Uisnenog anmanpaa' nok nai Abram
15
Lalit UISNENOG nakliil On noi nai Abram, ma naguab am nak, “Abram! Ho naik mumtau. Au es a'panat ko na'ko ho musun. Ma Au 'fee ko mnisat anaek.”2-3 Mes nai Abram nak, “Koi, Usi'. Maski Ho mfee kau saa'-saa' nathoe, ala loog ate, of luman. Natuin au ka 'mu'i fa anah he nfani au sufak. Es on naan au 'mu'i pusaak namfau he saa'? Namunit, of au atel nai Eliaser atoni Damsik naan es anpaal sin.”
4 Mes UISNENOG natael ee mnak, “Ka on fa naan! Ho aanh ee kuum of es le' ansimo pusaak naan. Ka ho atel nane fa.”
5 Lalit In neki nai Abram anpoi, ma In nak, “Ho mbaisenu miit moi nenog! Mail miit akfuun een naan. Ho mso'i maan sin, aa oo? Ho sufam-ka'um een of amfau-hutug on le' akfuun een naan!”
6 Es on naan nai Abram antebes UISNENOG In aguaban naan, lalit UISNENOG anso'ij ee antaam atoni neek amneot, natuin nai Abram anpalsaij.
7 Lalit UISNENOG anluut anteni In aguaban nane mnak, “Au le' iij, Uisnenog. Au es le' 'eki ko mpoi ma'ko ho kua-mnasi' Ur et pah atoni Kasdimas sin. Ma Au es le' a'fee balel le' iij, anjali ho naijaa pusaak.”
8 Mes nai Abram antoti mnak, “Mes on mee, UISNENOG? Nok lalan mee, na' au uhine m'ak balel iij anjali au naijaa pusaak?”
9 Es on naan In natael am nak' “On ii! Uum he hit attao taan mo'et mese, he tfutu saa' le' Au uguab lelon naa. Tabug iij, ho mnao maiti mu'it noi Kau: maiti bijae inaf mese, a'bibi inaf mese, ma a'bibi-kase kesog mese. Sin le' naan lo he toon teen guah. Lalit ho mheke maan kolo-ktuug mese, ma algua-sisij mese.”
10 Es on naan nai Abram annao nheke mu'it een naan ok-oke. Lalit in nlolo sin, ma npolo nbati mu'it een naan. Lalit sin siisj een, in n'atol sin lalan nuug anma'akatuin een anbi naijaan, ma anma'ailab sin es-es nok in aon-abjaan. Mes kolon in ka npolo fa sin. 11 Lalit kolo amneku sisi punu' een neman he nalaa' neki naan sisin le' naan. Mes nai Abram anli'u sin.
12 Tabug manas anmouf, nai Abram antuup anfiin. In nasmaan am nak, mesi'okan ankuub naan. Ma in namtau nmaat.
13-15 Lalit Uisnenog naguab noi ne mnak,
“Abram! Ho of ammoni tal antee mumnasi mfiin, ma ho of ammate mbi neek taimamut, es on naan sin of ansuub ko nok alekot.
Mes ho sufam-ka'um sin of annaon anjalin atoni amnemat anbi uuf abjaan sin pah.
Kua-tuaf abiten pah naan of na'ate sin, annene' ma nhamu'i sin, tal antee toon natun haa.
Mes Au of a'hukum abiten pah naan.
Lalit Au of 'eki upoitan ho sufam-ka'um sin na'ko balel naan, ma sin of neki bale pusaak amfau-hutug.
16 Au of a'atol he ho sufam-ka'um batan niim amnemat een, sin anfani neman noi balel iij antenin.
Tabug iij, atoni Amoris sin natguan es balel ii. Atoni sin iij amo'e amle'ut een, mes fe' ba-baun.
Tabug mese, kalu ho sufam-ka'um sin anfani neman ntee balel iij, Au of a'pake sin he 'hukum uneku atoni Amoris sin. Natuin tabug naan, sin maufinuk een kah.”
17 Anfai on nane, nok askeken, ana'i naijaan mese napoitan masu', ma 'nopo' es anpiin, sin annaon anboni sisin naan sin atnaank een. 18 Tabug naan, UISNENOG nahakeb lasi manpaa' nok nai Abram am nak, “Au 'paa' ani ko, Au of a'fee balel iij noi ho sufam-ka'um sin, anmulai na'ko noel Masira tal antee noel Efrat, 19 ma atoni Kenis sin pah, atoni Kenas sin pah, atoni Katmons sin pah, 20 atoni Hetes sin pah, atoni Feris sin pah, atoni Refaimas sin pah, 21 atoni Amoris sin pah, atoni Kana'an sin pah, atoni Girgasis sin pah, ma atoni Jebus sin pah.”