Nai Abram annao nasiik ma nok nafani' nai Lot na'ko makenat
14
Tabug naan, kesel haa nabguan. Sin es le': Amrafel, kesel pah Sinear; Ariok, kesel pah Elasar; Kedarlaomer, kesel pah Elam; ma Tideal, kesel pah Goyim. 2 Tabug nane msa', kesel niim anteni nabguan. Sin es le': Bera, kesel pah Sodom; Birsa, kesel pah Gomora; Sinap, kesel pah Adema; Semeber, kesel pah Seboim; ma Bela, kesel pah Soar. Lalit kesel haa' een naan anmakenan nok kesel niim' een naan. 3 Kesel niim' een naan nabguan nok sin solalus een anbi nonof-amnela' naek Sidim, (le' tabug iij sin anteek nak, Tasi 'Maten).4 Makenat naan, na'uub on na'ko lasi le' iij: nahunut, kesel Kedarlaomer naplenat kesel niim' een naan, toon bo'es am nuug. Mes antaam toon bo'es am teen, sin anmulai nlaban kesel Kedarlaomer.
5 Tabug antaam toon bo'es am haa, kesel Kedarlaomer nok kesel teen, neman nok sin solalus een. Ma sin nmakenan ma niis pah-pah abjaan sin, es le': atoni Refaimas et pah Asterot-Karnaim, atoni Susimas et pah Ham, atoni Emimas et pah Sawe-Kirjataim, 6 ma atoni Horis le' et anu'af Seir antee bale luman El Paran in ninen. 7 Lalit sin anbelok anfanin noin En Mispat (le' tabug iij, in kanan Kades). Lalit sin ankuaas atoni Amalekas sin pah, ma nkuaas atoni Amoris le' natguan anbi pah Haseson-Tamar.
8-9 Lalit kesel niim' een naan an'atol sin solalus een anbin nonof-mnela' Sidim. Ma sin nmakenan anlaban kesel haa' een naan. 10 Anbi mnela' naan, anmu'i nefog ter namfau. Tabug makenat naan, kesel Sodom ma kesel Gomora nok sin solalus een, anfeen am naenan. Abjaan anmofu ntaman noin tepas ter naan. Ma abjaan naenan noin anuu'f een. 11 Ma kesel haa' een le' nisan anbin makenat naan, nasiik naan ma neki ale' bale' ma amnahat na'ko Sodom ma Gomora. Lalit sin anbelok anfanin.
12 Tabug naan, nai Abram in anah nai Lot natgua et Sodom. Ma kesel haa' een naan anheke neki nai Lot sin, ma nasiik neki sin bale' een ok-oke'.
13 Mes anmu'i tuaf mese anfosu naan on. Ma in naen natonan nai Abram, atoni Ibranis. Tabug naan, anmu'i atoni Amoris mese, kanan nai Mamre. Nai Abram natgua npaumaak nai Mamre in hau naek een. Nai Mamre in amnono sin, es le' nai Eskol ma nai Aner. Sin nua sin, nai Abram namnono lekon. 14 Tabug nai Abram ansimo hanaf nak atoni sin anheke neki in olif ee anah, in nabguab in atoni ameput een le' amakeen ahinet een. Sin ala sin natun tenu mbo'es am faan (318). Lalit sin anli'u natuin kesel haa' een naan naloon antee kuan Dan, et pesit aliij.
15 Anbi naan nai Abram anbati in ameput een naan anjalin pukan-pukan. Tabug faij on nanet, sin antaman antaisibun atonin naan, mes abjaan naenan. Lalit nai Abram nok inin anli'u sin antee kuan Hoba, et koot Damsik in pesit aliij. 16 Lalit nai Abram napeni nafani' nai Lot, in ameput een, ma in bale' een ok-oke, ma nafetin tuaf abjaan amsa'.
Nai Melkisedek na'eku nai Abram. In le' naan, kesel ma anaak palsait noi Uisnenog
17 Tabug nai Abram anfani neem na'ko makenat le' in niis naan kesel haa' een nane, kesel Sodom neem ansenug anbi nonof-amnela' Sabe (le' atoni sin bijaas, anteek nak, Mnela' Kesel). 18 Tabug naan, nai Melkisedek kesel koot Salem,a ma in anaak palsait amsa' noi Uisnenog le' Alaat Le'uf. In neem neki utunu' ma tua min-kase noi nai Abram. 19-20 Lalit in anfee tetus noi nai Abram am nak, “Maut he Uisnenog le' Alaat Le'uf naan, le' anmo'e neno tunan ma pah-pinan naan, anfee tetus-athoen noi ko. Pules ma bo'is noi Uisnenog, le' anfee ko lasi mnisat na'ko ho musu sin!”
Lalit nai Abram anfeen kesel Melkisedek batis mese na'ko batis bo'es na'ko ale' saa'-saa' le' in nasiik nafani' sin.
21 Lalit kesel Sodom anbaisenu nai Abram. In naguab am nak, “Aam Abram. Bale' een le' ho musiik meki sin ma'ko au musun naan, maut he ho mpaal sin. Mes au 'toti ufani aah, au toog.”
22 Mes nai Abram natael ee mnak, “Au 'suup a'pake Uisnenog Alaat Le'uf, le' anmo'e neno tunan ma pah-pinan In kanan, 23 am 'ak, au of ka 'aiti fa bale' saa'-saa' mese a'ko ho bale' een naan. Maski abas tuka' mese amsa', au of ka 'ait je fa. Nok lalan naan, tabug mese, ho ka mube'i muguab fa mmak, ‘Au es umu'ib nai Abram.’ 24 Au ka 'lomi fa saa'-saa'. Aal bale' meel ee haa le' au ameput een anpake nalali sin, ho naika mutenab amteni sin nai. Ma maut he au amnono tenu een iij, nai Aner, nai Eskol, ma nai Mamre, naiti neki sin paak een.”