Nai Abram ma nai Lot anbatis ok
13
Lalit nai Abram nasaitan pah Masir, he anbelok anfani noi pah Negep. In neki in feel, ma in bale pusaak sin ok-oke. In olif ee anah nai Lot nok amsa'. 2 Nai Abram naan, atoni amu'it. In mu'it een amfau-hutug. Amnatu amsa', namfau.3 Na'ko Negep in natnani he anfani noi kuan Betel ma kuan Ai sin atnaank een. Nahunut, in natgua anbi naan. 4 Ma in anbaki me'i fuat amsa'. Lalit in naluli' ma nabees noi UISNENOG anbi balel naan.
5 Nai Lot, le' nok nai Abram naan, anmu'i mu'it amsa'. In mu'it een namfaun. Ma in nmu'i ameput namfau msa'. 6-7 Mes balel naan ka nmeinua leko fa noi nai Abram ma nai Lot sin. Natuin sin amu'ik een namfaun, sin ka nabe'i fa he nmoni nabguan. Es on naan nai Abram ma nai Lot sin atukus een anmatoen, natuin ma'ug le' anbi balel naan ka nanokab fa noi sin mu'it een. (Tabug naan, atoni Kana'an ma atoni Feris fe' natguan anbi nane amsa'.)
8 Es on naan nai Abram nak noi in anah nai Lot am nak, “Lot! Hit nua kit umel nanan. Oni' hit nua kit naik atmatenab, ma hit atukus sin amsa' naik anmatoen piut. 9 Naleko nnesi hit nua kit atbatis ok. Balel iij, meinuan fe'. Es on naan kalu ho mpili balel anbi pesit aliij, hena' au 'aiti abit pesit ane'ug. Mes kalu ho mpili balel anbi pesit ane'ug, hena' au 'aiti abit pesit aliij.”
10 Lalit nai Lot nail anfuun am nateef. Ma in niit nonof-amnela' anaek noel Yarden le' oel ee nathahoe, antee kuan Soar. Balel naan in nma'ekin on le' UISNENOG in po'an, ma on le' pah Masir. (Tabug naan, UISNENOG fe' ka nale'un fa koot Sodom ma koot Gomora. Ma balel naan naleko fe'.) 11 Es on naan nai Lot anbeti naan balel anbi nonof-amnela' naek noel Yarden naan. Ma nua sin anbatis ok. Lalit nai Lot annao n'ani pesit manas asaen. 12 Mes nai Abram natgua nabala anbi pah Kana'an. Nai Lot annao natgua anbi kuan-kuan le' anhaumaak koot Sodom et nonof-amnela' naek noel Yarden. 13 Mes abiten koot Sodom naan, atoni abulalut sin. Ma sin ka nfaloli fa UISNENOG amsa'.
14 Tabug nai Lot ma nai Abram anbatis ok, UISNENOG nak nai Abram am nak, “Abram! Ho mail mutef-tefan miit balel-balel ma'ko balel le' ho mhakel naan. Mail mulek-leko' aliij ma ane'ug, koti-mmaat. 15 Au of a'fee naijaan balel-balel le' ho mail sin naan, noi ko ma noi ho sufam-ka'um sin, he njalin sin naijaa pusaak tal antee nabal-baal. 16 Au of a'mo'e ho sufam-ka'um sin he anjali too mfaun on le' asnaen anbi tasij ninen. Tal atoni' ka nso'i nabe'i sin fa msa'. 17 Tabug iij, ho mnao mnono balel-balel le' ho miit mulali sin naan, natuin Au he 'fee sin noi ko!”
18 Lalit nai Abram sin natnanin, ma anfani natgua nteni anbin nai Mamre in hau naek een, anpaumaak kuan Hebron. Lalit in anbaki me'i fuat, ma naluli' ma nabesan noin UISNENOG anbi naan.