Bi Hagar ma in anah nai Isma'el
16
1-3 Tabug naan, nai Abram anfani neem een na'ko pah Masir, ma natgua naan toon bo'es een anbi pah Kana'an. In feel bi Sarai, ka nahoni' fa fe'. Bi Sarai anmu'i ate bifeel es, na'ko pah Masir, in kanan, bi Hagar.Tabug mese, bi Sarai nak in monel am nak, “Aam! UISNENOG an'eek au apuk. Leko nnesi, ho mtuup mok au atel bi Hagar, maut he au 'mu'i anah.”
Ma nai Abram natuin in feel ee hanan. Lalit bi Sarai anfee bi Hagar he nai Abram anpana' sin. 4 Lalit nai Abram antuup nok bi Hagar. Ma bi Hagar na'aap. Mes tabug bi Hagar nahine noi in na'apu', in nanaeb on. In ka napalan on fa noi bi Sarai.
5 Es on naan bi Sarai naguab nok in monel ee mnak, “Au es a'fee ko atel naan he anjali ho feel. Mes tabug in antaiboko, in ka nail naan kau fa. Iij ho ak'olam! Maut he UISNENOG es nafeek hit lasij. Hena' ho muhiin!”
6 Lalit nai Abram natael ee mnak, “On ii! Au 'sao ko nahuun. In namuun. Ma ho es le' he muplenat. Es on nane, ho he mmo'e saa'-saa' moi ne te, es le' ho!” Lalit bi Sarai anmulai nhamu'i bi Hagar, tal antee bi Hagar naen nasaitan.
7 In naen antee balel luman mese. Lalit UISNENOG In ahaket neno tunan mese neem na'eku nokan anbi balel le' npaumaak oe mata' anbi lalan he nnao noi Sur. 8 Lalit in nak, “Hoi! Hagar, bi Sarai in atel! Nansaa' am es ho es ii? Ho ma'ko mee, ma he mnao moi mee?”
Ma bi Hagar natael ee mnak, “Au 'aen usaitan au ina' le' au 'aten ok 'oi ne.”
9 Lalit UISNENOG In ahaket naan naguab nok ne lek-leko mnak, “On ii! Leko nnesi ho mfani moi ho ina' le' ho m'aten om moin. In anmo'e ko on meel ee msa', amsimog. 10 Naik mumtau. Au of a'mo'e ho sufam-ka'um sin amfau-hutug, tal antee ka tso'i tabe'i fa. 11 Tabug iij, ho mu'apu'. Ka loog fa te, ho of muhoni' li'aan monel es. Ho lo he mukanab, nai Isma'el (le' he noi namnees nok kata mese, le' in oten nak ‘Uisnenog anneen’), natuin UISNENOG nahine nalali ho susal ma mane'at. 12 Mes tabug li'ana' naan nanae, in of anmoni naloo' na'ko in olif-tataf sin. Natuin in on le' bijakase fuij, le' ka nlomi fa he natuin aplenat. Sekom-sekog amsa', in anlaban sin. Ma ale' atoni sin of anlaban nafani' ee.”
13 Anneen nalali on nane, bi Hagar natenab anbi in nekan, nak, “Au 'iit ulali UISNENOG, le' In nail ma npanat kau.” Lalit in anmulai anteek Uisnenog anpake kanaf, “Usi' le' anfaloli kau.” 14 Ma atoni' nakanab oe mata' naan, Beer Lahai Roi, (le' in oten, “Oe mata' na'ko Usi' Amonit, le' anfaloli kau.”) In balel et kuan Kades ma kuan Beret sin atnaank een. Tabug iij, oe mata' naan fe' esan.