ho mukanab, nai Isak. Au lasi manpaa' naan of nateeb on noi ne, ma noi in sufan-ka'un sin, tal antee nabal-baal. 20 Au 'neen ulali msa', saa' le' ho mtotij noi nai Isma'el. Es on nane, Au 'fee ne tetus-athoen ma Au 'mo'e in sufan-ka'un sin namfaun. Anaak uuf bo'es am nuug of anbolan na'ko in sufan-ka'un sin. Ma in sufan-ka'un of anjalin pah anaek mese. 21 Maski on nane msa', Au lasi manpaa' iij, aal anmafutu nok ho anah nai Isak. Toon amnemat on le' iij, bi Sara' of nahoon je.” 22 Naguab nalali on nane, Uisnenog naneek Gon na'ko nai Abraham.

23-27 Nenog nane msa', nai Abraham anmo'e natuin Uisnenog In aplenat. Es on naan in nheil jon. Lalit in nheli' nai Isma'el, ma atonin abiten in umel nanan. In nheli' atoni atel sin amsa'. Tabug naan nai Abraham anmoni naan toon bo' seo mseo' (99), ma nai Isma'el toon bo'es am teen (13).